അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ജയസൂര്യ – മിഥുൻ മാനുവൽ തോമസ് ചിത്രം ആട് 3 റിലീസ് ചെയ്ത് ഏഴാം ദിവസം നൂറ് കോടി ക്ലബ്ബിൽ ഇടംപിടിച്ചു. നിർമാതാവ് വിജയ് ബാബു തന്നെയാണ് ഇക്കാര്യം ഔഗ്യോഗികമായി സ്ഥിരീകരിച്ചത്. ജയസൂര്യയുടെ കരിയറിലെ ആദ്യ നൂറ് കോടിയാണിത്.
ഫ്രൈഡേ ഫിലിംസിന്റെ ബാനറിൽ വിജയ് ബാബുവും കാവ്യ ഫിലിംസിന്റെ ബാനറിൽ വേണു കുന്നപ്പിളളിയുമായിരുന്നു സിനിമയുടെ നിർമാണം. ഫ്രൈഡേ ഫിലിംസിന്റെയും ആദ്യ നൂറ് കോടി ചിത്രമാണിത്.
മിഥുൻ മാനുവൽ തോമസ് രചിച്ചു സംവിധാനം ചെയ്ത “ആട് 3 പാർട്ട് 1 ; വൺ ലാസ്റ്റ് റൈഡ്” ആഗോള ബോക്സ് ഓഫിസിൽ റെക്കോർഡ് വിജയമാണ് സ്വന്തമാക്കുന്നത്. മൂന്ന് ദിവസം കൊണ്ട് കേരളത്തിൽ നിന്ന് മാത്രം 20 കോടി രൂപക്ക് മുകളിൽ ഗ്രോസ് കലക്ഷൻ നേടിയ ചിത്രം ആദ്യ രണ്ടു ദിനം കൊണ്ട് സ്വന്തമാക്കിയത് 48 കോടി ആഗോള കലക്ഷൻ ആയിരുന്നു.
റിലീസ് ചെയ്ത് ആദ്യ ആഴ്ചയിൽ ആഗോള ഗ്രോസ് നേടിയ മലയാള ചിത്രങ്ങളുടെ ലിസ്റ്റിൽ മോഹൻലാൽ നായകനായ എമ്പുരാന് (175 + കോടി) ശേഷം രണ്ടാമത് എത്താൻ ആട് 3ക്ക് സാധിച്ചു. മോഹൻലാൽ നായകനായ “തുടരും”, കല്യാണി പ്രിയദർശന്റെ “ലോക” എന്നീ ചിത്രങ്ങളെ ലിസ്റ്റിൽ യഥാക്രമം മൂന്നും നാലും സ്ഥാനത്തേക്ക് പിന്തള്ളിക്കൊണ്ടാണ് ആട് 3 ലിസ്റ്റിൽ രണ്ടാമത് എത്തിയത്. കേരളത്തിന് പുറത്ത് ഗൾഫ് മാർക്കറ്റിൽ യുഎഇയിൽ ആണ് ചിത്രം ഏറ്റവും കൂടുതൽ കലക്ഷൻ നേടുന്നത്. ആദ്യ രണ്ടു ദിനം കൊണ്ട് ഗൾഫിൽ നിന്ന് മാത്രം 20 ഗ്രോസ് ചിത്രം പിന്നിട്ടിരുന്നു. റസ്റ്റ് ഓഫ് ഇന്ത്യ, റസ്റ്റ് ഓഫ് ദി വേൾഡ് മാർക്കറ്റിലും ചിത്രം ഗംഭീര ബോക്സ് ഓഫിസ് പ്രകടനമാണ് നടത്തുന്നത്.
മാർച്ച് 19 ന് ആഗോള റിലീസായി എത്തിയ ചിത്രം ഗംഭീര പ്രേക്ഷക പ്രതികരണം ആണ് നേടിയത്. ചിത്രത്തിലെ നായകനായ ജയസൂര്യയുടെ കരിയറിലെ തന്നെ ഏറ്റവും വലിയ ആദ്യ ദിന കേരളാ ഗ്രോസും ആഗോള ഗ്രോസ്സും നേടിയ ചിത്രം, ഇതിനോടകം തന്നെ അദ്ദേഹത്തിന്റെ കരിയറിലെ തന്നെ ഏറ്റവും വലിയ ബോക്സ് ഓഫീസ് ഹിറ്റായിട്ടുണ്ട്. ചിത്രത്തിന്റെ ആദ്യ രണ്ടു ഭാഗങ്ങളെക്കാൾ വലിയ സ്വീകരണമാണ് മൂന്നാം ഭാഗത്തിന് പ്രേക്ഷകർ നൽകുന്നത്.
ബിഗ് ബജറ്റ് എപിക് ഫാന്റസി ചിത്രമായി എത്തിയ ആട് 3 വിജയ് ബാബുവിന്റെ ഉടമസ്ഥതയിലുള്ള ഫ്രൈഡേ ഫിലിം ഹൗസ്, ശ്രീ വേണു കുന്നപ്പിള്ളി നേതൃത്വം നൽകുന്ന കാവ്യാ ഫിലിം കമ്പനി എന്നിവർ ചേർന്നാണ് നിർമിച്ചിരിക്കുന്നത്. മലയാള സിനിമയുടെ ചരിത്രത്തിലെ തന്നെ ഏറ്റവും വലിയ ചിത്രങ്ങളിലൊന്നായാണ് ആട് 3 പ്രേക്ഷകരുടെ മുന്നിൽ എത്തിയത്.
