അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മാറ്റം ഇങ്ങനെയൊക്കെയാണ് വേണ്ടത്. മാറാത്തതും മാറും. മാറ്റം കൊണ്ട് പുതു ചരിത്രമെഴുതും. ഖജനാവില് പണം നിറയ്ക്കും. ജനങ്ങളില് പണമെത്തിക്കും. ഒരുരൂപ പോലും നികുതി വര്ദ്ധിപ്പിക്കാതെ, ജനങ്ങളെ ശ്വാസം മുട്ടിക്കാതെ വരുമാനം ഉണ്ടാക്കും. ഇത് മുഖ്യമന്ത്രി വി.ഡി. സതീശന് നിയമസഭയില് ബജറ്റവരിപ്പിക്കുമ്പോഴും അതിനു മുമ്പും ശേഷവും പറഞ്ഞുകണ്ടിരിക്കുന്ന വാക്കുകളാണ്. പത്തുവര്ഷം ഇടതുപക്ഷ സര്ക്കാര് ഭരിച്ചു മുടിച്ച കേരളത്തിന് പുതിയ സാമ്പത്തിക ഉണര്വ്വ് വരുത്താനുള്ള ശ്രമത്തിലാണ് മുഖ്യമന്ത്രിമാരും മന്ത്രിമാരും. അതിന് ദൃഢ പ്രതിജ്ഞ എടുത്തവരാണല്ലോ എല്ലാവരും. അതുകൊണ്ട് കേരളത്തിനും മലയാളികള്ക്കും ആശ്വസിക്കാം. പക്ഷെ, എങ്ങനെ ഇതൊക്കെ സാധിക്കും ?. വി.ഡി. സതീശന് ഒരു സമ്പത്തിക മാന്ത്രികനാണോ. അതോ, സമ്പത്ത് കണ്ടെത്താന് വേറെന്തെങ്കിലും വഴിയുണ്ടോ.
കഴിഞ്ഞ സര്ക്കാരിനു മുമ്പും സര്ക്കാരുകള് ഉണ്ടായിരുന്നു. അവരും കടമെടുത്തും, നികുതി വര്ദ്ധന നടത്തിയുമൊക്കെയാണ് കേരളത്തെ മുമ്പോട്ടു നയിച്ചത്. പിണറായി വിജയന് സര്ക്കാരണെങ്കില് ലണ്ടന് സ്റ്റോക്ക് എക്സ്ചേഞ്ചില് വരെപ്പോയി മണിയടിച്ചാണ് കടപ്പത്രം വിറ്റതും കാശു വാങ്ങിയതും. പോരെങ്കില് കിഫ്ബി രൂപീകരിച്ചും, കേരള സഭയെന്ന പരിപാടി സംഘടിപ്പിച്ച് വിദേശ മലയാളികളെ കൊണ്ട് നിക്ഷേപം നടത്തിയുമൊക്കെയാണ് വട്ടമൊപ്പിച്ചതും. ഇതൊന്നും പോരാതെ, കേന്ദ്രത്തിനെ പരസ്യമായി എതിര്ത്തും, രഹസ്യമായി സന്ധി ചെയ്തും കേന്ദ്രഫണ്ടുകള് എത്തിക്കാന് പാടുപെടുകയും ചെയ്തിരുന്നു. എസ്.സി, എസ്.ടി. ഫണ്ട് വകമാറ്റി ചെലവഴിച്ചതും പിടിച്ചു നില്ക്കാന് വഴിയുണ്ടാക്കി.
ഇതൊന്നും ചെയ്യാതെ വി.ഡി. സതീശന് മന്ത്രിസഭ എങ്ങനെയാണ് മുന്നോട്ടു പോകുന്നത്. ആഢംബരങ്ങള് ഒന്നും വേണ്ടെന്നും, അഥവാ ആര്ക്കെങ്കിലും ആഢംബരത്തില് ജീവിക്കണമെന്നും തോന്നിയാല് സര്ക്കാരിന്റെ ഖജനാവിലേക്ക് നോക്കരുത്. അവിടെ ഒന്നുമില്ല. ഉള്ളതാണെങ്കില് ആഡംബരത്തിന് ചെലവാക്കാനുള്ളതുമല്ല. അത് കേരളത്തിലെ വികസനത്തിനും, പാവങ്ങളെ സഹായിക്കാനും മാര്ക്കറ്റില് ഇടപെടാനുമൊക്കെയുള്ളതാണ്. അതുകൊണ്ട് മന്ത്രിമാര് സ്വയം ആഢംബരത്തിനുള്ള വക കണ്ടെത്തണമെന്നാണ് അനൗദ്യോഗിക തിട്ടൂരം. മുഖ്യമന്ത്രിയും അങ്ങനെതന്നെയാണ്. ചായകുടിക്കാന് പോലും ഖജനാവിലെ പണം ഉപയോഗിക്കില്ല. പകരം ആരെങ്കിലും വാങ്ങിക്കൊടുക്കുമെങ്കില് കുടിക്കും. ഇല്ലെങ്കില് കുടിക്കാതിരിക്കും. ഇതു തന്നെയാണ് ‘ഓസ് സര്ക്കാര്’ എന്ന പദത്തിന് യോഗ്യത നേടിയതിനു കാരണവും.
വിദേശ യാത്രകള്, അതും മുഖ്യമന്ത്രിയുടെയും മന്ത്രിമാരുടെയും. ചാര്ട്ടേഡ് വിമാനയാത്ര. ഔദ്യോഗിക വാഹനമായി ഉപയോഗിക്കുന്ന ഓസ് വണ്ടികള്. ഇതെല്ലാം ചോദ്യം ചെയ്യപ്പെടുന്നത് ഇതുകൊണ്ടാണ്. എന്തിനാണ് സര്ക്കാര് ഇങ്ങനെ ഓസ് പറ്റുന്നത്. ഓസിന് കൊടുക്കാന് തയ്യാറായി നില്ക്കുന്നവര് ആരാണ്. എന്താണ് ഇവര്ക്ക് അതിനുള്ള ഗുണം. റേഞ്ച് റോവര് ഔദ്യോഗിക വാഹനമാക്കിയ കെ.എം. ഷാജി മന്ത്രി. അതും സുഹൃത്തിന്റെ വണ്ടി. പുതിയ വാഹനങ്ങള് സര്ക്കാര് വാങ്ങിയിട്ടില്ല എന്നേയുള്ളൂ. പഴയ സര്ക്കാര് വാഹനങ്ങള് ടൂറിസം വകുപ്പിന്റെ കൈയ്യിലുണ്ട്. പക്ഷെ, റേഞ്ച് റോവര് മതി എന്നു ചിന്തിച്ചാല് എന്തു ചെയ്യും. ഒരു റേഞ്ച് റോവറൊക്കെ മന്ത്രി ഉപയോഗിക്കണമെങ്കില് അത് ഇത്തിരി കടന്നകൈയ്യല്ലേ എന്നാരും ചോദിക്കരുത്. കാരണം, അത് സര്ക്കാര് ചെലവില് വാങ്ങയ വണ്ടിയല്ലല്ലോ.
സര്ക്കാരിന് അതിന്റെ പേരില് ഒരു രൂപപോലും നഷ്ടമില്ലല്ലോ എന്ന്. പക്ഷെ, സര്ക്കാരിന്റെ നഷ്ടമല്ല അവിടെ നോക്കേണ്ടത്. ആരാണ് ഇത്രയും വിലയുള്ള വാഹനം കൊടുത്തത്. എന്തിനാണ് കൊടുത്തത്. മന്ത്രിയെന്നാല്, ജനങ്ങളുടെ മന്ത്രിയാണ്. അപ്പോള് ചോദ്യം ചെയ്യപ്പെടുക തന്നെ ചെയ്യും. കാറ് കൊടുത്തയാളുടെ വിവരങ്ങള് പുറത്തു വിടണം. ആരാണ് ചാര്ട്ടേഡ് ഫ്ളൈറ്റ് മുഖ്യമന്ത്രിക്കു വേണ്ടി ബുക്ക് ചെയ്തത്. ആരാണ് അതിന്റെ ചെലവ് വഹിച്ചത്. കേരളത്തിന്റെ മുഖ്യമന്ത്രി ഒരു സ്വകാര്യ വ്യക്തിയുടെ ഫ്ളൈറ്റ് ഉപയോഗിച്ചുവെങ്കില് ആ സ്വകാര്യ വ്യക്തിയുമായി എന്താണ് ബന്ധമെന്ന് അന്വേഷിക്കുന്നത് സ്വാഭാവികം. ചാര്ട്ടേഡ് ഫ്ളൈറ്റിന് സര്ക്കാരിന്റെ ഖജനാവില് നിന്നും ഒരുരൂപയും ചെലവായില്ലെന്ന് പറയുന്നതില് ന്യായമില്ല.
അപ്പോള് സര്ക്കാര് ഇപ്പോള് നടത്തുന്ന ഓസ് പരിപാടിയില് എന്തോ പന്തികേട് ഒളിഞ്ഞിരിപ്പുണ്ട്. അതാണ് പുറത്തേക്കു വരുന്നത്. കള്ളത്തെ എല്ലാക്കാലത്തും മറച്ചു പിടിക്കാനാവില്ല എന്നതാണ് സത്യം. സത്യപ്രതിജ്ഞ ചെയ്ത് അധികാരത്തിലേറിയവര് ഒന്ന് ആലോചിച്ചു നോക്കുക. നിങ്ങള് കൈപ്പറ്റുന്ന ഓസുകളെല്ലാം സത്യപ്രതിജ്ഞാ ലംഘനത്തിന്റെ പരിധിയില് വരില്ലേയെന്ന്. മുഖ്യമന്ത്രി പറയുന്നത് ‘ഓസ്’ ഇനിയും വാങ്ങുമെന്നാണ്. അതായത്, നികുതി വര്ദ്ധിപ്പിക്കാതെ, ആഢംബരങ്ങള് നടത്താതെ സാമ്പത്തിക ഭദ്രത വരുത്താന് ഇത്തരം ഓസുകള് കൊണ്ട് കഴിയുമെന്ന് സാരം. നിക്ഷേപങ്ങളോ, നിക്ഷേപകരെ ആകര്ഷിക്കുന്നതിനോ ഇത് സഹായിക്കുമെന്നതില് തര്ക്കമില്ല. കെ.എസ്.ആര്.ടി.സി ബസുകള് ആര്ക്കു വേണമെങ്കിലും സ്പോണ്സര് ചെയ്യാമെന്നതും ഓസില്പ്പെടും.
ഇന്നലെ ഒരു ജോസ് 40 ലക്ഷംരൂപയാണ് കെ.എസ്.ആര്.ടി.സി ബസ് വാങ്ങാന് നല്കിയത്. ഇതുപോലെ സര്ക്കാര് ബസ് വാങ്ങാതെ സ്പോണ്സര്ഷിപ്പില് വാങ്ങിയാല്, ഖജനാവിലെ പണം ചോരില്ല. പക്ഷെ, ജോസിന്റെ ആവശ്യം അദ്ദേഹത്തിന്റെ നാട്ടില് ആ ബസ് ഓടിക്കണമെന്നാണ്. അത് അംഗീകരിക്കുകയും ചെയ്തു. അതായത്, സ്പോണ്സര് ചെയ്യുന്ന ആളുടെ ഇംഗിതം സര്ക്കാര് അപ്പാടെ അംഗീകരിക്കണം എന്ന്. ഇതാണ് സ്വകാര്യ വത്ക്കരണത്തിന്റെ ബാലപാഠം. ഓസിലൂടെ ഖജനാവില് തൊടാതെ സ്വകാര്യ വത്ക്കരണം നടത്തുകയാണ് കേരള സര്ക്കാര്.
