അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഹിന്ഡന്ബര്ഗ് വിവാദവുമായി ബന്ധപ്പെട്ട് അദാനി ഗ്രൂപ്പിലെ അഞ്ച് കമ്പനികള്ക്കെതിരെ സെക്യൂരിറ്റീസ് ആന്ഡ് എക്സ്ചേഞ്ച് ബോര്ഡ് ഓഫ് ഇന്ത്യ (സെബി) സ്വീകരിച്ച നടപടികള് ഒത്തുതീര്പ്പിലൂടെ അവസാനിപ്പിച്ചു. ഇടപാടുകള് വെളിപ്പെടുത്തുന്നതിലെ വീഴ്ചകളും ഓഡിറ്റ് റിപ്പോര്ട്ടുകളുമായി ബന്ധപ്പെട്ട അപാകതകളുമാണ് കേസുകളുടെ അടിസ്ഥാനം. സെപ്റ്റംബര് 22നാണ് നടപടികള് പൂര്ത്തിയാക്കി കേസുകള് തീര്പ്പാക്കിയത്. അഞ്ച് കമ്പനികളും ചേര്ന്ന് 1.508 കോടി രൂപയാണ് ഒത്തുതീര്പ്പ് തുകയായി നല്കിയത്. അദാനി എന്റര്പ്രൈസസ് 76.05 ലക്ഷം രൂപയും അദാനി ഗ്രീന് എനര്ജി 45.50 ലക്ഷം രൂപയും നല്കി. അദാനി ടോട്ടല് ഗ്യാസ്, അദാനി എനര്ജി സൊല്യൂഷന്സ്, എ.ഡബ്ല്യു.എല് അഗ്രി ബിസിനസ് എന്നീ മൂന്ന് കമ്പനികള് 9.75 ലക്ഷം രൂപ വീതമാണ് നല്കിയത്.
അദാനി എന്റര്പ്രൈസസിനെതിരായ നടപടിക്ക് പ്രധാനമായും വാര്ഷിക റിപ്പോര്ട്ടുകളില് ചില അനുബന്ധ കക്ഷി ഇടപാടുകള് വെളിപ്പെടുത്താത്തതും സാധുവായ പിയര് റിവ്യൂ സര്ട്ടിഫിക്കറ്റുകള് ഇല്ലാത്ത ഓഡിറ്റ് സ്ഥാപനങ്ങള് തയ്യാറാക്കിയ റിപ്പോര്ട്ടുകളുമായി ബന്ധപ്പെട്ട കാര്യങ്ങളുമാണ് കാരണം.
അദാനി ഗ്രീന് എനര്ജി, അദാനി ടോട്ടല് ഗ്യാസ്, എ.ഡബ്ല്യു.എല് അഗ്രി ബിസിനസ് എന്നിവയും ഓഡിറ്റ് റിപ്പോര്ട്ടുകളുമായി ബന്ധപ്പെട്ട സമാനമായ ആരോപണങ്ങളിലാണ് സെബി നടപടികള് നേരിട്ടത്. അതേസമയം, 2015 ജൂണില് അവസാനിച്ച പാദത്തിലെ ലിമിറ്റഡ്-റിവ്യൂ റിപ്പോര്ട്ടുമായി ബന്ധപ്പെട്ട ആരോപണങ്ങളാണ് അദാനി എനര്ജി സൊല്യൂഷന്സിനെതിരെയുണ്ടായിരുന്നത്.
2023 ജനുവരി 23ന് ഹിന്ഡന്ബര്ഗ് റിപ്പോര്ട്ട് പുറത്തുവരുന്നതിന് മുന്പ് അദാനി ഗ്രൂപ്പിന്റെ മൊത്തം വിപണിമൂല്യം 19.25 ലക്ഷം കോടി രൂപയായിരുന്നു. ഫെബ്രുവരി 27ഓടെ ഇത് 6.82 ലക്ഷം കോടി രൂപയായി താഴ്ന്നു. ഏകദേശം 64.6 ശതമാനമായിരുന്നു ഇടിവ്. പിന്നീട് വിപണിമൂല്യം വീണ്ടെടുത്ത് 2024 ജൂണ് 3ന് 19.42 ലക്ഷം കോടി രൂപയിലെത്തി. 2026 സെപ്റ്റംബര് 22ലെ കണക്കുപ്രകാരം ഗ്രൂപ്പിന്റെ വിപണിമൂല്യം 18.18 ലക്ഷം കോടി രൂപയാണ്.
ഒത്തുതീര്പ്പ് തുക അടച്ചതോടെ നടപടികള് അവസാനിച്ചെങ്കിലും കേസുകള് പൂര്ണമായും അടഞ്ഞ അധ്യായമല്ലെന്നാണ് സെബി വ്യക്തമാക്കുന്നത്. ഒത്തുതീര്പ്പിന്റെ ഭാഗമായി കമ്പനി നല്കിയ വിവരങ്ങള് പിന്നീട് തെറ്റാണെന്ന് കണ്ടെത്തിയാല് നടപടികള് പുനരാരംഭിക്കാം. ഒത്തുതീര്പ്പ് നിബന്ധനകള് ലംഘിക്കുകയോ തുക നിശ്ചയിച്ചതില് അപാകത കണ്ടെത്തുകയോ ചെയ്താലും എന്ഫോഴ്സ്മെന്റ് നടപടികള് വീണ്ടും ആരംഭിക്കുമെന്ന് സെബി വ്യക്തമാക്കിയിട്ടുണ്ട്.
