അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പശ്ചിമ ബംഗാൾ നിയമസഭാ തിരഞ്ഞെടുപ്പിന്റെ രണ്ടാം ഘട്ട വോട്ടെടുപ്പ് നടക്കാനിരിക്കെ, തൃണമൂൽ കോൺഗ്രസിനെതിരെ രൂക്ഷവിമർശനവുമായി പ്രധാനമന്ത്രി നരേന്ദ്ര മോദി. നേതാജി സുഭാഷ് ചന്ദ്രബോസിന്റെ വിഖ്യാതമായ മുദ്രാവാക്യത്തെ ഓർമിപ്പിച്ചുകൊണ്ട്, ബംഗാളിനെ ഭയത്തിൽ നിന്നും അഴിമതിയിൽ നിന്നും മോചിപ്പിക്കുമെന്ന വാഗ്ദാനമാണ് പ്രധാനമന്ത്രി നൽകിയത്. മധുവ മേഖലയിൽ നടന്ന ആവേശകരമായ തിരഞ്ഞെടുപ്പ് റാലിയിൽ സംസാരിക്കുകയായിരുന്നു അദ്ദേഹം.
”നിങ്ങൾ എനിക്ക് രക്തം തരൂ, ഞാൻ നിങ്ങൾക്ക് സ്വാതന്ത്ര്യം തരാം” എന്ന നേതാജിയുടെ വാക്കുകൾ ഉദ്ധരിച്ചുകൊണ്ടായിരുന്നു പ്രധാനമന്ത്രിയുടെ പ്രസംഗം. നേതാജിയുടെ ആഹ്വാനം കേട്ട് രാജ്യം ഒന്നടങ്കം പോരാട്ടത്തിനിറങ്ങിയ ചരിത്രം അദ്ദേഹം അനുസ്മരിച്ചു. ഇതിന് സമാനമായി, ബംഗാളിന്റെ മോചനത്തിനായി ജനങ്ങൾ ബിജെപിക്ക് വോട്ട് നൽകണമെന്നും, പകരം തൃണമൂൽ കോൺഗ്രസിന്റെ ‘മഹാജംഗിൾ രാജിൽ’ നിന്ന് താൻ സ്വാതന്ത്ര്യം നൽകാമെന്നും മോദി പ്രഖ്യാപിച്ചു.
തൃണമൂൽ കോൺഗ്രസ് ഭരണത്തിന് കീഴിൽ ബംഗാൾ നേരിടുന്ന വിവിധ പ്രശ്നങ്ങൾ പ്രധാനമന്ത്രി അക്കമിട്ടു നിരത്തി. അഴിമതി, ഭയപ്പെടുത്തൽ, സ്ത്രീകൾക്കെതിരായ അതിക്രമങ്ങൾ എന്നിവയിൽ നിന്ന് ബംഗാളിനെ മോചിപ്പിക്കുമെന്ന് അദ്ദേഹം പറഞ്ഞു.
ബുധനാഴ്ച നടക്കുന്ന നിർണ്ണായകമായ രണ്ടാം ഘട്ട വോട്ടെടുപ്പിന് മുന്നോടിയായുള്ള പ്രചാരണത്തിന്റെ അവസാന ഘട്ടത്തിലാണ് പ്രധാനമന്ത്രി ഈ ആഹ്വാനം നടത്തിയത്. തൃണമൂലിന്റെ ഗുണ്ടാരാജിന് അന്ത്യം കുറിക്കാനുള്ള അവസരമാണിതെന്ന് അദ്ദേഹം വോട്ടർമാരെ ഓർമിപ്പിച്ചു. “ഇത് മോദിയുടെ ഉറപ്പാണ്” എന്ന് പ്രഖ്യാപിച്ചുകൊണ്ടാണ് അദ്ദേഹം പ്രസംഗം അവസാനിപ്പിച്ചത്.
