അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.യുദ്ധം അങ്ങനെയാണ്. എതിരാളിയെ തോക്കും ബോംബും മിസൈലുകളും അണുവായുധങ്ങളും ഉപയോഗിച്ച് തകര്ത്തു തരിപ്പണമാക്കുമ്പോള് വിജയിക്കുമെന്ന് തോന്നുമെങ്കിലും സ്വയം ഇല്ലാതാകുന്നത് അറിയാതെ പോകും. എതിരാളിക്കു മേല് തീ തുപ്പുന്ന സമയത്തും, സ്വന്തം പട്ടാളക്കാര് അനുഭവിക്കുന്ന താവ്രമായ സമ്മര്ദ്ദങ്ങളും ഏകാന്തതയും മാനവസികാരോഗ്യ പ്രശ്നങ്ങളും ചെറുതല്ല. അത് ബോംബിനേക്കാളും ഭയാനകമാണ്. വിജയിക്കാന് ഏതറ്റം വരെയും പോകുന്ന അമേരിക്കന് സൈന്യത്തിനും ഇതേ അവസ്ഥയാണ് ഉണ്ടായിരിക്കുന്നത്. മാസങ്ങളായി തുടരുന്ന ഇറാന് യുദ്ധത്തില് പങ്കെടുത്ത അമേരിക്കന് യുദ്ധക്കപ്പലിലെ സൈനികര് ഇപ്പോള് അനുഭവിക്കുന്നത് മരണതുല്യമായ മാനസികാവസ്ഥ ആണെന്നാണ് പുറത്തു വരുന്ന റിപ്പോര്ട്ടുകള്.
യു.എസ് വിമാനവാഹിനിക്കപ്പലായ ‘യുഎസ്എസ് എബ്രഹാം ലിങ്കന്’ പശ്ചിമേഷ്യയില് ദീര്ഘകാലമായി തുടരുന്നത് ജീവനക്കാരുടെ മാനസിക ആരോഗ്യത്തെ ബാധിച്ചിട്ടുണ്ടെന്നാണ് സൂചനകള്. കപ്പലിനു പകരക്കാരനായി ‘യു.എസ്.എസ് ജോര്ജ് വാഷിങ്ടന്’ എന്ന വിമാനവാഹിനിക്കപ്പല് പശ്ചിമേഷ്യയിലേക്ക് അയയ്ക്കാന് അമേരിക്ക തീരുമാനിച്ചു. യു.എസ്.എസ് ജോര്ജ് വാഷിങ്ടന് ഇന്ത്യന് മഹാസമുദ്രത്തിലേക്ക് നീങ്ങുകയാണെന്ന് യുഎസ് നാവികസേനയുടെ പ്രസ്താവനകള് വ്യക്തമാക്കുന്നു. മുന്കൂട്ടി തയാറാക്കിയ യാത്രയെന്നാണ് യുഎസ് ഉദ്യോഗസ്ഥര് ഒരു മാധ്യമത്തിനോട് പറഞ്ഞത്.
കടലില് 250 ദിവസത്തിലധികം പിന്നിട്ടതോടെ കപ്പലിലെ നാവികര് കടുത്ത മാനസിക സമ്മര്ദ്ദവും മോശം ജീവിത സാഹചര്യങ്ങളും നേരിടുന്നതായി മാധ്യമ റിപ്പോര്ട്ടുകളുണ്ടായിരുന്നു. കുടുംബാംഗങ്ങളും ജനപ്രതിനിധികളും ഇതില് ആശങ്ക രേഖപ്പെടുത്തിയതോടെയാണ് നടപടി. ചില നാവികര് കപ്പലില്നിന്ന് കടലിലേക്ക് ചാടാന് ശ്രമിച്ചതായും ഇവരെ സഹപ്രവര്ത്തകന് തടഞ്ഞതായും റിപ്പോര്ട്ടുകളുണ്ട്. ആണവോര്ജത്തില് പ്രവര്ത്തിക്കുന്ന ഈ വിമാനവാഹിനിക്കപ്പലിലെ 5,000ത്തോളം വരുന്ന നാവികരും മറൈനുകളും കഴിഞ്ഞവര്ഷം നവംബര് 21നാണ് പസഫിക് മേഖലയിലെ വിന്യാസത്തിനായി പുറപ്പെട്ടത്. ഫെബ്രുവരി 28ന് ഇറാനുമായി യു.എസ് യുദ്ധം ആരംഭിച്ചതോടെ കപ്പല് പശ്ചിമേഷ്യയിലേക്ക് വഴിതിരിച്ചുവിട്ടു.
കപ്പല് ഇപ്പോള് തുറമുഖങ്ങളിലൊന്നും അടുപ്പിക്കാതെ തുടര്ച്ചയായി 200ലധികം ദിവസങ്ങള് പൂര്ത്തിയാക്കിയതായി ജനപ്രതിനിധികള് പറയുന്നു. ഇത് ജീവനക്കാര്ക്ക് മാനസിക ബുദ്ധിമുട്ടുകള് സൃഷ്ടിക്കുന്നുണ്ട്. അത്യാവശ്യ സാധനങ്ങളുടെ ക്ഷാമവും മോശം ജീവിതസാഹചര്യങ്ങളും ബന്ധുക്കള് ചൂണ്ടിക്കാട്ടി. കേടായ ടോയ്ലറ്റുകള്, ചൂടുവെള്ളം ലഭിക്കാത്തത്, സാധനങ്ങളുടെയും ഭക്ഷണത്തിന്റെയും ക്ഷാമം എന്നിവയെക്കുറിച്ച് പരാതിയുണ്ട്. എബ്രഹാം ലിങ്കണില് മാനസികാരോഗ്യ പ്രതിസന്ധി രൂക്ഷമാകുന്നുവെന്ന അവകാശവാദങ്ങളെ യു.എസ് നാവികസേന തള്ളി.
