ബാക്കിവന്ന കടലക്കറി എന്തുചെയ്യണമെന്നറിയില്ലേ? കേവലം മിനിറ്റുകൾ കൊണ്ട് ഹൈ-പ്രോട്ടീൻ കബാബ് ഉണ്ടാക്കുന്നത് എങ്ങനെ?

പുട്ടിനും ചപ്പാത്തിക്കുമൊക്കെ കൂട്ടായി കടലക്കറിയും ഉണ്ടാക്കാറില്ലേ. ചിലപ്പോഴൊക്കെ ഈ കറി മിച്ചംവരാറുമുണ്ടാകും. ഇങ്ങനെ ബാക്കിവരുന്ന കറി നിങ്ങൾ എന്താണ് ചെയ്യാറ്? കളയുകയാണോ? എന്നാലിനി ബാക്കിവന്ന കടലക്കറി കളയേണ്ട. ഇതുകൊണ്ട് നല്ല ഹൈ-പ്രോട്ടീൻ കബാബ് ഉണ്ടാക്കാം. എളുപ്പത്തിൽ തയ്യാറാക്കാവുന്ന സ്വാദിഷ്ടമായ കബാബ് റെസിപ്പി ഇതാ.

ചേരുവകൾ

ബാക്കി വന്ന കടല: ആവശ്യത്തിന്
ഉരുളക്കിഴങ്ങ്: 1-2 എണ്ണം (പുഴുങ്ങി ഉടച്ചത്)
കടലമാവ് : ആവശ്യത്തിന്
പൊടികൾ: ഉപ്പ്, മുളകുപൊടി, ഗരം മസാല
സവാള, മല്ലിയില, പച്ചമുളക് (ചെറുതായി അരിഞ്ഞത്)
ഇഞ്ചി വെളുത്തുള്ളി ചതച്ചെടുത്തത്
എണ്ണ: ആവശ്യത്തിന്

തയ്യാറാക്കുന്ന വിധം

കടല ​ഗ്രേവിയിൽ നിന്ന് മാറ്റിയ ശേഷം നന്നായി ഉടച്ചെടുക്കുക. ഗ്രേവി കട്ടിയുള്ളതാണെങ്കിൽ അതും കുറച്ച് ചേർക്കാവുന്നതാണ്. ഇതിലേക്ക് പുഴുങ്ങി ഉടച്ച ഉരുളക്കിഴങ്ങുകൾ ചേർക്കുക. ഇതിലേക്ക് കടലമാവ്, ഉപ്പ്, മുളകുപൊടി, ഗരം മസാല, അരിഞ്ഞ സവാള, മല്ലിയില, പച്ചമുളക്, ചതച്ച ഇഞ്ചി-വെളുത്തുള്ളി എന്നിവ ചേർക്കണം. ശേഷം നന്നായി കുഴച്ച് കബാബ് പരുവത്തിലാക്കുക. ഇനി കൈകളിൽ അല്പം എണ്ണ പുരട്ടിയ ശേഷം മിശ്രിതത്തിൽ നിന്ന് ചെറിയ കബാബുകൾ ഉണ്ടാക്കിയെടുക്കുക. ഒരു പാനിൽ എണ്ണ ചൂടാക്കി ഓരോന്നായി ഇട്ട് ഇരുവശവും ​ഗോൾഡൻ നിറമാകുന്നതുവരെ വറുത്തെടുക്കുക.