അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കോഴിക്കോട്: വടക്കൻ കേരളത്തിലെ ജർമ്മൻ ഭാഷാ പഠിതാക്കൾക്കായി ഗോയ്ഥെ-സെന്റർ തിരുവനന്തപുരം തങ്ങളുടെ പുതിയ പരീക്ഷാ കേന്ദ്രം കോഴിക്കോട്ട് പ്രവര്ത്തനം തുടങ്ങി. ഗോവിന്ദപുരം ലുലു മാളിന് സമീപമുള്ള ടി ടി അവന്യൂവിലാണ് കേന്ദ്രം പ്രവര്ത്തിക്കുന്നത്. അന്താരാഷ്ട്ര തലത്തിൽ വൻ സ്വീകാര്യതയുള്ള ജർമ്മൻ ഭാഷാ സർട്ടിഫിക്കറ്റ് പരീക്ഷകൾ മലബാർ മേഖലയിലുള്ളവർക്ക് ഇനി മുതല് എളുപ്പത്തിൽ എഴുതാം.
നഗരത്തില് നടന്ന ചടങ്ങില് ന്യൂഡല്ഹിയിലെ ഗോയ്ഥെ ഇൻസ്റ്റിറ്റ്യൂട്ട് മാക്സ് മുള്ളര് ഭവനിലെ സൗത്ത് ഏഷ്യ വിഭാഗം ലാംഗ്വേജ് പ്രോഗ്രാം ഡയറക്ടര് ഡോ. അലക്സാന്ഡ്ര മിറ്റ്ലര് സെന്ററിന്റെ ഔപചാരിക ഉദ്ഘാടനം നിര്വഹിച്ചു.
ഉന്നതവിദ്യാഭ്യാസത്തിനും തൊഴിൽ അവസരങ്ങൾക്കുമായി ജർമ്മൻ ഭാഷ പഠിക്കുന്ന വിദ്യാർത്ഥികളുടെയും യുവ പ്രൊഫഷണലുകളുടെയും വർദ്ധിച്ചുവരുന്ന ആവശ്യകത പരിഗണിച്ചാണ് പുതിയ സെന്റര് ആരംഭിച്ചിട്ടുള്ളത്..
ജർമ്മനിയിലെ ഔദ്യോഗിക സാംസ്കാരിക സ്ഥാപനമായ ഗോയ്ഥെ-ഇൻസ്റ്റിറ്റ്യൂട്ടിന്റെ ഭാഷാ പരീക്ഷകൾക്ക് ആഗോളതലത്തിൽ മികച്ച അംഗീകാരമാണുള്ളത്. യൂറോപ്യൻ കോമൺ ഫ്രെയിംവർക്ക് ഓഫ് റഫറൻസ് ഫോർ ലാംഗ്വേജസിന്റെ മാനദണ്ഡങ്ങൾ പാലിച്ചുകൊണ്ട് നടത്തുന്ന ഈ പരീക്ഷകൾ ജര്മ്മനിയിലേക്കുള്ള അക്കാദമിക്, തൊഴിൽപരമായ ആവശ്യങ്ങൾക്ക് അത്യന്താപേക്ഷിതമാണ്.
നിലവിൽ കോഴിക്കോട്, കണ്ണൂർ, വയനാട്, മലപ്പുറം, കാസർഗോഡ് തുടങ്ങിയ ജില്ലകളിൽ നിന്ന് നിരവധി പേരാണ് ജർമ്മൻ ഭാഷ പഠിക്കുന്നത്. മുൻപ് ഇത്തരം പരീക്ഷകൾക്കായി ഇവർക്ക് ദൂരയാത്രകൾ ആവശ്യമായിരുന്നു. കോഴിക്കോട്ടെ പുതിയ കേന്ദ്രം നിലവിൽ വന്നതോടെ പഠിതാക്കളുടെ യാത്രാ ബുദ്ധിമുട്ടുകൾക്ക് ശാശ്വത പരിഹാരമാകുകയാണ്.
കഴിഞ്ഞ രണ്ട് പതിറ്റാണ്ടിലേറെയായി കേരളത്തിൽ ജർമ്മൻ ഭാഷാ പ്രചാരണത്തിനും ഇൻഡോ-ജർമ്മൻ സാംസ്കാരിക വിനിമയത്തിനും ഗോയ്ഥെ-സെന്റർ തിരുവനന്തപുരം മുൻപന്തിയിലുണ്ട്.
വടക്കൻ കേരളത്തിൽ ജർമ്മൻ ഭാഷയോടുള്ള താല്പര്യം ഗണ്യമായി വർദ്ധിച്ചിട്ടുണ്ടെന്ന് ഡോ. അലക്സാന്ഡ്ര മിറ്റ്ലര് അഭിപ്രായപ്പെട്ടു. യുവാക്കൾക്ക് അന്താരാഷ്ട്ര നിലവാരമുള്ള പരീക്ഷകൾ സ്വന്തം നാട്ടിൽ തന്നെ എഴുതാനുള്ള സൗകര്യമൊരുക്കുകയാണ് ഇതിലൂടെ ലക്ഷ്യമിടുന്നതെന്നും അദ്ദേഹം വ്യക്തമാക്കി.
കേവലം പരീക്ഷാ കേന്ദ്രം എന്നതിലുപരി ഇന്തോ-ജർമ്മൻ സാംസ്കാരിക സഹകരണത്തിന്റെ വലിയൊരു വേദിയായി കോഴിക്കോടിനെ മാറ്റാനാണ് ആഗ്രഹിക്കുന്നതെന്ന് ഗോയ്ഥെ-സെന്റർ കേരള ഡയറക്ടർ ഡോ. സയ്യിദ് ഇബ്രാഹിം പറഞ്ഞു. വരും നാളുകളിൽ ജർമ്മൻ ചലച്ചിത്ര മേളകൾ, സംഗീത പരിപാടികൾ, സാഹിത്യ സമ്മേളനങ്ങൾ, വർക്ക്ഷോപ്പുകൾ, സർവ്വകലാശാലകളുമായുള്ള സഹകരണ പദ്ധതികൾ എന്നിവ മലബാറിലെ സാംസ്കാരിക മേഖലയിലേക്ക് എത്തിക്കാൻ പദ്ധതിയുണ്ടെന്നും അദ്ദേഹം കൂട്ടിച്ചേർത്തു.
കോഴിക്കോട്ടെ ആദ്യ ഗോയ്ഥെ സർട്ടിഫിക്കറ്റ് പരീക്ഷകൾ ഓഗസ്റ്റ് 19 മുതൽ ആരംഭിക്കും. തുടർന്നുള്ള മാസങ്ങളിലും കൃത്യമായി പരീക്ഷകൾ നടത്താനാണ് കേന്ദ്രം തീരുമാനിച്ചിരിക്കുന്നത്.
കൂടുതൽ വിവരങ്ങൾക്ക്:
ഗോയ്ഥെ-സെന്റർ കേരള
ഡോ. സയ്യിദ് ഇബ്രാഹിം (ഡയറക്ടർ)
ഇമെയിൽ: [email protected]
ഗോയ്ഥെ എക്സാമിനേഷൻ സെന്റർ – കോഴിക്കോട്
ടി.ടി. അവന്യൂ, ലുലു മാളിന് സമീപം
ഗോവിന്ദപുരം, കോഴിക്കോട്
