അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പുന്നയൂർക്കുളം കടിക്കാട് വില്ലേജ് ഓഫീസിൽ തണ്ടപ്പേര് സർട്ടിഫിക്കറ്റിനായി എത്തിയ പ്രവാസിയോട് രണ്ടര ലക്ഷം രൂപ കൈക്കൂലി ആവശ്യപ്പെട്ട സ്പെഷ്യൽ വില്ലേജ് ഓഫീസർ വിജിലൻസ് പിടിയിലായി. പത്തനംതിട്ട ചിറ്റാർ സ്വദേശിയായ എൻ.പി. വിനോദിനെയാണ് തൃശ്ശൂർ വിജിലൻസ് സംഘം ഓഫീസിൽ വെച്ച് അറസ്റ്റ് ചെയ്തത്. ആദ്യഗഡുവായി 50,000 രൂപ സ്വീകരിക്കുന്നതിനിടെയായിരുന്നു ഇയാൾ വലയിലായത്.
പരാതിക്കാരന്റെ പിതാമഹന് 1975-ൽ പട്ടയമായി ലഭിച്ച 98 സെന്റ് ഭൂമി പിതാവിന്റെ പേരിലേക്ക് മാറ്റുന്നതിനായുള്ള അപേക്ഷയിലാണ് വിനോദ് തടസ്സങ്ങൾ ഉന്നയിച്ചത്. ദീർഘകാലമായി നികുതി അടയ്ക്കാത്ത ഭൂമിയാണെന്നും പ്രവാസിയായ അപേക്ഷകന് ഇത് അനുവദിച്ചു നൽകാൻ ബുദ്ധിമുട്ടുണ്ടെന്നും പറഞ്ഞ് ഇയാൾ മൂന്ന് ലക്ഷം രൂപ ആവശ്യപ്പെടുകയായിരുന്നു. പിന്നീട് നടന്ന ചർച്ചയിലാണ് തുക രണ്ടര ലക്ഷമായി കുറച്ചത്.
പണം ആവശ്യപ്പെട്ട ഉദ്യോഗസ്ഥന്റെ പെരുമാറ്റത്തിൽ സംശയം തോന്നിയ പരാതിക്കാരൻ ഇതിന്റെ വീഡിയോ ദൃശ്യങ്ങൾ മൊബൈൽ ഫോണിൽ പകർത്തിയിരുന്നു. ഈ ദൃശ്യങ്ങൾ സഹിതം വിജിലൻസിന് നൽകിയ പരാതിയുടെ അടിസ്ഥാനത്തിലാണ് കെണിയൊരുക്കിയത്. പണം പൊതിഞ്ഞ് തന്റെ സീറ്റിന് പിന്നിൽ വയ്ക്കാനായിരുന്നു വിനോദ് നൽകിയ നിർദ്ദേശം.വിജിലൻസ് നിർദ്ദേശപ്രകാരം നൽകിയ 50,000 രൂപ കൈമാറുന്നതിനിടെ തൃശ്ശൂർ വിജിലൻസ് ഡിവൈഎസ്പി ജി. പോളിന്റെ നേതൃത്വത്തിലുള്ള സംഘം ഓഫീസിൽ പരിശോധന നടത്തി പണം പിടിച്ചെടുത്തു. സർക്കാർ സർവീസിലെ അഴിമതിക്കെതിരെയുള്ള ശക്തമായ നടപടിയാണിതെന്ന് വിജിലൻസ് അറിയിച്ചു. പിടിയിലായ പ്രതിയെ തെളിവെടുപ്പിന് ശേഷം തൃശ്ശൂർ വിജിലൻസ് കോടതിയിൽ ഹാജരാക്കും.
