അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തൃശൂർ മുണ്ടത്തിക്കോട് വെടിക്കെട്ട് പുരയിലുണ്ടായ സ്ഫോടനത്തിൽ നിർണ്ണായക നിരീക്ഷണങ്ങളുമായി സംസ്ഥാന സർക്കാർ നിയോഗിച്ച ജുഡീഷ്യൽ കമ്മീഷൻ ചെയർമാൻ ജസ്റ്റിസ് സി.എൻ. രാമചന്ദ്രൻ നായർ. വെടിമരുന്നിന്റെ അമിതമായ ഉപയോഗവും സുരക്ഷാ മാനദണ്ഡങ്ങളിലെ ഗുരുതരമായ വീഴ്ചയുമാണ് അപകടത്തിന്റെ ആഘാതം വർദ്ധിപ്പിച്ചതെന്ന് അദ്ദേഹം മാധ്യമങ്ങളോട് പ്രതികരിച്ചു. ഔദ്യോഗികമായ ഉത്തരവ് ലഭിച്ചാലുടൻ സംഭവത്തിൽ സമഗ്രമായ അന്വേഷണം ആരംഭിക്കുമെന്നും അദ്ദേഹം വ്യക്തമാക്കി.
അപകടസ്ഥലം വിലയിരുത്തിയ ശേഷമായിരുന്നു കമ്മീഷന്റെ പ്രതികരണം. വെടിമരുന്ന് കൈകാര്യം ചെയ്യുന്നതിൽ വലിയ രീതിയിലുള്ള ചട്ടലംഘനം നടന്നിട്ടുണ്ടെന്ന് അദ്ദേഹം ചൂണ്ടിക്കാട്ടി. അനുവദനീയമായതിലും കൂടുതൽ വെടിമരുന്ന് ശേഖരിച്ചതാകാം ഇത്രയും വലിയ സ്ഫോടനത്തിലേക്ക് നയിച്ചത്. ഷെഡ്ഡുകൾ തമ്മിൽ നിശ്ചിത അകലം പാലിക്കാത്തതും വലിയ തിരിച്ചടിയായി. “ഷെഡ്ഡുകൾ അടുപ്പിച്ചല്ലായിരുന്നെങ്കിൽ ഒരു ഷെഡ്ഡിന് തീപിടിക്കുമ്പോൾ തന്നെ അത് നിയന്ത്രിക്കാമായിരുന്നു. ഇവിടെ ഉണ്ടായ അശ്രദ്ധയും മുൻകരുതലുകളുടെ അഭാവവുമാണ് ദുരന്തത്തിന്റെ വ്യാപ്തി കൂട്ടിയത്,” ജസ്റ്റിസ് രാമചന്ദ്രൻ നായർ പറഞ്ഞു.
വെടിക്കെട്ട് നിരോധിക്കണമെന്ന ആവശ്യത്തോട് കമ്മീഷൻ അനുകൂലമായല്ല പ്രതികരിച്ചത്. വെടിക്കെട്ട് ഉത്സവങ്ങളുടെ അവിഭാജ്യ ഘടകമാണെന്നും അത് ജനങ്ങളെ ആകർഷിക്കുന്ന ഒന്നാണെന്നും അദ്ദേഹം നിരീക്ഷിച്ചു. അതിനാൽ തന്നെ വെടിക്കെട്ട് പൂർണ്ണമായി തടയുന്നത് ശരിയായ നടപടിയായിരിക്കില്ല. പകരം സുരക്ഷിതമായ രീതിയിൽ അത് എങ്ങനെ നടത്താം എന്നതിലാകും കമ്മീഷൻ ശ്രദ്ധ കേന്ദ്രീകരിക്കുക. കേരളത്തിൽ ഇനി ഇത്തരം ആവർത്തിക്കാതിരിക്കാനുള്ള പ്രായോഗിക നിർദ്ദേശങ്ങളാകും സർക്കാർ സമർപ്പിക്കുന്ന റിപ്പോർട്ടിൽ ഉണ്ടാവുക.
ഫയർഫോഴ്സ് വാഹനങ്ങൾക്ക് പോലും എത്തിപ്പെടാൻ പ്രയാസമുള്ള സ്ഥലത്താണ് വെടിപ്പുര നിർമ്മിച്ചിരിക്കുന്നത് എന്നത് ഗൗരവകരമായ കാര്യമാണ്. തൃശൂർ പൂരമടക്കമുള്ള വെടിക്കെട്ടുകൾ ചൂട് കൂടിയ കാലാവസ്ഥയിലാണ് നടക്കുന്നത്. വെടിമരുന്നിന് ചൂട് കൂടിയാൽ തന്നെ സ്വയം തീപിടിക്കാനുള്ള സാധ്യതയുണ്ട്. ഇത്തരം സാഹചര്യങ്ങൾ മുൻകൂട്ടി കണ്ട് സുരക്ഷാ ക്രമീകരണങ്ങൾ ഒരുക്കുന്നതിൽ ഉദ്യോഗസ്ഥരുടെ ഭാഗത്ത് നിന്ന് വീഴ്ചയുണ്ടായോ എന്നും കമ്മീഷൻ പരിശോധിക്കും.
