അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കേരള സംസ്ഥാന ചലച്ചിത്ര അക്കാദമി ചെയര്മാന് സ്ഥാനത്തിനായി പിടിവലിയും പാലംവലിയും രൂക്ഷമായിരിക്കുകയാണ്. രാഷ്ട്രീയമായി കോണ്ഗ്രസിനുള്ളിലും UDF മുന്നണിയിലും തര്ക്കങ്ങളും അഭിപ്രായവ്യത്യാസങ്ങളും വേറെ തട്ടില് നടക്കുന്നുണ്ട്. മൂന്ന് മാസത്തിലേറെയായി ഈ പദവി ഒഴിഞ്ഞുകിടക്കുന്നതാണ് നിലവിലെ പ്രതിസന്ധികള്ക്ക് കാരണം. കഴിഞ്ഞ നിയമസഭാ തിരഞ്ഞെടുപ്പിലെ ഭരണമാറ്റത്തിന് പിന്നാലെ, മുന് ചെയര്മാനായിരുന്ന റസൂല് പൂക്കുട്ടി സ്ഥാനം രാജിവെച്ചിരുന്നു.
സംവിധായകന് ബ്ലെസിക്കാണ് കൂടുതല് സാധ്യതയെന്ന് പറയുന്നുണ്ടെങ്കിലും ബ്ലെസി ഇതിന് പച്ചക്കൊടി കാണിച്ചിട്ടില്ല. തമ്മിലടിക്കാനും പടലപ്പിണക്കത്തിനും താനില്ല എന്ന നിലപാടാണ് ബ്ലെസിക്കുള്ളത്. എന്നാല്, തനിക്ക് സ്ഥാനം കിട്ടിയാല് അത് ഏറ്റെടുക്കുമെന്ന് നടന് ജോയ് മാത്യു തുറന്നു പറഞ്ഞിട്ടുണ്ട്. പക്ഷെ, ജോയ്മാത്യുവിന്റെ വെട്ടിത്തുറന്നുള്ള അഭിപ്രായ പ്രകടനങ്ങള് ചെയര്മാന് സ്ഥാനത്തേക്കുള്ള മോഹത്തിന് തടസ്സമായിട്ടുണ്ടെന്നാണ് സൂചന. ഇടതു സര്ക്കാരിന്റെ കാലത്ത് ചെയര്മാനായിരുന്ന പ്രേംകുമാര് വീണ്ടും ചെയര്മാന് സ്ഥാനത്തേക്ക് കമ്ണും നട്ടിരിപ്പുണ്ട്. ഇടതുപക്ഷത്തെ നിലപാടിന്റെ പേരില് തള്ളിയാണ് ചെയര്മാന് സ്ഥാനം രാജിവെച്ചിറങ്ങിയത്.
സ്വാഭാവികമായും വലതു പളയത്തില് തനിക്ക് അംഗീകാരം കിട്ടേണ്ടതാണെന്നാണ് പ്രേംകുമാറിന്റെ വാദം. ചെയര്മാന് ആയിട്ടിരുന്ന പരിചയവും പ്രേംകുമാറിനുണ്ട്. എന്നാല്, ചലച്ചിത്ര അക്കാദമി തലപ്പത്തേക്ക് കോണ്ഗ്രസ് നേതൃത്വത്തില് ഒരു വിഭാഗം പ്രമുഖനായ ഒരു ചലച്ചിത്ര സംവിധായകനെ കൊണ്ടുവരണമെന്നാണ് ആവശ്യപ്പെടുന്നത്. അത് അടൂര് ഗോപാലകൃഷ്ണനാണ്. പക്ഷെ, മറുവിഭാഗം കഴിഞ്ഞ കുറച്ചുകാലമായി പാര്ട്ടിയോട് ചേര്ന്നുനില്ക്കുന്ന സാംസ്ക്കാരിക പ്രവര്ത്തകര്ക്കോ നേതാക്കള്ക്കോ മുന്ഗണന നല്കണമെന്ന നിലപാടിലാണ്. അങ്ങനെയാണ് ചെയര്മാന് സ്ഥാനത്തേക്ക് സംവിധായകന് ബ്ലെസിക്ക് വലിയ രീതിയില് മുന്തൂക്കമുണ്ടായത്.
എന്നാല് ഇതിനൊപ്പം തന്നെ സത്യന് അന്തിക്കാട്, ജോയ് മാത്യു, ജഗദീഷ്, രവീന്ദ്രന് എന്നിവരുടെ പേരുകളും സജീവമായി ചര്ച്ച ചെയ്യപ്പെടുന്നുണ്ട്. സാംസ്ക്കാരിക മന്ത്രിയും മനസ്സില് ആരുടെ പേരാണ് തെളിഞ്ഞിരിക്കുന്നതെന്ന് ഇതുവരെയും ഉറപ്പിക്കാനായിട്ടില്ല. നടന് ജഗദീഷ് പരസ്യമായി പറഞ്ഞിട്ടുള്ളത്, താന് ഒരു സ്ഥാനത്തേക്കും വരുന്നില്ല എന്നാണ്. എന്നാല്, സ്ഥാനം നല്#കിയാല് വേണ്ടെന്ന് പറയില്ലെന്നും സൂചിപ്പിച്ചിട്ടുണ്ട്. സിനിമാ സംഘടനയായ അമ്മയിലും ഇതേ നിലപാടാണ് ജഗദീഷ് എടുത്തിട്ടുള്ളത്. പക്ഷെ, പറഞ്ഞതിന് കടക വിരുദ്ധമായി മത്സരിക്കുകയും ചെയ്യും. ജഗദീഷ് ചലച്ചിത്ര അക്കാദമി ചെയര്മാന് സ്ഥാനത്തിനു വേണ്ടി ശക്തമായി പാലം വലിക്കുന്നുണ്ടെന്നാണ് സൂചന.
അക്കാദമിക്ക് ഒരു ചെയര്മാനോ ഭരണസമിതിയോ നിലവിലില്ലാത്തതിനാല് ഡിസംബറില് നടക്കേണ്ട കേരള രാജ്യാന്തര ചലച്ചിത്ര മേളയുടെ (IFFK 2026) മുന്നൊരുക്കങ്ങള് പൂര്ണ്ണമായും തടസ്സപ്പെട്ടിരിക്കുകയാണ്. സിനിമകളുടെ തിരഞ്ഞെടുപ്പ്, ജൂറി രൂപീകരണം, വിദേശ അതിഥികളെ ക്ഷണിക്കല് തുടങ്ങിയ സുപ്രധാന കാര്യങ്ങളിലൊന്നും തീരുമാനമെടുക്കാന് സാധിക്കാത്തത് സിനിമ മേഖലയില് വലിയ ആശങ്കയ്ക്ക് കാരണമായിട്ടുണ്ട്. സ്വതന്ത്ര കൂട്ടായ്മകളുടെ ആവശ്യം: രാഷ്ട്രീയ അതിപ്രസരമുള്ളവരെയല്ല, മറിച്ച് വിവരവും അനുഭവസമ്പത്തുമുള്ള ഇന്ഡിപെന്ഡന്റ് ഫിലിം മേക്കേഴ്സിനെ (സ്വതന്ത്ര സംവിധായകരെ) പദവിയിലേക്ക് പരിഗണിക്കണമെന്ന ആവശ്യവുമായി ഫിലിം സൊസൈറ്റികളും കൂട്ടായ്മകളും രംഗത്തെത്തിയിട്ടുണ്ട്.
സാംസ്കാരിക വകുപ്പ് മന്ത്രി പി.സി. വിഷ്ണുനാഥ്, സി.ആര്. മഹേഷ് എം.എല്.എ, ആര്യാടന് ഷൗക്കത്ത് എന്നിവരടങ്ങുന്ന പ്രത്യേക കോര് കമ്മിറ്റിയാണ് സാംസ്കാരിക സ്ഥാപനങ്ങളിലെ ഭാരവാഹികളെ നിശ്ചയിക്കുന്നതിനായി നിശ്ചയിച്ചിരിക്കുന്നത്. എന്നാല് താല്പര്യക്കാരുടെ ആധിക്യവും ഗ്രൂപ്പ് പോരുകളും കാരണം അന്തിമ തീരുമാനമെടുക്കാന് സമിതിക്ക് കഴിഞ്ഞിട്ടില്ല.
