അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മലയാളത്തിലെ എക്കാലത്തെയും മികച്ച കോമഡി ചിത്രമാണ് ‘സിഐഡി മൂസ’. ദിലീപ് നായകനായ ചിത്രത്തിൽ നായികയായി എത്തിയത് ഭാവനയായിരുന്നു. കൂടാതെ കോമഡിയുടെ രാജാക്കന്മാരായ കൊച്ചിൻ ഹനീഫ,ജഗതി, സലിം കുമാർ, ഹരിശ്രീ അശോകൻ തുടങ്ങിയവർ മത്സരിച്ചഭിനയിച്ച ചിത്രം കൂടിയായിരുന്നു ‘സിഐഡി മൂസ’. പ്രായഭേദമന്യേ മുതിർന്നവരും കുട്ടികളും ഏറ്റെടുത്ത ചിത്രം ഇപ്പോഴിതാ ചിത്രത്തിന്റെ രണ്ടാം ഭാഗം അടുത്ത വർഷം പുറത്തിറങ്ങുമെന്ന് പ്രഖ്യാപിച്ചിരിക്കുകയാണ് സംവിധായകൻ ജോണി ആന്റണി.
കഴിഞ്ഞ ദിവസം നടന്ന ഒരു ചടങ്ങിനിടെയായിരുന്നു ജോണി ആന്റണി രണ്ടാം ഭാഗത്തെ കുറിച്ച് പറഞ്ഞത്. ദിലീപും ഇക്കാര്യത്തെ കുറിച്ച് സംസാരിക്കുന്നുണ്ട്. എന്നാൽ കൊച്ചിൻ ഹനീഫയും ജഗതിയും ഒടുവിൽ ഉണ്ണികൃഷ്ണനും ക്യാപ്റ്റൻ രാജുവും ഒന്നുമില്ലാതെ എന്ത് സിഐഡി മൂസയാണ് എന്നാണ് ഭൂരിപക്ഷം പ്രേക്ഷകരും ചോദിക്കുന്നത്. ഇത് എല്ലാ വർഷവും പ്രഖ്യാപിക്കുന്നതല്ലാതെ വേറെ ഒന്നും നടക്കുന്നില്ലല്ലോ എന്നും ചിലർ കമന്റ് ചെയ്യുന്നുണ്ട്.
അതേസമയം ഭ ഭ ബ ആയിരുന്നു ദിലീപിന്റേതായി അവസാനം പുറത്തിറങ്ങിയ ചിത്രം. വമ്പൻ ഹൈപ്പോടെ എത്തിയ ചിത്രം തിയേറ്ററിൽ ദയനീയമായി പരാജയപ്പെടുക മാത്രമല്ല വലിയ വിമർശനവും ട്രോളുകളും നേരിട്ടിരുന്നു. എന്നാൽ ഒടിടിയിലും ചിത്രത്തിന് രക്ഷയുണ്ടായിരുന്നില്ല. വിവാദമായ പല രംഗങ്ങളും നീക്കം ചെയ്തതിന് ശേഷമാണ് ഒടിടി പതിപ്പ് എത്തിയത്. മോഹൻലാൽ, ധ്യാൻ ശ്രീനിവാസൻ, വിനീത് ശ്രീനിവാസൻ എന്നീ താരങ്ങൾ ഉണ്ടായിരുന്നിട്ടും ചിത്രം വലിയ സാമ്പത്തിക നഷ്ടം കൂടിയാണ് നേരിട്ടത്.
