അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.തമിഴ് സിനിമയിലെ പ്രമുഖ താരങ്ങളായ സൂര്യയുടെയും ശിവകാർത്തികേയന്റെയും ആരാധകർ തമ്മിൽ സമൂഹമാധ്യമങ്ങളിൽ അതിരൂക്ഷമായ വാഗ്വാദങ്ങൾ (ഫാൻ ഫൈറ്റ്) നടക്കുകയാണ്. കാർത്തി നായകനായ ‘സർദാർ 2’, സൂരി നായകനായ ‘മണ്ടാടി’ എന്നീ ചിത്രങ്ങളുടെ റിലീസുമായി ബന്ധപ്പെട്ട് ഇരുവരും പങ്കുവെച്ച എക്സ് (ട്വിറ്റർ) പോസ്റ്റുകളാണ് തർക്കത്തിന് വഴിവെച്ചത്.
സൂരിയുടെ ‘മണ്ടാടി’ ബോക്സ് ഓഫീസിൽ വിജയം നേടിയതിന് പിന്നാലെ “നല്ല കണ്ടന്റുകൾ എപ്പോഴും വിജയിക്കും” എന്ന് ശിവകാർത്തികേയൻ കുറിച്ച് ആശംസകൾ അറിയിച്ചിരുന്നു. എന്നാൽ 2022-ൽ സൂര്യ ഉപയോഗിച്ച അതേ വാചകം തന്നെയാണ് ഇപ്പോൾ ശിവകാർത്തികേയനും ഉപയോഗിച്ചിരിക്കുന്നത്.
2022-ൽ കാർത്തിയുടെ ‘സർദാറും’ ശിവകാർത്തികേയന്റെ ‘പ്രിൻസും’ ഒരേസമയത്താണ് റിലീസ് ചെയ്തത്. അന്ന് ‘പ്രിൻസ്’ പരാജയപ്പെടുകയും ‘സർദാർ’ വിജയിക്കുകയും ചെയ്തു. അന്ന് ‘സർദാറി’ന് ആശംസയേകി സൂര്യ പങ്കുവെച്ച പോസ്റ്റിലായിരുന്നു “നല്ല സിനിമകൾ എന്നും വിജയിക്കും” എന്ന വാചകം ഉൾപ്പെടുത്തിയിരുന്നത്.
നാല് വർഷങ്ങൾക്ക് ശേഷം കാർത്തിയുടെ ‘സർദാർ 2’ ശരാശരി പ്രകടനം നടത്തുകയും സൂരിയുടെ ചിത്രം വിജയമാവുകയും ചെയ്തപ്പോൾ സൂര്യയോട് ശിവകാർത്തികേയൻ ‘മധുര പ്രതികാരം’ ചെയ്തതാണെന്നാണ് ശിവകാർത്തികേയൻ ആരാധകർ വാദിക്കുന്നത്.
എന്നാൽ പാൻ-ഇന്ത്യൻ താരമായ സൂര്യയോട് ശിവകാർത്തികേയനെ താരതമ്യം ചെയ്യാനാകില്ലെന്ന് സൂര്യ ഫാൻസും തിരിച്ചടിക്കുന്നു.
താരങ്ങൾ തമ്മിൽ വ്യക്തിപരമായി യാതൊരു പ്രശ്നങ്ങളുമില്ലെന്നും സമൂഹമാധ്യമങ്ങളിൽ ആരാധകർ വെറുതെ ഉണ്ടാക്കുന്ന വിവാദങ്ങളാണിതെന്നും ഒരു വിഭാഗം സിനിമാ പ്രേമികൾ ചൂണ്ടിക്കാണിക്കുന്നു.
