അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.പകല് സമയങ്ങളില് ചുരുങ്ങിയ വിലക്ക് ലഭ്യമാകുന്ന വൈദ്യുതിയും സൗരോര്ജ്ജ വൈദ്യുതിയും ഉപയോഗിച്ച് താഴെയുള്ള അണക്കെട്ടില് നിന്നും മുകളിലുള്ള അണക്കെട്ടിലേക്ക് ജലം പമ്പ് ചെയ്ത് കയറ്റുകയും വൈദ്യുതിക്ഷാമം നേരിടുന്ന രാത്രികാലങ്ങളില് മുകളില് സംഭരിച്ച ജലം ഉപയോഗിച്ച് ടര്ബൈനുകള് കറക്കി വൈദ്യുതി ഉത്പാദിപ്പിക്കുന്ന സാങ്കേതികവിദ്യയാണ് പമ്പ്ഡ് സ്റ്റോറേജ് പദ്ധതികള്. മലബാര് മേഖലയിലെ വൈദ്യുതി ക്ഷാമം ശാശ്വതമായി പരിഹരിക്കുന്നത് ലക്ഷ്യമിട്ട് കോഴിക്കോട് ജില്ലയില് കക്കയം-കുറ്റ്യാടി ഡാമുകളെ അടിസ്ഥാനപ്പെടുത്തി രൂപകല്പന നിര്വഹിക്കുന്ന പദ്ധതിയാണ് കക്കയം പമ്പ്ഡ് സ്റ്റോറേജ് പദ്ധതി.
പദ്ധതിയുടെ പ്രാരംഭ സാധ്യത പഠനങ്ങള് കെഎസ്ഇബിഎല് ഇന്വെസ്റ്റിഗേഷന് വിഭാഗം നിര്വഹിച്ചിട്ടുണ്ട്. 800 മുതല് 1000 മെഗാവാട്ട് വരെ സ്ഥാപിത ശേഷിക്ക് ഇവിടം അനുയോജ്യമാണ്. വിശദമായ ഭൗമ-സാങ്കേതിക പഠനങ്ങളും പദ്ധതി രൂപരേഖയും ഡിപിആര് തയ്യാറാക്കുന്ന ജോലികളും നിര്വഹിക്കുന്നതിനായി ബാംഗ്ലൂര് ആസ്ഥാനമായി പ്രവര്ത്തിക്കുന്ന ടാറ്റ കണ്സള്ട്ടിംഗ് എന്ജിനീയേഴ്സ് ലിമിറ്റഡിനെ ചുമതലപ്പെടുത്തി. പ്രസ്തുത കരാര് ഇന്ന് (24-06-2026) തിരുവനന്തപുരം വൈദ്യുതി ഭവനില് വെച്ച് കെഎസ്ഇബിഎല് നു വേണ്ടി ചീഫ് എന്ജിനീയര് പ്രോജക്ട് പ്ലാനിങ്ങിന്റെ ചുമതല വഹിക്കുന്ന മഞ്ജു അസീസും ടിസിഇ ക്കു വേണ്ടി ബി എല് റാവുവും ഒപ്പുവച്ചു.
ഡയറക്ടര് ജനറേഷന് സിവില് ചുമതല വഹിക്കുന്ന രാജന് എം പി സന്നിഹിതനായിരുന്നു. 15 മാസങ്ങള് കൊണ്ട് സര്വ്വേയും ഭൗമ പര്യവേഷണങ്ങളും പൂര്ത്തിയാക്കി റിപ്പോര്ട്ട് തയ്യാറാക്കാന് ആണ് ലക്ഷ്യമിടുന്നത്. തുടര്ന്ന് സെന്ട്രല് ഇലക്ട്രിസിറ്റി അതോറിറ്റിയില് നിന്നുള്ള അനുമതികളും പാരിസ്ഥിതി വന അനുമതികളും ലഭിച്ചതിനുശേഷം 2029 ഓടെ പദ്ധതി നിര്മ്മാണം ആരംഭിക്കാന് സാധിക്കുന്നതാണ്.
