അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.നഗരത്തിലെ പ്രമുഖ പഞ്ചനക്ഷത്ര ഹോട്ടൽ കേന്ദ്രീകരിച്ച് നടന്ന ലഹരിപ്പാർട്ടിക്കിടെ പോലീസിന്റെ മിന്നൽ പരിശോധന. സമൂഹത്തിന്റെ വിവിധ ഉന്നത പ്രൊഫഷണൽ മേഖലകളിൽ പ്രവർത്തിക്കുന്ന എട്ടംഗ സംഘത്തെയാണ് മാരക ലഹരിമരുന്നുകളുമായി പോലീസ് പിടികൂടിയത്. രഹസ്യ വിവരത്തിന്റെ അടിസ്ഥാനത്തിൽ സിറ്റി പോലീസിന്റെ പ്രത്യേക വിഭാഗം നടത്തിയ റെയ്ഡിലാണ് യുവതികൾ ഉൾപ്പെടെയുള്ള സംഘം വലയിലായത്.
പിടിയിലായവരിൽ ഭൂരിഭാഗവും ഉയർന്ന വിദ്യാഭ്യാസ യോഗ്യതയുള്ളവരും പ്രൊഫഷണലുകളുമാണ് എന്നത് പോലീസിനെ ഞെട്ടിച്ചിട്ടുണ്ട്. തിരുവനന്തപുരം ശംഖുമുഖം സ്വദേശിയും ഇവന്റ് മാനേജ്മെന്റ് ഉടമയുമായ ഷാജി ഫെർണാണ്ടോ, കല്ലൂർ സ്വദേശികളായ ഓസ്റ്റിൽ ജോസ്, അഭിഭാഷകൻ രോഹിത് നായർ, കൊടുങ്ങല്ലൂർ സ്വദേശി ജിനോ മുരളി, ആലപ്പുഴ നൂറനാട് സ്വദേശിയായ ന്യൂട്രീഷ്യനിസ്റ്റ് അക്ബർ ഷാ, ദന്തഡോക്ടർ ബെൻസി റാവുത്തർ, കൊല്ലം സ്വദേശിനിയും ഫിസിയോതെറാപ്പിസ്റ്റുമായ സെയ്തലവി ഫാത്തിമ, ഏവിയേഷൻ വിദ്യാർത്ഥി അമൽ റൗഫ് എന്നിവരാണ് പിടിയിലായവർ.
അന്താരാഷ്ട്ര വിപണിയിൽ ലക്ഷങ്ങൾ വിലമതിക്കുന്ന അതിമാരകമായ സിന്തറ്റിക് ലഹരിമരുന്നുകളാണ് പ്രതികളിൽ നിന്ന് കണ്ടെടുത്തത്. കൊക്കെയ്ൻ, എം.ഡി.എം.എ (MDMA), എക്സ്റ്റസി ഗുളികകൾ, മെത്താംഫെറ്റമിൻ എന്നിവയ്ക്ക് പുറമെ അതീവ പ്രഹരശേഷിയുള്ള ഹൈബ്രിഡ് കഞ്ചാവും ഇവരുടെ പക്കൽ നിന്നും പോലീസ് പിടിച്ചെടുത്തു. വിദേശത്തുനിന്നും മറ്റും എത്തിച്ച ഈ ലഹരിവസ്തുക്കൾ ഹോട്ടൽ മുറിയിൽ വെച്ച് ഉപയോഗിക്കുകയും കൈമാറുകയും ചെയ്യുന്നതിനിടയിലാണ് പോലീസ് സംഘം എത്തിയത്.
