അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.നടൻ ഷറഫുദ്ദീൻ ഫോൺ വിളിച്ചിട്ട് എടുക്കുന്നില്ലെന്ന പരാതിയുമായി സംവിധായകൻ ഒമർ ലുലു രംഗത്ത്. പുതിയ സിനിമയുടെ തിരക്കഥയുമായി ബന്ധപ്പെട്ട് കഴിഞ്ഞ രണ്ട് മാസമായി ഷറഫുദ്ദീനെ ബന്ധപ്പെടാൻ ശ്രമിക്കുകയാണെന്നും, എന്നാൽ പ്രധാനമന്ത്രിക്കില്ലാത്ത തിരക്കാണ് അദ്ദേഹത്തിനെന്നും ഒമർ ലുലു സോഷ്യൽ മീഡിയ കുറിപ്പിൽ പരിഹസിക്കുന്നു.
തങ്ങൾ ഒന്നിച്ച ‘ഹാപ്പി വെഡ്ഡിങ്’ എന്ന ചിത്രം നൂറ് ദിവസം ഓടിയിട്ട് പത്ത് വർഷം കഴിഞ്ഞെന്നും, രണ്ട് പുതിയ പയ്യന്മാർ പറഞ്ഞ കഥ കേട്ടപ്പോൾ ഈ കഥാപാത്രം ഷറഫ് ചെയ്താൽ നന്നാവുമെന്ന് തോന്നിയതിനാലാണ് ആറ് വർഷത്തിന് ശേഷം വീണ്ടും വിളിച്ചതെന്നും ഒമർ ലുലു വ്യക്തമാക്കുന്നു.
കഥയുടെ പകുതിയോളം എഴുതിയപ്പോൾ ഷറഫിനോട് സംസാരിക്കുകയും സ്ക്രിപ്റ്റ് വായിച്ച ശേഷം പറയാമെന്ന് താരം ഉറപ്പുനൽകുകയും ചെയ്തിരുന്നു.
തുടർന്ന് സ്ക്രിപ്റ്റ് 80 ശതമാനത്തോളം പൂർത്തിയാക്കിയ ശേഷം അഭിനേതാവിനെ ഉറപ്പിക്കാൻ രണ്ടു മാസമായി ബന്ധപ്പെടാൻ ശ്രമിക്കുകയാണെങ്കിലും ഷറഫുദ്ദീൻ ഫോൺ എടുക്കുന്നില്ലെന്നാണ് ഒമറിന്റെ പരാതി.
ഒരു മാസം ശ്രമിച്ചാൽ രാജ്യത്തെ പ്രധാനമന്ത്രിയുടെ അപ്പോയിന്റ്മെന്റ് വരെ കിട്ടുന്ന നാട്ടിലാണ് ഈ അനുഭവമെന്ന് കളിയാക്കിയ സംവിധായകൻ, ഫ്രീയാകുമ്പോൾ ഒന്ന് തിരിച്ചുവിളിക്കണമെന്നും വിളിക്കുന്നത് കല്യാണം ക്ഷണിക്കാനല്ല, കഥ പറയാനാണെന്നും കുറിപ്പിലൂടെ ഓർമ്മിപ്പിച്ചു.
2024-ൽ പുറത്തിറങ്ങിയ ‘ബാഡ് ബോയ്സ്’ ആണ് ഒമർ ലുലു അവസാനമായി സംവിധാനം ചെയ്ത ചിത്രം. അതേസമയം അമൽ നീരദിന്റെ ‘ബാച്ച്‌ലർ പാർട്ടി 2’, ‘ഫാമിലി ട്രിപ്പ്’, ‘നരിവേട്ട’യ്ക്ക് ശേഷമുള്ള പുതിയ ചിത്രം തുടങ്ങി കൈനിറയെ പ്രോജക്റ്റുകളുമായി സജീവമാണ് ഷറഫുദ്ദീൻ.
