അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ശങ്കരജയന്തി ആഘോഷങ്ങളുമായി ബന്ധപ്പെട്ട് പുറത്തിറക്കിയ വിവാദ സർക്കുലർ കാലടി സംസ്കൃത സർവകലാശാല പിൻവലിച്ചു. ഗവർണർ പങ്കെടുക്കുന്ന ചടങ്ങിൽ പാലിക്കേണ്ട പെരുമാറ്റച്ചട്ടങ്ങളെക്കുറിച്ച് പുറത്തിറക്കിയ നിർദ്ദേശങ്ങൾ വ്യാപകമായ വിമർശനത്തിന് ഇടയാക്കിയതോടെയാണ് അധികൃതരുടെ ഈ നടപടി.
ഗവർണറോടുള്ള ബഹുമാനസൂചകമായി ചടങ്ങിൽ പങ്കെടുക്കുന്നവർ പാലിക്കേണ്ട കർശനമായ നിബന്ധനകളാണ് സർക്കുലറിൽ ഉണ്ടായിരുന്നത്.
ഗവർണർ വരുമ്പോഴും മടങ്ങുമ്പോഴും എല്ലാവരും എഴുന്നേറ്റ് നിൽക്കണം, മൊബൈൽ ഫോണുകൾ നിർബന്ധമായും സൈലന്റ് മോഡിലാക്കണം തുടങ്ങിയ സാധാരണ നിർദ്ദേശങ്ങൾക്ക് പുറമെ, പ്രസംഗത്തിനിടെ അനാവശ്യ ചലനങ്ങൾ ഒഴിവാക്കണമെന്നും പ്രസംഗം കഴിയുമ്പോൾ കൈയടിക്കണമെന്നുമുള്ള നിർദ്ദേശങ്ങളാണ് വലിയ വിവാദത്തിന് തിരികൊളുത്തിയത്.
ഗവർണർ ഹാൾ വിട്ടുപോകുന്നതുവരെ ആരും പുറത്തിറങ്ങാൻ പാടില്ലെന്നും സർക്കുലറിൽ വ്യക്തമാക്കിയിരുന്നു. സർവകലാശാലയുടെ ഈ നടപടി വ്യക്തിസ്വാതന്ത്ര്യത്തിന്മേലുള്ള കടന്നുകയറ്റമാണെന്നും അനാവശ്യമായ കീഴ്വഴക്കങ്ങൾ അടിച്ചേൽപ്പിക്കുകയാണെന്നും ആരോപിച്ച് വിവിധ കോണുകളിൽ നിന്ന് പ്രതിഷേധം ഉയർന്നു.
ഇതോടെയാണ് സമ്മർദ്ദത്തിലായ സർവകലാശാല അധികൃതർ സർക്കുലർ പിൻവലിക്കാൻ തയ്യാറായത്.
