അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.രാവിലെ ഏഴ് മണിക്ക് ആരംഭിച്ച വോട്ടെടുപ്പിൽ സംസ്ഥാനത്തിന്റെ വിവിധ ഭാഗങ്ങളിലായി സിനിമാ സാംസ്കാരിക രംഗത്തെ പ്രമുഖർ തങ്ങളുടെ സമ്മതിദാനാവകാശം വിനിയോഗിച്ചു. തിരക്കേറിയ ബൂത്തിൽ വരി നിന്ന് വോട്ട് രേഖപ്പെടുത്തിയാണ് പല താരങ്ങളും മടങ്ങിയത്. തങ്ങൾ വോട്ട് ചെയ്തുവെന്നും ഇനി നിങ്ങളുടെ ഊഴമാണെന്നുമുള്ള ശക്തമായ സന്ദേശവും താരങ്ങൾ സമൂഹമാധ്യമങ്ങളിലൂടെ പങ്കിട്ടു.
മെഗാസ്റ്റാർ മമ്മൂട്ടിയും സൂപ്പർ താരം മോഹൻലാലും വോട്ടെടുപ്പിന്റെ ആദ്യ മണിക്കൂറുകളിൽ തന്നെ പോളിംഗ് ബൂത്തുകളിലെത്തി. തിരുവനന്തപുരം നേമം മണ്ഡലത്തിലെ മുടവൻമുഗൾ എൽപി സ്കൂളിലാണ് മോഹൻലാൽ വോട്ട് രേഖപ്പെടുത്തിയത്. തികച്ചും സാധാരണക്കാരനായി അരമണിക്കൂറോളം ക്യൂ നിന്ന് വോട്ട് ചെയ്തതിനു ശേഷമാണ് താരം മടങ്ങിയത്.
വോട്ട് രേഖപ്പെടുത്തിയ ശേഷം മഷി പുരട്ടിയ വിരൽ ഉയർത്തിക്കാട്ടി “ഇതാണ് എന്റെ സന്ദേശം” എന്ന് പറഞ്ഞ താരം, തന്റെ കടമ പൂർത്തിയാക്കിയെന്നും ഇനി കേരളത്തിന്റെ ഊഴമാണെന്നും സോഷ്യൽ മീഡിയയിലൂടെ ഓർമ്മിപ്പിച്ചു.
അതേസമയം, എറണാകുളം പൊന്നുരുന്നി ക്രൈസ്റ്റ് കിംഗ് കോൺവെൻഷൻ സ്കൂളിലെ ബൂത്തിലാണ് മമ്മൂട്ടി തന്റെ വോട്ട് രേഖപ്പെടുത്തിയത്.
കേന്ദ്രമന്ത്രി സുരേഷ് ഗോപി ഗുരുവായൂർ മണ്ഡലത്തിലെ ദേവസ്വം ഇംഗ്ലീഷ് മീഡിയം സ്കൂളിലെ 137-ാം നമ്പർ ബൂത്തിലെത്തി വോട്ട് ചെയ്തു. ഗുരുവായൂരിൽ വോട്ട് ചെയ്യാൻ സാധിച്ചതിൽ അതിയായ സന്തോഷമുണ്ടെന്നും കേരളത്തിൽ ഇത്തവണ വലിയ രാഷ്ട്രീയ മാറ്റങ്ങളും അത്ഭുതങ്ങളും ഉണ്ടാകുമെന്നും സുരേഷ് ഗോപി പ്രതികരിച്ചു. ബിജെപി ഇത്തവണ നിർണ്ണായക ശക്തിയായി മാറുമെന്നും വോട്ട് ചെയ്ത ശേഷം മാധ്യമങ്ങളോട് സംസാരിക്കവെ സുരേഷ് ഗോപി വ്യക്തമാക്കി.
നടൻ പൃഥ്വിരാജ് സുകുമാരനും ഭാര്യയും നിർമ്മാതാവുമായ സുപ്രിയ മേനോനും എറണാകുളം മണ്ഡലത്തിലെ ഗവൺമെന്റ് റീജിയണൽ ഫിഷറീസ് ടെക്നിക്കൽ സ്കൂളിലെ ബൂത്തിലെത്തിയാണ് വോട്ട് രേഖപ്പെടുത്തിയത്.
ഭാര്യയ്ക്കും മാതാപിതാക്കൾക്കുമൊപ്പം എത്തിയാണ് നടൻ ടൊവിനോ തോമസ് വോട്ട് രേഖപ്പെടുത്തിയത്.
നടനും സ്ഥാനാർത്ഥിയുമായ രമേഷ് പിഷാരടിയും വോട്ട് രേഖപ്പെടുത്തി.
തിരുവനന്തപുരം നേമം മണ്ഡലത്തിലെ നൂറാം നമ്പർ ബൂത്തിലാണ് ജഗദീഷ് വോട്ട് ചെയ്യാനെത്തിയത്. ഭാര്യ ആനിയ്ക്കും മക്കൾക്കുമൊപ്പം എത്തിയാണ് ഷാജി കൈലാസ് തന്റെ വോട്ട് രേഖപ്പെടുത്തിയത്.
വോട്ടർമാർ ബോധവാന്മാരാണെന്നും എല്ലാവരും ശരിയായ തീരുമാനമെടുക്കുമെന്നും അഹാന കൃഷ്ണ. ഗവൺമെന്റ് എൽപിഎസ് കാഞ്ഞിരംപാറയിൽ സഹോദരി ഇഷാനിയ്ക്കും അച്ഛൻ കൃഷ്ണകുമാറിനുമൊപ്പമെത്തിയാണ് അഹാന വോട്ട് രേഖപ്പെടുത്തിയത്.
വോട്ട് രേഖപ്പെടുത്തിയതിനുശേഷം നടി ശിവദയും ചിത്രങ്ങൾ സോഷ്യൽ മീഡിയയിൽ പങ്കിട്ടു. അമ്മയ്ക്ക് ഒപ്പമെത്തിയാണ് നടൻ സുരാജ് വെഞ്ഞാറമൂട് വോട്ട് രേഖപ്പെടുത്തിയത്.
സംവിധായകൻ വിനയനും തന്റെ സമ്മതിദാനാവകാശം രേഖപ്പെടുത്തി. “ഞാൻ എന്റെ ഉത്തരവാദിത്വം നിറവേറ്റി… നിങ്ങളും തീർച്ചയായും വോട്ടു ചെയ്യണം.. എങ്കിലേ ജനാധിപത്യം വിജയിക്കൂ… യാതൊരു സമ്മർദ്ദവും ഇല്ലാതെ ഒരു പൗരനു കിട്ടുന്ന സ്വാതന്ത്ര്യം…,” എന്നാണ് വിനയൻ സമൂഹമാധ്യമങ്ങളിൽ കുറിച്ചത്.
ഭാര്യയ്ക്ക് ഒപ്പമെത്തിയാണ് ഹരിശ്രീ അശോകൻ വോട്ട് രേഖപ്പെടുത്തിയത്. “ആര് ജയിച്ചാലും നന്നായി ഭരിച്ചാല് മതി,” എന്നായിരുന്നു വോട്ട് രേഖപ്പെടുത്തിയതിനു ശേഷം ഹരിശ്രീ അശോകൻ മാധ്യമങ്ങളോട് പ്രതികരിച്ചത്.
