അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.തെന്നിന്ത്യൻ സിനിമാപ്രേമികളുടെ പ്രിയതാരം കൃതി ഷെട്ടി ബോളിവുഡിലേക്ക് അരങ്ങേറ്റം കുറിക്കുന്നു. പ്രശസ്ത സംവിധായകൻ രോഹിത് ഷെട്ടി അവതരിപ്പിക്കുന്ന ‘ഹം തേരേ പ്യാർ മേം’ എന്ന റൊമാന്റിക് എന്റർടെയ്‌നർ ചിത്രത്തിലൂടെയാണ് താരത്തിന്റെ ഹിന്ദി സിനിമാപ്രവേശം.
രോഹിത് ഷെട്ടിയുടെ സഹസംവിധായികയായി കഴിഞ്ഞ 17 വർഷമായി പ്രവർത്തിക്കുന്ന വിധി ഘോഡ്ഗാവ്കറാണ് ഈ ചിത്രം സംവിധാനം ചെയ്യുന്നത്.
‘ഗോൽമാൽ 3’, ‘സിങ്കം’, ‘ചെന്നൈ എക്സ്പ്രസ്’, ‘ദിൽവാലെ’, ‘ഗോൽമാൽ എഗെയ്ൻ’ തുടങ്ങിയ സൂപ്പർഹിറ്റ് ബോളിവുഡ് ചിത്രങ്ങളിൽ അസിസ്റ്റന്റ് ഡയറക്ടറായി പ്രവർത്തിച്ച പരിചയസമ്പത്തുമായാണ് വിധി ഘോഡ്ഗാവ്കർ സ്വതന്ത്ര സംവിധായികയാകുന്നത്.
സിനിമയുടെ ചിത്രീകരണം ബുധനാഴ്ച ആരംഭിച്ചു. പൂജ ചടങ്ങുകളിൽ നിന്നുള്ള ക്ലാപ്പർബോർഡിന്റെ ചിത്രം രോഹിത് ഷെട്ടി തന്റെ ഇൻസ്റ്റാഗ്രാം സ്റ്റോറിയിലൂടെ പങ്കുവെക്കുകയും സംവിധായികയ്ക്ക് ആശംസകൾ നേരുകയും ചെയ്തു.
എവിഎസ് സ്റ്റുഡിയോസ്, ടുഡിപ് എന്റർടൈൻമെന്റ് എന്നിവർ ചേർന്ന് രോഹിത് ഷെട്ടിയുമായി സഹകരിച്ചാണ് ഈ ഹൃദയസ്പർശിയായ പ്രണയകഥ അവതരിപ്പിക്കുന്നത്. അഭിഷേക് എസ്. വ്യാസ്, പ്രിയങ്ക ചൗധരി എന്നിവരാണ് നിർമ്മാതാക്കൾ.
‘ഉപ്പേന’യിലൂടെ അരങ്ങേറ്റം കുറിച്ച കൃതി ഷെട്ടിയുടെതായി അനിൽ രവിപുടി സംവിധാനം ചെയ്യുന്ന ‘ജനുവരി 12 വിടുതലൈ’ എന്ന ബിഗ് ബജറ്റ് ചിത്രവും അണിയറയിൽ ഒരുങ്ങുന്നുണ്ട്.
