അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.റിപ്പബ്ലിക് ദിനത്തിന്റെ ഭാഗമായി പ്രഖ്യാപിച്ച പത്മഭൂഷണ് ബഹുമതി മലയാളത്തിന്റെ പ്രിയതാരം മമ്മൂട്ടി ഏറ്റുവാങ്ങി. രാഷ്ട്രപതി ഭവനില് നടന്ന ചടങ്ങില് രാഷ്ട്രപതി ദ്രൗപതി മുര്മു ബഹുമതി സമ്മാനിച്ചു. പദ്മഭൂഷണ് അര്ഹനായ എസ്.എന്.ഡി.പി യോഗം ജനറല് സെക്രട്ടറി വെള്ളാപ്പള്ളി നടേശനും പുരസ്കാരം ഏറ്റുവാങ്ങി. ചടങ്ങിനായി കഴിഞ്ഞ ദിവസം മമ്മൂട്ടി കുടുംബസമേതം ഡല്ഹിയില് എത്തിയിരുന്നു. പ്രധാനമന്ത്രി നരേന്ദ്ര മോദിയെയും ലോക്സഭ സ്പീക്കര് ഓം ബിര്ളയെയും ആഭ്യന്തരമന്ത്രി അമിത് ഷായെയും കൈകൂപ്പി അഭിവാദ്യം ചെയ്ത ശേഷമാണ് മമ്മൂട്ടി രാഷ്ട്രപതിക്കരികിലേക്ക് നടന്നത്. കെ.ടി തോമസ്, പി. നാരായണനും പത്മവിഭൂഷണ് രാഷ്ട്രപതിയില് നിന്ന് സ്വീകരിച്ചു.
1998ല് രാജ്യം മമ്മൂട്ടിയെ പദ്മശ്രീ നല്കി ആദരിച്ചിട്ടുണ്ട്. പദ്മഭൂഷന്റെ തിളക്കത്തിലെത്തുന്നത് 28 വര്ഷത്തിനു ശേഷമാണ്. മികച്ച നടനുള്ള ഏഴു പുരസ്ക്കാരമുള്പ്പെടെ 10 സംസ്ഥാന അവാര്ഡുകള് അദ്ദേഹം നേടിയിട്ടുണ്ട്. മികച്ച നടനുള്ള ദേശീയ പുരസ്കാരം മൂന്നു തവണയും അദ്ദേഹത്തെ തേടിയെത്തി. കഴിഞ്ഞവര്ഷത്തെ മികച്ച നടനുള്ള സംസ്ഥാന പുരസ്കാരം ഏറ്റുവാങ്ങുന്ന അതേ ദിവസമാണ് പദ്മഭൂഷണ് പുരസ്ക്കാര വാര്ത്തയെത്തുന്നത്. പദ്മഭൂഷണ് പുരസ്ക്കാര സ്വീകരണത്തിനെത്തിയ മമ്മൂട്ടിയും കുടുംബവും പ്രധാനമന്ത്രിയെയും സന്ദര്ശിച്ചിരുന്നു. മമ്മൂട്ടിക്കും കുടുംബത്തിനുമൊപ്പമുള്ള ചിത്രം സമൂഹ മാധ്യമത്തില് പങ്ക് വച്ച് പ്രധാനമന്ത്രി നരേന്ദ്ര മോദി.
‘ഇന്ന് നടന്ന പത്മ പുരസ്കാര ചടങ്ങിന് ശേഷം പ്രശസ്ത നടന് മമ്മൂട്ടിയെയും അദ്ദേഹത്തിന്റെ കുടുംബത്തെയും കണ്ടുമുട്ടി. മമ്മൂട്ടിയ്ക്ക് ഹൃദയം നിറഞ്ഞ അഭിനന്ദനങ്ങള്. ഇന്ത്യന് സിനിമയ്ക്ക് നല്കിയ അതുല്യമായ സംഭാവനകള്ക്ക് ലഭിച്ച ഈ അംഗീകാരം രാജ്യത്തിന് അഭിമാനകരമാണ്.’ മമ്മൂട്ടി, ഭാര്യ സുള്ഫത്ത്, മകള് സുറുമി, മകന് ദുല്ഖര് സല്മാന്, ഭാര്യ അമാല് സൂഫിയ എന്നിവര്ക്കൊപ്പമുള്ള ചിത്രങ്ങള് പങ്ക് വച്ച് നരേന്ദ്ര മോദി കുറിച്ചു.
ഇന്ത്യന് സിനിമയ്ക്കും കലയ്ക്കും നല്കിയ സമഗ്ര സംഭാവനകള് മാനിച്ച് രാജ്യത്തെ മൂന്നാമത്തെ ഏറ്റവും ഉയര്ന്ന സിവിലിയന് ബഹുമതിയാണ് ‘പത്മഭൂഷണ്’. അഞ്ച് പതിറ്റാണ്ടിലേറെ നീണ്ട അഭിനയ ജീവിതത്തിലും, നാല് നൂറിലധികം ചിത്രങ്ങളിലെ മികച്ച പ്രകടനത്തിനുമാണ് ഈ അംഗീകാരം. 1998-ല് രാജ്യം അദ്ദേഹത്തെ പത്മശ്രീ നല്കിയും ആദരിച്ചിട്ടുണ്ട്. ഭാര്യ സുല്ഫത്ത്, മകള് സുറുമി, മകനും നടനുമായ ദുല്ഖര് സല്മാന് എന്നിവരും നടനൊപ്പമുണ്ടായിരുന്നു. പുരസ്കാരം ഏറ്റുവാങ്ങുന്നതിനായി കഴിഞ്ഞ ദിവസം മമ്മൂട്ടി കുടുംബസമേതം ഡല്ഹിയില് എത്തിയിരുന്നു.
ഡല്ഹി വിമാനത്താവളത്തില് നിന്നുള്ള ഇവരുടെ ചിത്രങ്ങള് സോഷ്യല് മീഡിയയില് നേരത്തെ തരംഗമായിരുന്നു. പത്മവിഭൂഷണ്, ഏഴ് പത്മഭൂഷണ്, 56 പത്മശ്രീ എന്നിവയുള്പ്പെടെ 65 പുരസ്കാരങ്ങളാണ് ഇന്ന് വിതരണം ചെയ്തത്. രാജ്യത്തെ പരമോന്നത സിവിലിയന് ബഹുമതികളിലൊന്നായ പത്മ പുരസ്കാരങ്ങള് വിവിധ മേഖലകളില് മികച്ച സംഭാവനകള് നല്കിയ പ്രതിഭകള്ക്കാണ് നല്കുന്നത്. മമ്മൂട്ടിക്കും വി എസ് അച്യുതാനന്ദനും വെള്ളാപ്പള്ളി നടേശനും പുരസ്കാരങ്ങളുണ്ട്. മരണാനന്തര ബഹുമതിയായാണ് വി.എസിന് പത്മവിഭൂഷണ് ലഭിച്ചിരിക്കുന്നത്. മുന് സുപ്രീംകോടതി ജഡ്ജി കെ.ടി തോമസിന് പത്മവിഭൂഷണും ലഭിച്ചു.
