അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മിഡിൽ ഈസ്റ്റിലെ നിലവിലെ സംഘർഷാവസ്ഥ കണക്കിലെടുത്ത് ഗൾഫ് രാജ്യങ്ങളിലെ സിബിഎസ്ഇ പന്ത്രണ്ടാം ക്ലാസ് ബോർഡ് പരീക്ഷകൾ പൂർണ്ണമായും റദ്ദാക്കി. സൗദി അറേബ്യ, യുഎഇ, ഒമാൻ, കുവൈത്ത്, ഖത്തർ, ബഹ്റൈൻ എന്നീ രാജ്യങ്ങളിലെ വിദ്യാർത്ഥികളെ ബാധിക്കുന്ന ഈ നിർണ്ണായക തീരുമാനം ഞായറാഴ്ച പുറത്തിറക്കിയ ഔദ്യോഗിക സർക്കുലറിലൂടെയാണ് സിബിഎസ്ഇ അറിയിച്ചത്. പത്താം ക്ലാസ് പരീക്ഷകൾ നേരത്തെ തന്നെ റദ്ദാക്കിയിരുന്നു.
മാർച്ച് 16 മുതൽ ഏപ്രിൽ 10 വരെ നടത്താൻ നിശ്ചയിച്ചിരുന്ന പരീക്ഷകളും, സാങ്കേതിക കാരണങ്ങളാൽ നേരത്തെ മാറ്റിവെച്ച പരീക്ഷകളുമാണ് ഇപ്പോൾ റദ്ദാക്കിയിരിക്കുന്നത്. മേഖലയിലെ അസ്ഥിരമായ സാഹചര്യം മുൻനിർത്തി സ്കൂൾ അധികൃതരും പ്രാദേശിക ഭരണകൂടങ്ങളും നൽകിയ സുരക്ഷാ നിർദ്ദേശങ്ങൾ പരിഗണിച്ചാണ് ബോർഡിന്റെ ഈ അടിയന്തര നീക്കം. റദ്ദാക്കിയ പരീക്ഷകൾ ഇനി നടത്തില്ലെന്ന് പത്രക്കുറിപ്പിൽ വ്യക്തമാക്കുന്നുണ്ട്.
പരീക്ഷകൾ റദ്ദാക്കിയ സാഹചര്യത്തിൽ വിദ്യാർത്ഥികളുടെ ഫലം എങ്ങനെ നിർണ്ണയിക്കും എന്ന കാര്യത്തിൽ ഇതുവരെ ഔദ്യോഗിക സ്ഥിരീകരണം വന്നിട്ടില്ല. എങ്കിലും, സ്കൂളുകളിൽ നേരത്തെ നടന്ന മോഡൽ പരീക്ഷകൾ, ഇന്റേണൽ അസസ്മെന്റുകൾ എന്നിവയുടെ മാർക്ക് അടിസ്ഥാനമാക്കി ഫലം പ്രഖ്യാപിക്കാനാണ് സാധ്യതയെന്ന് വിദ്യാഭ്യാസ വിദഗ്ധർ സൂചിപ്പിക്കുന്നു. ഫലം സംബന്ധിച്ച അന്തിമ തീരുമാനം പിന്നീട് അറിയിക്കുമെന്ന് ബോർഡ് വ്യക്തമാക്കി.
ഉപരിപഠനത്തിന് ഏറ്റവും നിർണ്ണായകമായ പന്ത്രണ്ടാം ക്ലാസ് പരീക്ഷകൾ പാതിവഴിയിൽ റദ്ദാക്കിയത് വിദ്യാർത്ഥികളെയും രക്ഷിതാക്കളെയും ഒരുപോലെ ആശങ്കയിലാഴ്ത്തിയിട്ടുണ്ട്. വിദേശ സർവ്വകലാശാലകളിലും ഇന്ത്യയിലെ പ്രമുഖ കോളേജുകളിലും പ്രവേശനം കാത്തിരിക്കുന്നവർക്ക് ഈ തീരുമാനം തിരിച്ചടിയാകുമോ എന്ന ഭീതിയിലാണ് പ്രവാസി മലയാളി സമൂഹം. ഗ്രേഡിംഗ് രീതിയിൽ വരാൻ സാധ്യതയുള്ള മാറ്റങ്ങൾ പ്രവേശന പരീക്ഷകളെ ബാധിക്കുമോ എന്ന കാര്യത്തിലും വ്യക്തത വരേണ്ടതുണ്ട്.
