അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മുന് തിരുവനന്തപുരം ജില്ലാ കളക്ടറും, KSRTC MDയുമായിരുന്ന ബിജു പ്രഭാകര് എഴുതിയ നാം നമ്മെ കൊള്ളയടിക്കുമ്പോള് എന്ന പുസ്തകം പ്രകാശനം ചെയ്തു. തിരുവനന്തപുരത്ത് വെച്ച് നടന്ന ചടങ്ങില് മുന് ഡിജിപി എ. ഹേമചന്ദ്രന് മുന് ഡിജിപി എസ്. അനന്ത കൃഷ്ണന് നല്കിയാണ് പ്രകാശനം നിര്വ്വഹിച്ചത്. ബിജു പ്രഭാകര് ഐഎഎസ് തന്റെ സര്വീസ് കാലഘട്ടത്തിലെ അനുഭവങ്ങള് തുറന്നെഴുതിയതാണ് ‘നാം നമ്മെ കൊള്ളയടിക്കുമ്പോള്’ എന്ന പുസ്തകത്തിന്റെ ഉള്ളടക്കം. കാലാകാലങ്ങളായി സര്ക്കാര് സര്വീസില് നടക്കുന്ന അഴിമതിയും സ്വജനപക്ഷപാതവും, താന് കണ്ടതും കേട്ടതുമായ പകല് കൊള്ളകളുടെ നേര് സാക്ഷ്യങ്ങളും തുറന്നെഴുതുന്ന പുസ്തകമാണ് നാം നമ്മെ കൊള്ളയടിക്കുമ്പോള്.
അംഗനവാടി മുതല് കോടതി കെട്ടിടങ്ങളുടെ നിര്മ്മാണത്തില് വരെ നടക്കുന്ന അഴിമതി, ഗ്രന്ഥത്തില് വിവരിക്കുന്നു. 2018ലെ മഹാപ്രളയം മനുഷ്യനിര്മ്മിതമാണെന്നും, കോവിഡ് സമയത്തെ പര്ച്ചേഴ്സുകളിലും, മെഡിക്കല് സര്വീസ് കോര്പ്പറേഷനിലെയും പൊതുമരാമത്തിലെയും അഴിമതികളും, പട്ടയം വിതരണത്തിലെയും ഭൂമി തരം മാറ്റലുകളിലെയും ക്രമക്കേടുകളും, സ്റ്റാര് ഹോട്ടലുകളോട് ചേര്ന്ന് ലോക്കല് ബാറുകള് പിറവിയെടുത്തതിന്റെ പിന്നാമ്പുറ കഥകളും ബിജു പ്രഭാകര് പുസ്തകത്തില് വിവരിക്കുന്നുണ്ട്. ട്രേഡ് യൂണിയനുകളുടെ അതിപ്രസരം മൊത്തം സംവിധാനത്തെ ഹൈജാക്ക് ചെയ്യുന്നതിന്റെ നേര്ക്കാഴ്ചകളും പുസ്തകത്തില് വായിക്കാം.
രാഷ്ട്രീയക്കാരും, ഉദ്യോഗസ്ഥരും ചേര്ന്നുള്ള അഴിമതിക്കെതിരെ പൗരന്മാര് സ്വയം തിരുത്തല് ശക്തി ആകുമ്പോഴേ സാമൂഹിക പ്രതിരോധത്തിനുള്ള മാര്ഗ്ഗം തുറന്ന് കിട്ടുകയുള്ളൂവെന്ന് പുസ്തകം പ്രകാശനം ചെയ്തു കൊണ്ട് എ ഹേമ ചന്ദ്രന് പറഞ്ഞു. സിവില് സര്വ്വന്റുകള് അധികാര കേന്ദ്രമല്ല, പൊതുജന സേവകരാണെന്ന ബോധം വളര്ത്തേണ്ടത് സമൂഹത്തിന്റെ കെട്ടുറപ്പിന് ആവശ്യമാണെന്നും അദ്ദേഹം പറഞ്ഞു. സര്ക്കാര് സേവനങ്ങള് ഡിജിറ്റി ലൈസ് ചെയ്യുന്നതോടെ ഓരോ ഫയലുകളിലെ വിവരങ്ങള് അപേക്ഷകര്ക്ക് നേരിട്ട് മനസിലാക്കാന് കഴിയുന്നത്പോലെയുള്ള സുതാര്യത എല്ലാ വകുപ്പുകളും വ്യാപിപ്പിച്ചാല് അഴിമതി തടയാന് കഴിയുമെന്നും ഫയലുകള് വെച്ച് താമസിപ്പിക്കുന്നവര്ക്ക് താക്കീതാ കുമെന്നും പുസ്തകം ഏറ്റുവാങ്ങിയ എസ് അനന്ത കൃഷ്ണന് പറഞ്ഞു.
ഭരണഘടന ഉറപ്പു നല്കുന്ന അഭിപ്രായ സ്വാതന്ത്ര്യം ഉപയോഗിച്ച് ഉദ്യോഗസ്ഥര്ക്ക് ഫയലുകളിലെ വിവരങ്ങള് തുറന്ന് പറയാനുള്ള സാഹചര്യം ഉണ്ടാകുന്നതോടെ സംവിധാനങ്ങളുടെ ഗുണ മേന്മ വര്ദ്ധിക്കുമെന്ന് പുസ്തകം പരിചയപ്പെടുത്തി കൊണ്ട് പ്രശാന്ത് നായര് ഐ എ എസ് പറഞ്ഞു. നികുതി ഭാരം പൗരന്റെ പുറത്ത് വെച്ച് സര്ക്കാര് സുഗമമായി പോകുന്ന സംവിധാനമാണ് ഇവിടെയുള്ളത്. വിവരാവകാശ നിയമത്തിന്റെ സാധ്യതകള് ഉപയോഗിച്ച് സാമൂഹിക മാറ്റം ഉണ്ടാക്കുന്നതിനുള്ള ആത്മവിശ്വാസം പകരുന്നതാണ് ഈ പുസ്തകമെന്നും അദ്ദേഹം പറഞ്ഞു. ചടങ്ങില് ആദിത്യവര്മ്മ, തോമസ് ഡൊമനിക് തുടങ്ങിയവര് പങ്കെടുത്തു.
