അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കടുത്ത വേനൽച്ചൂടിന് ആശ്വാസമായി ഖത്തറിൽ മഴയെത്തുന്നു. തിങ്കളാഴ്ച മുതൽ രാജ്യത്ത് ഒരാഴ്ച നീണ്ട മഴയ്ക്കു സാധ്യതയുണ്ടെന്ന് കാലാവസ്ഥാ നിരീക്ഷണ വകുപ്പ് അറിയിച്ചു. 42 ഡിഗ്രി സെൽഷ്യസാണ് ഇന്ന് രാജ്യത്ത് രേഖപ്പെടുത്തിയ ഏറ്റവും കൂടിയ താപനില.
രാജ്യത്തിന്റെ വിവിധ മേഖലകളിൽ ഒക്ടോബർ 19 തിങ്കളാഴ്ച മുതൽ ഒരാഴ്ചത്തേക്ക് മഴയ്ക്കുള്ള സാധ്യതയുണ്ടെന്നാണ് കാലാവസ്ഥാ നിരീക്ഷണ വകുപ്പിന്റെ പ്രവചനം. ചൊവ്വാഴ്ച ഇടിമിന്നലോടു കൂടിയുള്ള മഴയ്ക്കും സാധ്യതയുണ്ട്.
കാലാവസ്ഥാ മാറ്റത്തിൽ ജാഗ്രത വേണമെന്ന് അധികൃതർ ആവശ്യപ്പെട്ടു. കഴിഞ്ഞയാഴ്ച, തലസ്ഥാനമായ ദോഹയുടെ തെക്കുപടിഞ്ഞാറ് സ്ഥിതി ചെയ്യുന്ന അൽ കറാനയിൽ 10.7 മില്ലീമീറ്റർ മഴ ലഭിച്ചിരുന്നു. അൽ റയ്യാൻ മുനിസിപ്പാലിറ്റിയിലെ ബെയ്ദ് അൽ ഖായിൽ 6.3 മില്ലീമീറ്റർ മഴയും ലഭിച്ചു.
മൺസൂൺ സീസണിന് മുന്നോടിയായുള്ള കാലാവസ്ഥാ പ്രതിഭാസമായ അൽ ഹഖ്ബാൻ കാലയളവിലാണ് മഴപ്പെയ്ത്ത്. വേനൽച്ചൂടിൽനിന്ന് മിതമായ കാലാവസ്ഥയിലേക്കുള്ള മാറ്റത്തിന്റെ ഭാഗമായി അൽ വസ്മ് സീസൺ കഴിഞ്ഞ ദിവസം ആരംഭിച്ചിരുന്നു.
52 ദിവസം നീളുന്ന ഈ കാലയളവിൽ മഴയ്ക്കുള്ള സാധ്യത വർധിക്കും. രാത്രികാലങ്ങളിൽ ക്രമേണ തണുപ്പും അനുഭവപ്പെടും.
