അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.വിവാഹം കഴിഞ്ഞ് നാലു മാസത്തിനകം ഭർത്താവിൽ നിന്നും ഭർത്താവിന്റെ വീട്ടാരിൽ നിന്നും അതിക്രൂരമായ ശാരീരിക-മാനസിക പീഡനങ്ങൾ നേരിട്ടതായി കൊല്ലം പുത്തൻതുറ സ്വദേശി അഞ്ജു.
തുടക്കം മുതൽ സ്ത്രീധനത്തെക്കുറിച്ചു പറഞ്ഞ് ഭർത്താവും ഭർത്താവിന്റെ വീട്ടുകാരും മാനസികമായി പീഡിപ്പിക്കുമായിരുന്നു. പിന്നീട് ഭർത്താവ് ജോലി ചെയ്യുന്ന സൗദി അറേബ്യയിലേക്കു കൊണ്ടുപോയി.
അവിടെവച്ചാണ് ശാരീരിക പീഡനം ആരംഭിക്കുന്നത്. ശരീരമാസകലം മർദനമേറ്റ പാടാണ്. കൊല്ലുക എന്ന ഉദ്ദേശ്യത്തോടെയാണ് ഭർത്താവിന്റെ ഉപദ്രവമെന്നും നാട്ടിലെത്തിയാൽ കൊല്ലുമെന്ന് ഭീഷണിപ്പെടുത്തിയെന്നും അഞ്ജു പറയുന്നു. മോശക്കാരിയാക്കുന്ന തരത്തിൽ നിർബന്ധിച്ചു തന്നെക്കൊണ്ട് പലതും പറയിച്ച് റെക്കോഡ് ചെയ്യിച്ച് നാട്ടുകാർക്കും ബന്ധുക്കൾക്കും അയച്ചു നൽകിയെന്നും അഞ്ജു മനോരമ ഓൺലൈനോടു പറഞ്ഞു.
‘ഡേറ്റ അനലിറ്റിക്സിൽ പിജി കഴിഞ്ഞതിനു തൊട്ടുപിന്നാലെയായിരുന്നു വിവാഹം. അച്ഛൻ മത്സ്യത്തൊഴിലാളിയും അമ്മ വീട്ടമ്മയുമാണ്. നന്ദുവുമായുള്ളത് അറേ‍ഞ്ച്ഡ് മാര്യേജായിരുന്നു. പരീക്ഷയെഴുതി രണ്ടാമത്തെ ദിവസമായിരുന്നു കല്യാണം. നാട്ടിൽ അന്വേഷിച്ചപ്പോഴും മോശം കാര്യങ്ങളൊന്നും കേട്ടില്ല. മദ്യപിക്കുമെന്ന് അറിയുമായിരുന്നു. വിവാഹത്തിനു മുൻപ് ഫോണിൽ സംസാരിക്കുമ്പോഴും കുറച്ചു സംശയം ഉള്ളതുപോലെ സംസാരിച്ചു.
അന്നു പക്ഷേ, വലിയ കാര്യമായി എടുത്തിരുന്നില്ല. വിവാഹം കഴിഞ്ഞപ്പോൾ മുതൽ ഇതു രൂക്ഷമായി. ഫോൺ നമ്പർ മാറ്റി പുതിയത് എടുപ്പിച്ചു. സുഹൃത്തുക്കളോട‌ു സംസാരിക്കുന്നതു വിലക്കി. വാട്സാപ്പും സോഷ്യൽ മീഡിയയിലെ അക്കൗണ്ടും എല്ലാം കാണിക്കണം.
വിവാഹം കഴിഞ്ഞ് അയാൾ ജോലിസ്ഥലത്തേക്കു പോയിട്ട് വിഡിയോകോൾ ചെയ്യുന്ന സമയത്ത് സ്ക്രീൻ റെക്കോഡ് ചെയ്യാൻ പറയും. വിവാഹം കഴിഞ്ഞ് ചെന്നപ്പോൾ മുതൽ സ്ത്രീധനം കുറഞ്ഞുപോയെന്നു പറഞ്ഞു വിഷമിപ്പിക്കും. സഹോദരിക്ക് ഇത്ര സ്ത്രീധനം കൊടുത്തു. എനിക്ക് കിട്ടിയതു കുറഞ്ഞുപോയി എന്നാണു പറയുക.
അയാൾക്കു നേരത്തെ ഒരു കാമുകി ഉണ്ടായിരുന്നു. അവരുമായി താരതമ്യപ്പെടുത്തി സംസാരിക്കും. ഒരിക്കൽ അവരുടെ ശരീരവും എന്റേതുമായി താരതമ്യപ്പെടുത്തി സംസാരിച്ചു. എന്നെ കാണാൻ അവരുടെ അത്ര ഭംഗിയില്ല. എന്റെ സ്റ്റാറ്റസിനു ചേരുന്നില്ല. എന്നൊക്കെയാണു പറയുക. പിന്നെ എന്തിനാണ് എന്നെ കല്യാണം കഴിച്ചതെന്ന് ഒരു തവണ ചോദിച്ചപ്പോൾ, അത് എനിക്ക് പറ്റിപ്പോയ തെറ്റാണെന്നാണ് അയാൾ പറഞ്ഞത്.
ഒരു ദിവസം ഞാൻ തിരിച്ചു വീട്ടിലേക്ക് പോന്നു. പിന്നീട് അവർ സ്നേഹം നടിച്ച് തിരിച്ചു വിളിച്ചുകൊണ്ടുപോയി. എന്റെ സർട്ടിഫിക്കറ്റ് ഒന്നും അന്ന് കിട്ടിയിരുന്നില്ല. അതുകൊണ്ട് ജോലിക്ക് പോകാൻ പറ്റില്ലായിരുന്നു. സർട്ടിഫിക്കറ്റ് കിട്ടുന്നതുവരെ ലൈഫ് എൻജോയ് ചെയ്യാമെന്നു പറഞ്ഞാണ് സൗദിയിലേക്കു കൂടെ കൊണ്ടുപോയത്.
സൗദിയിൽ എത്തിയപ്പോൾ മുതലാണ് മർദനം തുടങ്ങുന്നത്. ഫ്ലാറ്റിൽ അയാളും ഞാനും മാത്രമായിരുന്നു. കുക്കർ, ഇടികല്ല്, ചൂല്, മോപ്പ്, ബെൽറ്റ്, ലാപ്ടോപ് ചാർജർ അങ്ങനെ എല്ലാം ഉപയോഗിച്ചു തല്ലി. കത്തി കാണിച്ച് ഭീഷണിപ്പെടുത്തി. കുത്തി ഇറക്കി കൊല്ലും എന്നായിരുന്നു ഭീഷണി. അതുകൂടാതെ ഞാനൊരു മോശക്കാരിയാണെന്ന തരത്തിൽ എന്നെക്കൊണ്ടു തന്നെ കുറേ വൃത്തികെട്ട ഓഡിയോ നിർബന്ധിച്ച് റെക്കോഡ് ചെയ്യിച്ച് വീട്ടുകാർക്കും ബന്ധുക്കൾക്കും അയച്ചു.
വിവാഹത്തിനു മുമ്പും ശേഷവും മറ്റു പലരുമായി ലൈംഗികബന്ധമുണ്ടായിട്ടുണ്ടെന്നും അതിന്റെ ദൃശ്യങ്ങൾ അശ്ലീല സൈറ്റുകളിൽ അപ്‌ലോഡ് ചെയ്തിട്ടുണ്ടെന്നുമാണ് എന്നെക്കൊണ്ട് പറയിച്ച് റെക്കോഡ് ചെയ്തത്. അയാളെ ഡിവോഴ്സ് ചെയ്തശേഷം സെക്സ് റാക്കറ്റിൽ പ്രവർത്തിക്കാനാണ് ഇഷ്ടമെന്നു വരെ എന്നെക്കൊണ്ട് പറയിച്ചു.
ഇതിനുശേഷം എന്നെ നാട്ടിലേക്കു കയറ്റിവിടുകയായിരുന്നു. സൈക്കോപാത്തിനെപ്പോലെ ആയിരുന്നു അയാൾ പെരുമാറിക്കൊണ്ടിരുന്നത്. ഉപദ്രവിക്കുന്ന കാര്യമെല്ലാം അയാളുടെ വീട്ടുകാർക്കും അറിയമെന്ന് അഞ്ജു കൂട്ടിച്ചേർത്തു.
