അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ന്യൂഡൽഹി: വീടിന് സമീപത്തെ ബഹളത്തെ ചോദ്യം ചെയ്തതിനെ തുടർന്നുണ്ടായ തർക്കത്തിനിടെ മണിപ്പൂരി സംഗീതജ്ഞൻ ചോങ്തം വിക്രം സിങ് കൊല്ലപ്പെട്ടു. തെക്കുകിഴക്കൻ ഡൽഹിയിലെ കിലോക്രി പ്രദേശത്താണ് സംഭവം.
വീടിന് പുറത്തുണ്ടായിരുന്ന സംഘത്തിന്റെ ബഹളം ചോദ്യം ചെയ്തതിന് പിന്നാലെയാണ് വിക്രം സിങ്ങിനെ ആക്രമിച്ചതെന്നാണ് പൊലീസ് പറയുന്നത്. തർക്കം രൂക്ഷമായതോടെ സംഘം അദ്ദേഹത്തെ പിന്തുടർന്ന് മർദിക്കുകയായിരുന്നു.
ഗുരുതരമായി പരിക്കേറ്റ വിക്രം സിങ്ങിനെ കുടുംബാംഗങ്ങൾ ആശുപത്രിയിലെത്തിച്ചെങ്കിലും ചികിത്സയ്ക്കിടെ മരിക്കുകയായിരുന്നു. പോസ്റ്റ്മോർട്ടം റിപ്പോർട്ടിൽ ശരീരത്തിൽ നിരവധി ഗുരുതര പരിക്കുകൾ കണ്ടെത്തിയതായി റിപ്പോർട്ടുകളുണ്ട്.
സംഭവവുമായി ബന്ധപ്പെട്ട് ഏഴ് പേരെ പൊലീസ് അറസ്റ്റ് ചെയ്തിട്ടുണ്ട്. ഒരു പ്രായപൂർത്തിയാകാത്തയാളെയും കസ്റ്റഡിയിലെടുത്തതായി റിപ്പോർട്ടുകളുണ്ട്. സംഭവത്തിന്റെ വിശദമായ അന്വേഷണം പൊലീസ് തുടരുകയാണ്.
മണിപ്പൂരിലെ റോക്ക് സംഗീത രംഗത്ത് ശ്രദ്ധേയനായ സംഗീതജ്ഞനായിരുന്നു വിക്രം സിങ്. വിവിധ ബാൻഡുകളിൽ ലീഡ് ഗിറ്റാറിസ്റ്റായി പ്രവർത്തിച്ചിരുന്ന അദ്ദേഹം പിന്നീട് ഡൽഹിയിൽ സംഗീത അധ്യാപകനായും പ്രവർത്തിച്ചിരുന്നു.
സംഭവം ഡൽഹിയിലെ വടക്കുകിഴക്കൻ സംസ്ഥാനങ്ങളിൽ നിന്നുള്ളവരുടെ സുരക്ഷയെക്കുറിച്ചും ചർച്ചകൾക്ക് വഴിവെച്ചിട്ടുണ്ട്.
