അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഉത്രാട ദിനത്തോടനുബന്ധിച്ച് എസ് കെ ഹോസ്പിറ്റലിൽ വിപുലവും ആഘോഷപൂർണവുമായ ഓണാഘോഷ പരിപാടികൾ സംഘടിപ്പിച്ചു. കേരളത്തിന്റെ തനതായ സാംസ്കാരിക പൈതൃകവും ഓണത്തിന്റെ ഐക്യസന്ദേശവും ഉയർത്തിപ്പിടിച്ചുകൊണ്ട് സംഘടിപ്പിച്ച ആഘോഷം ജീവനക്കാരുടെയും പൊതുജനങ്ങളുടെയും സജീവ പങ്കാളിത്തത്താൽ ശ്രദ്ധേയമായി.
ഹോസ്പിറ്റൽ ചെയർമാൻ ശ്രീ കെ. എൻ. ശിവൻകുട്ടി ഓണാഘോഷ പരിപാടികളുടെ ഔപചാരിക ഉദ്ഘാടനം നിർവഹിച്ചു ശ്രീമതി അജിതാ ബീഗം ഐ.പി.എസ് ഇൻസ്പെക്ടർ ജനറൽ ഓഫ് പോലീസ്,EOW ക്രൈം ബ്രാഞ്ച്, ശ്രീമതി അനു കുമാരി ഐ.എ.എസ് തിരുവനന്തപുരം ജില്ലാ കലക്ടർ., പ്രശസ്ത ഗായിക പ്രൊഫസർ ഓമനക്കുട്ടി ടീച്ചർ, എസ് കെ ഹോസ്പിറ്റൽ സി.ഇ.ഒ. ഡോ. സന്ധ്യ കെ. എസ്., മെഡിക്കൽ ഡയറക്ടർ ഡോ. രവി, ശ്രീമതി ഐശ്വര്യ എന്നിവർ ചേർന്ന് ഭദ്രദീപം തെളിയിച്ച് ആഘോഷങ്ങൾക്ക് തുടക്കം കുറിച്ചു. വിശിഷ്ടാതിഥികൾ ഓണാശംസകൾ നേർന്ന് ചടങ്ങിന് കൂടുതൽ പ്രൗഢിയും നിറപ്പകിട്ടും പകർന്നു.
ചടങ്ങിൽ അധ്യക്ഷത വഹിച്ച് സംസാരിച്ച ചെയർമാൻ ശ്രീ കെ. എൻ. ശിവൻകുട്ടി, ഓണം കേരളീയരുടെ ഐക്യത്തിന്റെയും സ്നേഹത്തിന്റെയും സാഹോദര്യത്തിന്റെയും പ്രതീകമാണെന്ന് പറഞ്ഞു. സമൂഹത്തിലെ എല്ലാ വിഭാഗം ജനങ്ങളെയും ഒരുമിപ്പിക്കുന്ന മഹത്തായ സന്ദേശമാണ് ഓണം നൽകുന്നതെന്നും അദ്ദേഹം അഭിപ്രായപ്പെട്ടു.
ഹോസ്പിറ്റലിലെ ഡോക്ടർമാർ, വിവിധ വിഭാഗങ്ങളിലെ ജീവനക്കാർ, മാനേജ്മെന്റ് പ്രതിനിധികൾ, നാട്ടുകാർ തുടങ്ങി നിരവധി പേർ ആഘോഷത്തിൽ പങ്കെടുത്തു. വിവിധ കലാപരിപാടികൾ ചടങ്ങിനെ കൂടുതൽ ആകർഷകവും മനോഹരവുമാക്കി. പരമ്പരാഗത കലാരൂപങ്ങളും സംഗീതപരിപാടികളും ആഘോഷത്തിന് കേരളീയ സാംസ്കാരിക തനിമ പകർന്നു.
ആഘോഷത്തിന്റെ ഭാഗമായി ഏവർക്കുമായി ഒരുക്കിയ വിഭവസമൃദ്ധമായ പരമ്പരാഗത ഓണസദ്യയും ഏറെ ശ്രദ്ധേയമായി. സന്തോഷവും സൗഹൃദവും പങ്കുവെച്ച്, എസ് കെ ഹോസ്പിറ്റൽ കുടുംബത്തിന്റെ കൂട്ടായ്മയും ഐക്യവും കൂടുതൽ ശക്തിപ്പെടുത്തിയ ഒരു മനോഹരമായ ഓണാഘോഷമായി പരിപാടി മാറി.
