അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പാർലമെന്റിൽ അവതരിപ്പിച്ച വനിതാ സംവരണ ബില്ലിന് പിന്നിൽ ബിജെപിയുടെ രാഷ്ട്രീയ അജണ്ടയാണെന്ന ആരോപണവുമായി സമാജ്വാദി പാർട്ടി അധ്യക്ഷനും ലോക്സഭാ എംപിയുമായ അഖിലേഷ് യാദവ് രംഗത്ത്. സ്ത്രീ ശാക്തീകരണത്തെക്കുറിച്ച് സംസാരിക്കുന്ന ബിജെപി ഭരിക്കുന്ന എത്ര സംസ്ഥാനങ്ങളിൽ നിലവിൽ വനിതാ മുഖ്യമന്ത്രിമാരുണ്ടെന്ന് അദ്ദേഹം ചോദിച്ചു. രാഷ്ട്രീയ നേട്ടങ്ങൾക്ക് വേണ്ടി മാത്രമാണ് കേന്ദ്ര സർക്കാർ ഈ ബില്ലിനെ ആയുധമാക്കുന്നതെന്നും അദ്ദേഹം വിമർശിച്ചു.
സ്ത്രീ ശാക്തീകരണം സമാജ്വാദി പാർട്ടിയുടെ അടിസ്ഥാന പ്രത്യയശാസ്ത്രങ്ങളിൽ ഒന്നാണെന്ന് വ്യക്തമാക്കിയ അഖിലേഷ്, ബിജെപിയിൽ നിന്ന് വ്യത്യസ്തമായി തന്റെ പാർട്ടി സ്ത്രീകൾക്ക് അർഹമായ സംഘടനാ പദവികൾ നൽകിയിട്ടുണ്ടെന്നും അവകാശപ്പെട്ടു. നിലവിൽ ബിജെപി കാണിക്കുന്ന അമിത തിടുക്കം വരാനിരിക്കുന്ന തിരഞ്ഞെടുപ്പുകൾ ലക്ഷ്യം വെച്ചുള്ള വോട്ട് ബാങ്ക് രാഷ്ട്രീയം മാത്രമാണെന്നും അദ്ദേഹം പരിഹസിച്ചു.
ലോക്സഭയിലും നിയമസഭകളിലും 33 ശതമാനം വനിതാ സംവരണം ഉറപ്പാക്കുന്നതിനുള്ള സുപ്രധാന ബില്ലുകൾ പാർലമെന്റിൽ അവതരിപ്പിച്ചതിന് പിന്നാലെയാണ് അഖിലേഷിന്റെ ഈ രൂക്ഷമായ പ്രതികരണം. ഭരണഘടനാ ഭേദഗതി ബിൽ (131-ാം ഭേദഗതി), ഡീലിമിറ്റേഷൻ ബിൽ 2026 തുടങ്ങിയവ പ്രത്യേക പാർലമെന്റ് സമ്മേളനത്തിന്റെ ആദ്യ ദിനത്തിൽ പരിഗണനയ്ക്ക് വന്നിരുന്നു. ഇതിൽ കൃത്യമായ വ്യക്തത വരുത്താതെ സർക്കാർ ബില്ലുമായി മുന്നോട്ട് പോകുന്നത് ദുരൂഹമാണെന്നും സമാജ്വാദി പാർട്ടി ആരോപിക്കുന്നു.
