അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പ്രധാനമന്ത്രി നരേന്ദ്ര മോദിയുടെ തിരുവല്ല സന്ദർശനത്തിനിടെ സുരക്ഷാ ഉദ്യോഗസ്ഥരെ കയ്യേറ്റം ചെയ്ത സംഭവത്തിൽ മ്യൂസിയം പോലീസ് സ്റ്റേഷനിലെ പ്രൊബേഷണറി എസ്ഐ കൃഷ്ണമോഹനെ സർവീസിൽ നിന്നും സസ്പെൻഡ് ചെയ്തു. സിറ്റി പോലീസ് കമ്മിഷണറുടേതാണ് നടപടി.
ഔദ്യോഗിക ഡ്യൂട്ടിയിലല്ലാതിരുന്നിട്ടും പ്രധാനമന്ത്രിയെ കാണാനായി രണ്ട് സുഹൃത്തുക്കൾക്കൊപ്പമാണ് കൃഷ്ണമോഹൻ എത്തിയത്. എന്നാൽ വിഐപി സുരക്ഷയുള്ള ചടങ്ങിൽ പ്രവേശിക്കുന്നതിന് ആവശ്യമായ ഔദ്യോഗിക പാസ് ഇയാളുടെ പക്കൽ ഉണ്ടായിരുന്നില്ല. പാസില്ലാതെ ഉള്ളിലേക്ക് കടക്കാൻ ശ്രമിച്ചതിനെ തിരുവല്ല സിഐ തടയുകയും മടങ്ങിപ്പോകാൻ ആവശ്യപ്പെടുകയും ചെയ്തു. ഇതിൽ പ്രകോപിതനായ കൃഷ്ണമോഹൻ സിഐയുമായി വാക്കേറ്റത്തിലേർപ്പെടുകയും തുടർന്ന് ശാരീരികമായി കയ്യേറ്റം ചെയ്യുകയുമായിരുന്നു.
സംഭവസ്ഥലത്ത് വെച്ച് അതിക്രമം കാട്ടിയത് പോലീസ് ഉദ്യോഗസ്ഥനാണെന്ന് അധികൃതർക്ക് ആദ്യം തിരിച്ചറിയാൻ സാധിച്ചിരുന്നില്ല. പിന്നീട് നടത്തിയ വിശദമായ അന്വേഷണത്തിലാണ് മ്യൂസിയം സ്റ്റേഷനിലെ എസ്ഐയാണ് അക്രമത്തിന് പിന്നിലെന്ന് വ്യക്തമായത്. പോലീസിന്റെ കൃത്യനിർവഹണം തടസ്സപ്പെടുത്തിയതിനും ഉന്നത ഉദ്യോഗസ്ഥനെ മർദ്ദിച്ചതിനും കൃഷ്ണമോഹനും സുഹൃത്തുക്കൾക്കുമെതിരെ തിരുവല്ല പോലീസ് കേസ് രജിസ്റ്റർ ചെയ്തിട്ടുണ്ട്.
