അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.സി.എം.ആർ.എൽ.-എക്‌സാലോജിക് കേസിൽ പ്രതിപക്ഷ നേതാവ് പിണറായി വിജയനെതിരേ നടപടിയെടുക്കുന്നതിൽ യുഡിഎഫ് സർക്കാർ വിമുഖത കാണിക്കുന്നുവെന്ന ആക്ഷേപത്തിൽ കോൺഗ്രസിൽ ഭിന്നത രൂക്ഷമാകുന്നു. കേസിൽ ഭീഷണികൾ അതിജീവിച്ച് താൻ നടത്തിയ പോരാട്ടം എടുത്തുപറഞ്ഞ കോൺഗ്രസ് എംഎൽഎ മാത്യു കുഴൽനാടൻ, ജനം യുഡിഎഫിനെ തിരഞ്ഞെടുത്തയച്ചത് ഇതുപോലുള്ള അനീതികളോട് സന്ധിയില്ലാത്ത നിലപാടുകൾ സ്വീകരിക്കാനാണെന്ന് ഓർമ്മിപ്പിച്ചു. ഉമ്മൻ ചാണ്ടിക്കെതിരെ ബലാത്സംഗ കേസെടുത്തതടക്കം ചൂണ്ടിക്കാണിച്ച്, ഇതെല്ലാം തങ്ങൾ മറക്കണോ എന്ന് അദ്ദേഹം ചോദ്യം ചെയ്തു.
കോൺഗ്രസ് എംഎൽഎമാരായ സി.ആർ. മഹേഷ്, ചാണ്ടി ഉമ്മൻ, പാർട്ടി വക്താവ് ജിന്റോ ജോൺ അടക്കമുള്ളവരും സമാനമായ നിലപാടുകൾ കഴിഞ്ഞ ദിവസങ്ങളിൽ പങ്കുവെച്ചിരുന്നു. ഇ.ഡി. റിപ്പോർട്ടിനെ അടിസ്ഥാനമാക്കി പിണറായിക്കെതിരേ കേസെടുക്കണമായിരുന്നുവെന്ന് വാദിച്ച് ആദ്യം രംഗത്തുവന്നത് മാത്യു കുഴൽനാടൻ തന്നെയാണ്. മൂവാറ്റുപ്പുഴയിൽ നടന്ന പൊതുയോഗത്തിലും അദ്ദേഹം ഇക്കാര്യത്തിൽ വികാരഭരിതനായി സംസാരിച്ചു.
മാസപ്പടിയുമായി ബന്ധപ്പെട്ട് കടുത്ത ഭീഷണികളാണ് കുടുംബാംഗങ്ങൾക്ക് ഉൾപ്പെടെ നേരിടേണ്ടി വന്നതെന്ന് അദ്ദേഹം വ്യക്തമാക്കി. തനിക്കെതിരെയും കുടുംബത്തിനെതിരെയും നിരന്തരം ഭീഷണി ഫോൺ കോളുകൾ വന്നിരുന്നു. രാഷ്ട്രീയ എതിരാളികൾക്ക് നേരെ വിരലുയർത്തിയവരെ അവർ എങ്ങനെയാണ് കൈകാര്യം ചെയ്തതെന്ന് കേരളം കണ്ടതാണ്. എന്നിട്ടും ആക്ഷേപങ്ങളും പരിഹാസങ്ങളും ഏറ്റുവാങ്ങി താൻ പോരാട്ടം മുന്നോട്ടു കൊണ്ടുപോയി. ഒടുവിൽ പിണറായി വിജയനെതിരെ വിജിലൻസ് കേസ് എടുക്കാൻ ഹൈക്കോടതി ഉത്തരവിട്ട സന്ദർഭത്തിൽ സ്വാഭാവികമായും തനിക്ക് ആവേശം കൂടിയെന്നും അദ്ദേഹം പറഞ്ഞു.
വയലാർ രവിയാണ് തന്നെ രാഷ്ട്രീയത്തിലേക്ക് കൈപിടിച്ചു കൊണ്ടുവന്നതെന്നും കോളേജ് കാലഘട്ടത്തിൽ പ്രതിസന്ധികളിൽ ഒപ്പം നിന്നത് കെ. സുധാകരനാണെന്നും മാത്യു കുഴൽനാടൻ പറഞ്ഞു. വിട്ടുവീഴ്ച ചെയ്താൽ എതിരാളികൾ തലയിൽ കയറി നിരങ്ങുമെന്ന് കെ. സുധാകരൻ തങ്ങളെ പഠിപ്പിച്ചിട്ടുണ്ടെന്നും അദ്ദേഹം വ്യക്തമാക്കി. കൃപേഷ്, ശരത് ലാൽ അടക്കം എത്രയോ കോൺഗ്രസ് പ്രവർത്തകരുടെ ജീവനും ചോരയുമാണ് കമ്മ്യൂണിസ്റ്റ് പാർട്ടി എടുത്തത്. പിണറായി വിജയനോട് അനുകമ്പ തോന്നുക പ്രയാസമാണ്. ഉമ്മൻ ചാണ്ടിയെ സിബിഐയുടെ കയ്യിലേക്ക് എറിഞ്ഞുകൊടുത്ത ആളാണ് പിണറായി വിജയൻ. അങ്ങനെയുള്ള ആളാണ് ഇന്ന് ഇഡിയുടെ പേരിൽ കേസ് എടുത്താൽ നിങ്ങൾ ബിജെപിക്കൊപ്പമാണെന്ന് പറയുന്നതെന്നും അദ്ദേഹം കുറ്റപ്പെടുത്തി.
“ഇതെല്ലാം ഞങ്ങൾ മറക്കണമോ? ഈ പാർട്ടിയും പ്രവർത്തകരും ഇതെല്ലാം മറക്കണമെന്ന് പറയാൻ കഴിയുമോ?” എന്ന് ചോദിച്ച മാത്യു കുഴൽനാടൻ, ഇത് പിണറായി വിജയനെതിരെയുള്ള വ്യക്തിപരമായ പോരാട്ടമല്ലെന്നും കോൺഗ്രസിന്റെ ആത്മാഭിമാനം ഉയർത്തിപ്പിടിക്കാനുള്ള രാഷ്ട്രീയ പോരാട്ടമാണെന്നും വ്യക്തമാക്കി. പ്രവർത്തകരുടെ ചോര ചിന്തിയതിന് വേണ്ടി അവരുടെ മുഖത്തുനോക്കി ചോദിക്കാൻ കിട്ടുന്ന അവസരം പാഴാക്കാനല്ല, മറിച്ച് ഉച്ചത്തിൽ ചോദിക്കാനാണ് ജനം 102 എംഎൽഎമാരെ നൽകി യുഡിഎഫ് സർക്കാരിനെ അധികാരത്തിലേറ്റിയത്. അനീതികളോട് സന്ധിയില്ലാത്ത നിലപാടുകൾ സ്വീകരിക്കാനാണ് ജനങ്ങൾ തങ്ങളെ തിരഞ്ഞെടുത്തതെന്നും അദ്ദേഹം ഓർമ്മിപ്പിച്ചു.
