അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.സിഎംആർഎൽ-എക്സാലോജിക് കേസിൽ ഹൈക്കോടതി ഡിവിഷൻ ബെഞ്ചിന്റെ വിധി ചോദ്യം ചെയ്ത് മുഖ്യമന്ത്രി പിണറായി വിജയൻ സുപ്രീം കോടതിയിൽ അപ്പീൽ നൽകി. ഹർജി ഇന്ന് (ഒക്ടോബർ 16) തന്നെ സുപ്രീം കോടതിയുടെ പ്രത്യേക അവധിക്കാല ബെഞ്ച് പരിഗണിച്ചേക്കുമെന്നാണ് ലഭ്യമാകുന്ന വിവരം.
നവരാത്രി അവധി ദിവസങ്ങൾ വരുന്നതിനാൽ ജഡ്ജിമാരുടെ ലഭ്യത പരിശോധിച്ച് അവധിക്കാല ബെഞ്ച് ഹർജി രൂപീകരിക്കുമെന്നും, അതിന് സാധിച്ചില്ലെങ്കിൽ ഈ മാസം 26-ന് അപ്പീൽ പരിഗണിക്കുമെന്നും ചീഫ് ജസ്റ്റിസ് വ്യക്തമാക്കിയിട്ടുണ്ട്.
കേസിൽ പിണറായി വിജയന് വേണ്ടി മുതിർന്ന അഭിഭാഷകൻ സിദ്ധാർത്ഥ് ലുത്രയും, വീണ ടി., മുഹമ്മദ് റിയാസ് എന്നിവർക്കായി മുതിർന്ന അഭിഭാഷകൻ എൻ. ഹരിഹരനുമാണ് ഹാജരാകുന്നത്.
കേസിൽ സിംഗിൾ ബെഞ്ചിന്റെ നിർദ്ദേശപ്രകാരം വിജിലൻസ് രണ്ട് എഫ്ഐആറുകൾ രജിസ്റ്റർ ചെയ്തിരുന്നു. ഈ എഫ്ഐആറുകൾക്കെതിരെ അപ്പീൽ നൽകാൻ അനുമതി വേണമെന്ന ഹർജി ഇന്നലെ (ഒക്ടോബർ 15) ഹൈക്കോടതി ഡിവിഷൻ ബെഞ്ച് തള്ളിയിരുന്നു.
ഇതിനെ ചോദ്യം ചെയ്താണ് പിണറായി വിജയൻ ഉൾപ്പെടെയുള്ളവർ സുപ്രീം കോടതിയെ സമീപിച്ചിരിക്കുന്നത്. അപ്പീൽ ഹർജി സുപ്രീം കോടതി അടിയന്തരമായി പരിഗണിച്ചില്ലെങ്കിൽ, വരും ദിവസങ്ങളിൽ എൻഫോഴ്സ്‌മെന്റ് ഡയറക്ടറേറ്റിന് പിണറായി വിജയൻ ഉൾപ്പെടെയുള്ളവരെ ചോദ്യം ചെയ്യാൻ വിളിച്ചുവരുത്താൻ തടസ്സമുണ്ടാകില്ല. അതുകൊണ്ടുതന്നെ കേസിൽ ഇഡി തുടരന്വേഷണ നടപടികളുമായി മുന്നോട്ടുപോകാനുള്ള സാധ്യതയുമുണ്ട്.
