അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ലോകം മുഴുവൻ സന്തോഷത്തോടെ സ്വീകരിക്കുന്ന ഒരമ്മയുടെ സ്നേഹത്തെയും പ്രതീക്ഷയെയും കുറിച്ച് ചിന്തിച്ചുനോക്കൂ. ഉള്ളിൽ വളരുന്ന നാലുമാസം പ്രായമുള്ള ജീവന്റെ സ്പന്ദനം അറിഞ്ഞു തുടങ്ങുന്ന ഒരു യുവതി. അവളുടെ കണ്ണുകളിൽ സ്വപ്നങ്ങളുണ്ടാകാം, മക്കൾക്കായി കരുതിവെച്ച കരുതലുണ്ടാകാം. എന്നാൽ, ആ ആഗ്രഹങ്ങളെല്ലാം ഒരു കൊടും ക്രൂരതയിൽ തകർക്കപ്പെട്ടാൽ? 2016-ൽ ടെന്നസിയിലെ ഗ്രീൻവില്ലെ എന്ന ശാന്തമായ പട്ടണത്തെ നടുക്കിയ ജെസ്സി മോറിസൺ എന്ന 21-കാരിയുടെ കഥ കേവലം ഒരു കൊലപാതകത്തിന്റേതല്ല; മറിച്ച് സ്നേഹത്തിന് മുഖംമൂടിയണിഞ്ഞ ചതിയുടെയും ദുരൂഹതകളുടെയും നോവുപടരുന്ന കഥയാണ്.
ഓഗസ്റ്റ് 12, 2016. തന്റെ രണ്ട് കുഞ്ഞുങ്ങൾക്കൊപ്പം സമയം ചെലവഴിച്ചിരുന്ന ജെസ്സി ഒരു സൂപ്പർമാർക്കറ്റിൽ വച്ചാണ് അപ്രതീക്ഷമാകുന്നത് . തന്റെ മുൻ ഭർത്താവിന്റെ അമ്മയായ വോണ്ട സ്മിത്തിനൊപ്പമായിരുന്നു ജെസ്സി അന്ന്. മക്കളെ വോണ്ടയുടെ വീട്ടിലാക്കി ജെസ്സി മടങ്ങിയെന്നാണ് പ്രാഥമികമായി കരുതിയിരുന്നത്. എന്നാൽ ആ രാത്രി അവസാനിച്ചത് ഭയാനകമായ ഒരു കണ്ടെത്തലിലായിരുന്നു.
രാത്രിയിൽ നായയുമായി നടക്കാനിറങ്ങിയ ഒരാൾ ഒരു അരുവിക്ക് സമീപം ഉപേക്ഷിക്കപ്പെട്ട നിലയിൽ ജെസ്സിയുടെ ജീവനറ്റ ശരീരം കണ്ടെത്തുകയായിരുന്നു. പോസ്റ്റ്മോർട്ടം റിപ്പോർട്ടുകൾ കണ്ട പോലീസുകാർ പോലും നടുങ്ങിപ്പോയി. തലയ്ക്കേറ്റ കഠിനമായ മർദ്ദനമാണ് ആ യുവതിയുടെ ജീവനെടുത്തത്. തന്റെ ഗർഭസ്ഥ ശിശുവിനെ രക്ഷിക്കാൻ ആ പെൺകുട്ടി തന്റെ ആയുസ്സിലെ അവസാന നിമിഷം വരെ പൊരുതിയെന്ന് അവളുടെ മുറിവുകൾ ലോകത്തോട് വിളിച്ചുപറഞ്ഞു.
അന്വേഷണം വോണ്ട സ്മിത്തിലേക്കാണ് ചെന്നെത്തിയത്. വോണ്ടയുടെ മൊഴികളിലെ വൈരുദ്ധ്യം പോലീസിന് സംശയമുണ്ടാക്കി. പിന്നാലെ വോണ്ടയുടെ കാറിൽ നിന്ന് ജെസ്സിയുടെ രക്തക്കറകൾ കൂടി കണ്ടെത്തിയതോടെ കാര്യങ്ങൾ വ്യക്തമായി. ജെസ്സി തന്നെ ബഹുമാനിക്കുന്നില്ലെന്നും കുട്ടികളെ കാണാൻ അനുവദിക്കുന്നില്ലെന്നുമുള്ള പ്രതികാരമാണ് ഈ കൊലപാതകത്തിലേക്ക് നയിച്ചതെന്ന് പ്രൊസിക്യൂഷൻ കോടതിയിൽ സമർത്ഥിച്ചു. 2018-ൽ കോടതി വോണ്ടയെ ജീവപര്യന്തം തടവിന് ശിക്ഷിച്ചു.
എല്ലാം അവസാനിച്ചുവെന്ന് ലോകം വിശ്വസിച്ചിരിക്കെയാണ് 2023-ൽ ജയിലിൽ നിന്ന് വോണ്ടയുടെ ഞെട്ടിക്കുന്ന വെളിപ്പെടുത്തൽ വരുന്നത്. “ഞാനല്ല, എന്റെ മകൻ വില്യം സ്മിത്താണ് ജെസ്സിയെ കൊന്നത്!” എന്നായിരുന്നു ആ വാക്കുകൾ. താൻ കേവലം ഒരു സാക്ഷി മാത്രമാണെന്ന് വോണ്ട ഇപ്പോൾ അവകാശപ്പെടുന്നു.
ഇതിനോടൊപ്പം തന്നെ, ജെസ്സിയുടെ നഖങ്ങൾക്കിടയിൽ നിന്ന് ലഭിച്ച അജ്ഞാതരായ പുരുഷന്മാരുടെ ഡി.എൻ.എ (DNA) സാമ്പിളുകൾ ഇപ്പോഴും ചോദ്യചിഹ്നമായി തുടരുന്നു. അത് ആരുടേതാണ്? വോണ്ട മാത്രമാണോ ഈ കൊലപാതകത്തിന് പിന്നിൽ? അതോ തിരശ്ശീലയ്ക്ക് പിന്നിൽ ഇനിയും പിടിക്കപ്പെടാത്ത കൊടുംകുറ്റവാളികൾ ഉണ്ടോ? ജെസ്സിയുടെ മരണത്തിലെ നിഴലുകൾ ഇന്നും ആ പട്ടണത്തെ ഭയപ്പെടുത്തുന്നു.
