ഭീകരവാദത്തെയും മുംബൈ ഭീകരാക്രമണക്കേസ് പ്രതി ഹാഫിസ് സയീദിനെയും കുറിച്ചുള്ള മാധ്യമപ്രവർത്തകരുടെ ചോദ്യങ്ങൾക്കു മുന്നിൽ മറുപടിയില്ലാതെ ഐക്യരാഷ്ട്ര സംഘടനയുടെ ആസ്ഥാനത്തെത്തിയ പാക്കിസ്ഥാൻ പ്രധാനമന്ത്രി ഷെഹ്ബാസ് ഷെരീഫ്.
ഐക്യരാഷ്ട്ര സംഘടനയുടെ ആസ്ഥാനത്തേക്ക് പ്രവേശിക്കുമ്പോഴും പിന്നീട് അവിടെനിന്നും മടങ്ങുമ്പോഴും ഇന്ത്യൻ വാർത്താ ഏജൻസിയായ എഎൻഐ ഉന്നയിച്ച ചോദ്യങ്ങളിൽ നിന്നും അദ്ദേഹം ഒഴിഞ്ഞുമാറി പോവുകയായിരുന്നു.
‘പ്രധാനമന്ത്രീ, ഭീകരർക്ക് അഭയം നൽകുന്നത് പാക്കിസ്ഥാൻ എന്നാണ് അവസാനിപ്പിക്കുക?’ എന്ന് യുഎൻ ആസ്ഥാനത്തേക്ക് പ്രവേശിക്കുന്നതിനിടെ മാധ്യമപ്രവർത്തകൻ ഷെഹ്ബാസ് ഷെരീഫിനോട് ചോദിച്ചു.
പിന്നീട് അദ്ദേഹം മടങ്ങുന്ന വേളയിൽ, ‘ലഷ്കറെ തയിബ തലവൻ ഹാഫിസ് സയീദിനെ നിങ്ങൾ എപ്പോഴാണ് നിയമത്തിനു മുന്നിൽ വിചാരണ ചെയ്യുക’ എന്ന ചോദ്യവും ഉയർന്നു. എന്നാൽ രണ്ടു ചോദ്യങ്ങളോടും പ്രതികരിക്കാൻ പാക്ക് പ്രധാനമന്ത്രി തയാറായില്ല.
ആഗോള ഭീകരനായി പ്രഖ്യാപിക്കപ്പെട്ട ഹാഫിസ് സയീദ് 2008ലെ മുംബൈ 26/11 ഭീകരാക്രമണക്കേസിലെ മുഖ്യപ്രതിയാണ്.
ഇതിനുപുറമെ, 2025 ഏപ്രിൽ 22ന് ജമ്മു കശ്മീരിലെ പഹൽഗാമിൽ നടന്ന ഭീകരാക്രമണത്തിനു പിന്നിലെ ആസൂത്രണം പാക്കിസ്ഥാൻ ആസ്ഥാനമായി പ്രവർത്തിക്കുന്ന നിരോധിത സംഘടനയായ ലഷ്കറെ തയിബയുടെ ഉന്നത തലവന്മാരുടേതാണെന്ന് ഇന്ത്യയുടെ ദേശീയ അന്വേഷണ ഏജൻസി അടുത്തിടെ കണ്ടെത്തിയിരുന്നു.
പഹൽഗാം ആക്രമണത്തിന്റെ ഗൂഢാലോചനയിൽ പങ്കുണ്ടെന്ന് ചൂണ്ടിക്കാട്ടി എൻഐഎ സമർപ്പിച്ച അനുബന്ധ കുറ്റപത്രത്തിൽ എട്ടാം പ്രതിയായി ഹാഫിസ് സയീദിനെ പേരെടുത്തു പറഞ്ഞിട്ടുണ്ട്.
ഈ സാഹചര്യത്തിലാണ് ഐക്യരാഷ്ട്ര സംഘടനയുടെ വേദികളിൽ വച്ച് പാക്ക് പ്രധാനമന്ത്രിക്ക് മാധ്യമങ്ങളുടെ ചോദ്യങ്ങൾക്ക് മുന്നിൽ മറുപടിയില്ലാതെ ഒളിച്ചോടേണ്ടി വന്നത്.