അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കോക്രോച്ച് ജനാതാ പാര്ട്ടിയുടെ സമരം വിജയിച്ചതിനു പിന്നാലെ പ്രധാനമന്ത്രി നരേന്ദ്രമോദിക്കെതിരേ സോഷ്യല് മീഡിയകളില് പലരും പോസ്റ്റ് ചെയ്തിട്ടുള്ള പോസ്റ്റുകള് നീക്കം ചെയ്യാനാവശ്യപ്പെട്ട് ഡെല്ഹി പോലീസ്. വിവിധ സോഷ്യല് മീഡിയ പ്ലാറ്റ്ഫോമുകള്ക്കാണ് പോലീസിന്റെ നോട്ടീസ് ലഭിച്ചിരിക്കുന്നത്. പ്രതിഷേധത്തിനിടെ അപ്ലോഡ് ചെയ്ത നിരവധി പോസ്റ്റുകളിലാണ് പൊലീസ് വിശദീകരണം തേടിയത്. പ്രധാനമന്ത്രിക്കെതിരായ അധിക്ഷേപ പരാമര്ശങ്ങള് കണ്ടെത്തിയതിനെ തുടര്ന്നാണ് നടപടി.
ഡല്ഹി പൊലീസിന്റെ സോഷ്യല് മീഡിയ നിരീക്ഷണ വിഭാഗമാണ് ഇത്തരം പോസ്റ്റുകള് കണ്ടെത്തിയത്. പൊലീസിന്റെ നിര്ദ്ദേശത്തെ തുടര്ന്ന് പല പോസ്റ്റുകളും ഇതിനോടകം നീക്കംചെയ്തിട്ടുണ്ട്. ഇത്തരം പോസ്റ്റുകള് പങ്കുവെച്ചവരെ കണ്ടെത്താനുള്ള അന്വേഷണം ആരംഭിച്ചിട്ടുണ്ടെന്നും പൊലീസ് പറഞ്ഞു. പ്രധാനമന്ത്രിക്കെതിരായ പോസ്റ്റുകള് നീക്കം ചെയ്തതിന് ശേഷം ശക്തമായ നിരീക്ഷണം തുടരാനാണ് ഡല്ഹി പൊലീസിന്റെ തീരുമാനം. പ്രതിഷേധങ്ങളുമായി ബന്ധപ്പെട്ട വ്യാജ (ഡീപ്ഫേക്ക്), എ.ഐ-നിര്മ്മിത ഉള്ളടക്കങ്ങള് പങ്കുവെച്ചതായി ആരോപിക്കപ്പെടുന്ന ഏകദേശം 450 സോഷ്യല് മീഡിയ അക്കൗണ്ടുകളെയും തിരിച്ചറിഞ്ഞിട്ടുണ്ട് എന്നാണ് പൊലീസ് പറയുന്നത്.
ഈ അക്കൗണ്ടുകള് ബ്ലോക്ക് ചെയ്യാന് അതത് സോഷ്യല് മീഡിയ പ്ലാറ്റ്ഫോമുകളോട് നിര്ദേശിച്ചിട്ടുണ്ടെന്ന് ഉദ്യോഗസ്ഥന് പറഞ്ഞു. കേന്ദ്ര വിദ്യാഭ്യാസ മന്ത്രി ധര്മേന്ദ്ര പ്രധാന്റെ രാജി ഉള്പ്പെടെയുള്ള ആവശ്യങ്ങള് സര്ക്കാര് അംഗീകരിച്ചതിനെ തുടര്ന്ന്, 36 ദിവസം നീണ്ടുനിന്ന പ്രതിഷേധം ശനിയാഴ്ച സി.ജെ.പി പിന്വലിച്ചിരുന്നു. ജൂലൈ 20ന് നടന്ന ‘സംസദ് ചലോ’ മാര്ച്ചിനിടെ ഡല്ഹി പൊലീസ് ഉദ്യോഗസ്ഥരും വിദ്യാര്ഥികളും തമ്മില് ഏറ്റുമുട്ടല് നടക്കുകയും ഇരുവിഭാഗത്തിലും പെട്ട നിരവധി പേര്ക്ക് പരിക്കേല്ക്കുകയും ചെയ്തതിന് ദിവസങ്ങള്ക്ക് ശേഷമാണിത്. അക്രമവുമായി ബന്ധപ്പെട്ട് ഡല്ഹി പൊലീസ് പിന്നീട് 15 എഫ്.ഐ.ആറുകള് രജിസ്റ്റര് ചെയ്തിരുന്നെങ്കിലും, തുടര്ന്ന് അവ പിന്വലിക്കാന് തീരുമാനിക്കുകയായിരുന്നു.
അതേസമയം, പ്രധാനമന്ത്രിയുടെ വസതിക്ക് മുന്നിലെ പ്രതിഷേധത്തില് രാഹുല് ഗാന്ധിക്കെതിരെ കേസ് രജിസ്റ്റര് ചെയ്തു. അതീവ സുരക്ഷാമേഖലയില് അനുമതിയില്ലാതെ പ്രതിഷേധം സംഘടിപ്പിച്ചെന്ന് ചൂണ്ടിക്കാട്ടി രണ്ട് എഫ്ഐആറാണ് ഡല്ഹി പൊലീസ് രജിസ്റ്റര് ചെയ്തത്.
