ജനശതാബ്ദി എക്സ്പ്രസില്‍ ഇന്നുമുതല്‍ യാത്ര സുഖകരമാകും. പുഷ്ബാക്ക് സീറ്റുകള്‍ ഇന്നുമുതല്‍ ട്രെയിനില്‍ സജ്ജമാകും. തിരുവനന്തപുരം- കണ്ണൂര്‍ ശതാബ്ദിയിലാണ് മാറ്റിയ കോച്ചുകള്‍ ആദ്യം നിലവില്‍ വരുന്നത്. എല്‍എച്ച്ബി നോണ്‍ എസി ചെയര്‍ കാറോടുകൂടിയ ശതാബ്ദി സര്‍വീസ് ഞായറാഴ്ച ആരംഭിക്കുമെന്ന് ദക്ഷിണ റെയില്‍വേ തിരുവനന്തപുരം ഡിവിഷന്‍ അറിയിച്ചു.
ജനശതാബ്ദിയിലെ നിലവിലെ കോച്ചുകള്‍ സംബന്ധിച്ച് വ്യാപക പരാതി ഉയര്‍ന്നിരുന്നു. ദീര്‍ഘദൂര യാത്രയ്ക്ക് അനുയോജ്യമല്ലാത്ത സീറ്റുകളെന്നായിരുന്നു പരാതി. ഇതേത്തുടര്‍ന്നാണ് പുതിയ സീറ്റുകളുള്ള കോച്ചുകള്‍ അനുവദിച്ചത്. പുഷ്ബാക്ക് സീറ്റുകളോടുകൂടിയ 16 കോച്ചുകള്‍ കഴിഞ്ഞ ദിവസം കൊച്ചുവേളിയില്‍ എത്തിച്ചിരുന്നു. അറ്റകുറ്റപ്പണി നടത്തിയ ശേഷമാണ് ഇവ ഉള്‍പ്പെടുത്തിയത്.
തിരുവനന്തപുരം- കോഴിക്കോട് ശതാബ്ദിയിലെ സീറ്റുകളില്‍ രണ്ടാംഘട്ടത്തില്‍ മാറ്റം വരുമെന്ന് റെയില്‍വേ അറിയിച്ചു. തിരുവനന്തപുരം- ഷൊര്‍ണൂര്‍ വേണാട് എക്സ്പ്രസില്‍ കഴിഞ്ഞദിവസം കൂടുതല്‍ യാത്രക്കാരെ ഉള്‍ക്കൊള്ളാന്‍ ശേഷിയുള്ള പുതിയ ജനറല്‍ സിറ്റിങ് കോച്ചുകള്‍ ഉള്‍പ്പെടുത്തിയിരുന്നു. പത്ത് പഴയ കോച്ചുകള്‍ മാറ്റിയാണ് പുതിയത് ഉള്‍പ്പെടുത്തിയത്. ഘട്ടംഘട്ടമായി ബാക്കി ജനറല്‍ കോച്ചുകളും മാറ്റുമെന്ന് റെയില്‍വേ അറിയിച്ചു.