അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മാധ്യമങ്ങളോടു മുഖ്യമന്ത്രി പ്രതികരിക്കുന്നുണ്ടെങ്കില് മുന്കൂട്ടി അറിയിക്കുമെന്ന് അദ്ദേഹത്തിന്റെ ഓഫിസ്. മുഖ്യമന്ത്രി വി.ഡി.സതീശന് എത്തുന്നിടത്തെല്ലാം വാര്ത്താചാനലുകള് പ്രതികരണത്തിനായി സമീപിക്കുന്ന സാഹചര്യത്തിലാണിത്. എല്ലാ ബുധനാഴ്ചയും മന്ത്രിസഭായോഗത്തിനു ശേഷം മുഖ്യമന്ത്രി മാധ്യമങ്ങളെ കാണും. ഇതിനുപുറമേ, അടിയന്തരഘട്ടങ്ങളില് മുന്കൂട്ടി അറിയിച്ചും പ്രതികരണങ്ങള് നല്കും. മുഖ്യമന്ത്രി പോകുന്നിടത്തെല്ലാം ചാനല് പ്രവര്ത്തകര് എത്തുകയും അദ്ദേഹം പ്രതികരിക്കാത്തത് വാര്ത്തയാക്കുകയും ചെയ്യുന്ന രീതി ഏതാനും ദിവസങ്ങളായി വര്ധിച്ചെന്നാണ് ഓഫിസിന്റെ വിലയിരുത്തല്.
സിഎംആര്എല് മേധാവി എസ്.എന്.ശശിധരന് കര്ത്തായില്നിന്നു വി.ഡി.സതീശന് പണം വാങ്ങിയെന്ന് ബിജെപി നേതാവ് ഷോണ് ജോര്ജ് കഴിഞ്ഞയാഴ്ച ആരോപിച്ചതിനു പിന്നാലെ മാധ്യമപ്രവര്ത്തകര് പ്രതികരണത്തിനായി സതീശനെ സമീപിച്ചിരുന്നു. ഷോണ് ആരോപണമുന്നയിക്കുമ്പോള് കൊച്ചിയില് ഒരു ചടങ്ങില് പങ്കെടുക്കുകയായിരുന്നു മുഖ്യമന്ത്രി. ചടങ്ങിനുശേഷം പ്രതികരണത്തിനായി മാധ്യമപ്രവര്ത്തകര് തിക്കിത്തിരക്കിയത് ശ്രദ്ധയില്പെട്ടതോടെയാണു മുഖ്യമന്ത്രിയുടെ സുരക്ഷ ശക്തമാക്കണമെന്ന് ഇന്റലിജന്സ് വിഭാഗം വിലയിരുത്തിയത്.
തൊട്ടടുത്ത ദിവസം ഇടുക്കി കലക്ടറേറ്റില് യോഗത്തിനുശേഷം പുറത്തിറങ്ങിയപ്പോഴും മുഖ്യമന്ത്രിയെ മാധ്യമപ്രവര്ത്തകര് വളഞ്ഞുവെന്ന റിപ്പോര്ട്ടാണ് സ്പെഷല് ബ്രാഞ്ച് നല്കിയത്. ഈ സാഹചര്യത്തിലാണ്, മാധ്യമപ്രവര്ത്തകരടക്കം ജനം അനിയന്ത്രിതമായി മുഖ്യമന്ത്രിക്കരികിലേക്ക് എത്തുന്നുവെന്നും ജാഗ്രത പാലിക്കണമെന്നും ജില്ലാ പൊലീസ് മേധാവിമാര്ക്ക് ഇന്റലിജന്സ് എഡിജിപി നിര്ദേശം നല്കിയത്. പ്രതിപക്ഷകക്ഷികള് പ്രതിഷേധവുമായി രംഗത്തിറങ്ങിയ സാഹചര്യത്തില് മുഖ്യമന്ത്രിയുടെ അടുത്തേക്ക് ആളുകള് എത്തുന്നതില് തല്ക്കാലത്തേക്കെങ്കിലും നിയന്ത്രണം വേണമെന്നാണു പൊലീസിന്റെ ആവശ്യം. മുഖ്യമന്ത്രിയുടെ വാഹനവ്യൂഹം ശക്തമാക്കണമെന്ന് ഇന്റലിജന്സ് വിഭാഗം ഈയിടെ ആവശ്യപ്പെട്ടെങ്കിലും അദ്ദേഹം സമ്മതിച്ചിരുന്നില്ല.
