അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.രാജ്യത്തെ ഏറ്റവും വലിയ പൊതുമേഖലാ ബാങ്കായ സ്റ്റേറ്റ് ബാങ്ക് ഓഫ് ഇന്ത്യയില്‍ (SBI) 3,897 ഉപയോക്താക്കളുടെ നിര്‍ണായക വിവരങ്ങള്‍ ഡാര്‍ക്ക് വെബില്‍ ചോര്‍ന്നതായി ബാങ്ക് സ്ഥിരീകരിച്ചു. കസ്റ്റമര്‍ ഐഡി, മൊബൈല്‍ നമ്പര്‍, വായ്പാ വിവരങ്ങള്‍ എന്നിവ ചോര്‍ന്ന സാഹചര്യത്തില്‍, തട്ടിപ്പുകാരുടെ വ്യാജ കോളുകളില്‍ വീഴാതിരിക്കാന്‍ അക്കൗണ്ട് ഉടമകളും യോനോ (YONO) ഉപയോക്താക്കളും സ്വീകരിക്കേണ്ട അടിയന്തര സുരക്ഷാ ക്രമീകരണങ്ങള്‍ പരിശോധിക്കാം.
എസ്ബിഐയുടെ വിശദീകരണം3,897 ഉപയോക്താക്കളുടെ വ്യക്തിഗത വിവരങ്ങള്‍ ഡാര്‍ക്ക് വെബില്‍ (Dark Web) ചോര്‍ന്നിട്ടുണ്ടെന്ന് സ്റ്റേറ്റ് ബാങ്ക് ഓഫ് ഇന്ത്യ സ്ഥിരീകരിച്ചു. ഈ ഡാറ്റാ ചോര്‍ച്ച ബാങ്കിന്റെ അടിസ്ഥാന പ്രവര്‍ത്തനങ്ങളെയോ, സാമ്പത്തിക നിലയെയോ, ബിസിനസിനെയോ ബാധിക്കില്ലെന്ന് എസ്ബിഐ വ്യക്തമാക്കിയിട്ടുണ്ട്. ചോര്‍ച്ചയുടെ വ്യാപ്തിയും, സ്വഭാവവും കൃത്യമായി കണ്ടെത്താന്‍ ഒരു സ്വതന്ത്ര സൈബര്‍ സെക്യൂരിറ്റി ഏജന്‍സിയെ അന്വേഷണത്തിനായി ബാങ്ക് നിയോഗിച്ചിട്ടുണ്ട്.
- സൈബര്‍ അറ്റാക്കിന് പിന്നില്‍ ആര്
നിലവില്‍ ഈ സൈബര്‍ ആക്രമണം നടത്തിയത് ഏത് ഹാക്കര്‍ ഗ്രൂപ്പാണെന്നോ, ആരാണെന്നോ ഉള്ള വിവരങ്ങള്‍ പുറത്തുവന്നിട്ടില്ല. ഏജന്‍സികളുടെ വിശദമായ അന്വേഷണം നടന്നുകൊണ്ടിരിക്കുകയാണ്.
- എന്തൊക്കെ വിവരങ്ങളാണ് ചോര്‍ന്നത്
റിപ്പോര്‍ട്ടുകള്‍ പ്രകാരം ഉപയോക്താക്കളുടെ വളരെ പ്രധാനപ്പെട്ട വ്യക്തിഗത വിവരങ്ങളാണ് (Personally Identifiable Information) ചോര്‍ന്നിരിക്കുന്നത്. ഉപയോക്താക്കളുടെ പേര്, മൊബൈല്‍ നമ്പര്‍, ജനനത്തീയതി, ഇമെയില്‍ വിലാസം, താമസസ്ഥലത്തെ വിലാസം, കസ്റ്റമര്‍ ഐഡികള്‍, വായ്പാ വിവരങ്ങള്‍ എന്നിവ ചോര്‍ന്നിട്ടുണ്ട്.
- ഉപയോക്താക്കള്‍ എന്തുചെയ്യണം
വ്യക്തിഗത വിവരങ്ങളും, ഫോണ്‍ നമ്പറും ചോര്‍ന്നതിനാല്‍ തട്ടിപ്പുകാര്‍ എസ്ബിഐ ഉദ്യോഗസ്ഥരാണെന്ന വ്യാജേന നിങ്ങളെ ബന്ധപ്പെടാന്‍ സാധ്യതയുണ്ട്. ഇതില്‍ വീഴാതിരിക്കുക. കടുത്ത ജാഗ്രത പാലിക്കുക. ഫോണ്‍ കോളിലൂടെയോ, മെസേജിലൂടെയോ ഒടിപി, പാസ്വേഡ്, എടിഎം പിന്‍, സിവിവി എന്നിവ ആര്‍ക്കും കൈമാറരുത്. ബാങ്ക് ഒരിക്കലും ഇത്തരം വിവരങ്ങള്‍ ഫോണിലൂടെ ചോദിക്കില്ല.
നിങ്ങളുടെ ബാങ്ക് സ്റ്റേറ്റ്‌മെന്റുകള്‍ കൃത്യമായി പരിശോധിക്കുക. സംശയാസ്പദമായ എന്തെങ്കിലും ഇടപാടുകള്‍ കണ്ടാല്‍ ഉടന്‍ ബാങ്കിനെ അറിയിക്കുക. സുരക്ഷാ മുന്‍കരുതല്‍ എന്ന നിലയില്‍ ഇന്റര്‍നെറ്റ് ബാങ്കിംഗ്, യോനോ (YONO) ആപ്പ് എന്നിവയുടെ പാസ്വേഡുകള്‍ ഉടന്‍ മാറ്റുക. എസ്എംഎസ്, വാട്സ്ആപ്പ്, ഇമെയില്‍ എന്നിവ വഴി വരുന്ന സംശയാസ്പദമായ ലിങ്കുകളില്‍ ക്ലിക്ക് ചെയ്യരുത്.
- ശ്രദ്ധിക്കേണ്ട കാര്യങ്ങള്‍
കേരളത്തില്‍ സമീപകാലത്തായി ഓണ്‍ലൈന്‍ തട്ടിപ്പുകള്‍ വ്യാപകമാണ്. മലയാളത്തില്‍ തന്നെ സംസാരിച്ച്, ബാങ്ക് മാനേജരാണെന്നോ കസ്റ്റമര്‍ കെയറില്‍ നിന്നാണെന്നോ പറഞ്ഞ് വരുന്ന കോളുകളെ പ്രത്യേകം സൂക്ഷിക്കുക. ചോര്‍ന്ന വിവരങ്ങളില്‍ വായ്പാ വിവരങ്ങള്‍ ഉള്‍പ്പെടുന്നതിനാല്‍, വായ്പ തിരിച്ചടക്കാനുണ്ടെന്നോ, പ്രത്യേക സെറ്റില്‍മെന്റ് ഓഫര്‍ ഉണ്ടെന്നോ പറഞ്ഞ് വരുന്ന കോളുകള്‍ വിശ്വസിക്കരുത്. പണം അടക്കാന്‍ ആവശ്യപ്പെട്ടാല്‍ നേരിട്ട് നിങ്ങളുടെ എസ്ബിഐ ബ്രാഞ്ചില്‍ പോയി മാത്രം കാര്യങ്ങള്‍ അന്വേഷിക്കുക. ബാങ്കുമായി എന്തെങ്കിലും വിവരങ്ങള്‍ സംസാരിക്കാനുണ്ടെങ്കില്‍ പാസ്ബുക്കിലോ, ഔദ്യോഗിക വെബ്സൈറ്റിലോ ഉള്ള ടോള്‍ ഫ്രീ നമ്പര്‍ മാത്രം ഉപയോഗിക്കുക. ഗൂഗിളില്‍ തിരയുമ്പോള്‍ ലഭിക്കുന്ന നമ്പറുകള്‍ ചിലപ്പോള്‍ തട്ടിപ്പുകാരുടേതാകാം.
