അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പ്രണയിച്ച് വിവാഹം കഴിച്ചതിന്റെ പേരിൽ 22 വയസ്സുകാരിയെ സ്വന്തം പിതാവും ബന്ധുക്കളും ചേർന്ന് കൊലപ്പെടുത്തി. ആന്ധ്രാപ്രദേശിലെ മാച്ചർല സ്വദേശിനിയായ ചൗഡേശ്വരിയാണ് ക്രൂരമായ ദുരഭിമാനക്കൊലയ്ക്ക് ഇരയായത്. സംഭവത്തിൽ പെൺകുട്ടിയുടെ പിതാവ് ചന്ദ്രശ്രീനുവിനെയും ഒരു ബന്ധുവിനെയും പോലീസ് അറസ്റ്റ് ചെയ്തു. പ്രതികളെ സഹായിച്ച സർക്കിൾ ഇൻസ്പെക്ടറെ സർവീസിൽ നിന്ന് സസ്പെൻഡ് ചെയ്തു.
കഴിഞ്ഞ മാർച്ച് 4-നാണ് വീട്ടുകാരുടെ സമ്മതമില്ലാതെ ചൗഡേശ്വരി തന്റെ കാമുകനെ വിവാഹം കഴിച്ചത്. ഇതിനെതിരെ വീട്ടുകാർ നൽകിയ പരാതിയിൽ അന്വേഷണം നടത്തിയ പോലീസ്, മാർച്ച് 15-ന് ദമ്പതികളെ കണ്ടെത്തി. എന്നാൽ, നിയമപരമായ നടപടികൾ പാലിക്കുന്നതിന് പകരം മാച്ചർല ടൗൺ സർക്കിൾ ഇൻസ്പെക്ടർ യുവതിയെ ഭീഷണിപ്പെടുത്തുകയും നിർബന്ധപൂർവ്വം മാതാപിതാക്കളുടെ കൂടെ അയക്കുകയുമായിരുന്നു എന്ന് അന്വേഷണത്തിൽ വ്യക്തമായി.
മാതാപിതാക്കൾക്കൊപ്പം വീട്ടിലെത്തി മൂന്നാം ദിവസമാണ് ചൗഡേശ്വരിയെ മരിച്ച നിലയിൽ കണ്ടെത്തിയത്. മകൾ ആത്മഹത്യ ചെയ്തതാണെന്ന് വരുത്തിത്തീർക്കാനായിരുന്നു കുടുംബത്തിന്റെ ശ്രമം. എന്നാൽ മരണത്തിൽ സംശയം തോന്നിയ പോലീസ് നടത്തിയ ശാസ്ത്രീയ പരിശോധനയിൽ ഞെട്ടിപ്പിക്കുന്ന വിവരങ്ങൾ പുറത്തുവന്നു. യുവതിയെ തലയിണ ഉപയോഗിച്ച് ശ്വാസംമുട്ടിച്ച് കൊലപ്പെടുത്തിയതാണെന്ന് പോസ്റ്റ്മോർട്ടം റിപ്പോർട്ടിൽ തെളിഞ്ഞു. ഇതോടെയാണ് പോലീസ് മാതാപിതാക്കളെ കേന്ദ്രീകരിച്ച് അന്വേഷണം നടത്തിയത്.
ഈ കൊലപാതക കേസിൽ ഏറ്റവും ഗൗരവകരമായ കണ്ടെത്തൽ സർക്കിൾ ഇൻസ്പെക്ടറുടെ പങ്കാണ്. പ്രതികളിൽ നിന്ന് കൈക്കൂലി വാങ്ങി കൊലപാതക വിവരം മറച്ചുവെക്കാനും പ്രതികളെ സംരക്ഷിക്കാനും ഉദ്യോഗസ്ഥൻ ശ്രമിച്ചതായി അന്വേഷണ സംഘം കണ്ടെത്തി. യുവതിയെ നിർബന്ധപൂർവ്വം മരണത്തിലേക്ക് തള്ളിവിട്ട വീട്ടുകാർക്കൊപ്പം അയച്ചതും ഇതേ ഉദ്യോഗസ്ഥനാണ്. ഇയാളെ നിലവിൽ സസ്പെൻഡ് ചെയ്തിട്ടുണ്ട്.
ഗൂഢാലോചന, തെളിവ് നശിപ്പിക്കൽ, അഴിമതി തുടങ്ങിയ കുറ്റങ്ങൾ തെളിയിക്കപ്പെട്ടാൽ സി.ഐക്കെതിരെ കടുത്ത ക്രിമിനൽ നടപടികൾ ഉണ്ടാകുമെന്ന് ഉന്നത ഉദ്യോഗസ്ഥർ അറിയിച്ചു.
