അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ജാര്ഖണ്ഡില് മൊബൈലും പണവും മോഷ്ടിച്ചുവെന്ന് ആരോപിച്ച് ദലിത് വിദ്യാര്ഥിയെ ആക്രമിച്ച് സഹവിദ്യാര്ഥികള്. വിദ്യാര്ഥിയെ നാല് മണിക്കൂറോളം പ്രതികള് ലൈംഗികമായി ഉപദ്രവിക്കുകയും ഭീഷണിപ്പെടുത്തുകയുമായിരുന്നു. സംസ്ഥാനത്തെ ഒരു റെസിഡന്ഷ്യല് സ്കൂളിലാണ് സംഭവം. ജൂലൈ 14ന് രാത്രി ഉറങ്ങിക്കിടക്കുകയായിരുന്ന 16കാരനെ പ്രതികള് വായ മൂടിക്കെട്ടി വലിച്ചിഴച്ച് മറ്റൊരു മുറിയിലേക്ക് മാറ്റുകയായിരുന്നു. ശേഷം മൂന്ന് പേര് ബെല്റ്റ് ഉപയോഗിച്ച് തല്ലിയതായും മറ്റുള്ളവര് അത് മൊബൈലില് പകര്ത്തിയതായും വിദ്യാര്ഥി ഇന്ത്യന് എക്സ്പ്രസിനോട് പറഞ്ഞു. മുറിവുകളില് ഉപ്പ് പുരട്ടി അക്രമിച്ചുവെന്നും ലൈംഗികമായി പീഡിപ്പിക്കുമെന്ന് ഭീഷണിപ്പെടുത്തിയതായും മൊഴിയില് പറയുന്നുണ്ട്. ജാതി അധിക്ഷേപം നേരിട്ടതായും സംഭവിച്ച കാര്യങ്ങള് പുറത്തുപറഞ്ഞാല് കൊന്നുകളയുമെന്ന ഭീഷണി ഉണ്ടായിരുന്നുവെന്നും വിദ്യാര്ഥി പറഞ്ഞു.
സംഭവത്തില് ആറ് പേര്ക്കെതിരെ പൊലീസ് എഫ്.ഐ.ആര് രജിസ്റ്റര് ചെയ്തു. എന്നാല് ഇതുവരെ ആരെയും അറസ്റ്റ് ചെയ്തിട്ടില്ല. അതേസമയം 16കാരനെ ആക്രമിച്ച മുഴുവന് വിദ്യാര്ഥികളെയും സ്കൂള് സസ്പെന്ഡ് ചെയ്തു. നിലവില് 16കാരന് ആശുപത്രിയില് ചികിത്സയില് തുടരുകയാണ്. മകന് ഇതിനുമുമ്പും ജാതി അധിക്ഷേപം നേരിട്ടുണ്ടെന്ന് വിദ്യാര്ഥിയുടെ പിതാവ് പറയുന്നു. പ്രതികള്ക്കെതിരെ പട്ടികജാതി-പട്ടികവര്ഗ (അതിക്രമങ്ങള് തടയല്) നിയമപ്രകാരം കേസെടുക്കണമെന്നാണ് കുടുംബത്തിന്റെ ആവശ്യം. പ്രതികളെ ഉടന് അറസ്റ്റ് ചെയ്യണമെന്നും കുടുംബം ആവശ്യപ്പെട്ടു. സംഭവത്തില് അന്വേഷണം നടക്കുകയാണെന്ന് പൊലീസ് അറിയിച്ചു.
