അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.തിരക്കുകളിൽ നിന്ന് മാറി സഞ്ചാരികൾ ഏറെയെത്താത്ത രഹസ്യ ഇടങ്ങൾ തേടാൻ ഇഷ്ടപ്പെടുന്നവരാണോ നിങ്ങൾ? എങ്കിൽ അധികമാരും കണ്ടിട്ടില്ലാത്ത, കോഴിക്കോടിന്റെ കാടുകൾക്കുള്ളിലെ അത്രകണ്ട് സുപരിചിതമല്ലാത്ത ഒരു മനോഹര ഇടത്തിലേക്ക് പോകാം – അതാണ് കക്കയത്തിന് സമീപമുള്ള ഉരക്കുഴി വെള്ളച്ചാട്ടം.
പ്രകൃതിയുടെ മടിത്തട്ടിൽ ഒളിഞ്ഞിരിക്കുന്ന ഈ വെള്ളച്ചാട്ടം അതിന്റെ ഭംഗികൊണ്ട് ഏതൊ ഒരാളെയും അമ്പരപ്പിക്കും. കൊടും വനങ്ങളും കൂറ്റൻ പാറക്കൂട്ടങ്ങളും അതിരിടുന്ന ഈ പ്രദേശം കാഴ്ചയിൽ അതിമനോഹരമാണെങ്കിലും അൽപം സാഹസികത നിറഞ്ഞതാണ് ഇവിടേക്കുള്ള യാത്ര.
നൂറ്റാണ്ടുകളായി വെള്ളം വീണ് പാറക്കല്ലുകളിൽ ഉരൽ പോലെ കുഴികൾ രൂപപ്പെട്ടതിനാലാണ് ഈ സ്ഥലത്തിന് ‘ഉരക്കുഴി’ എന്ന പേര് ലഭിച്ചത്. വെള്ളച്ചാട്ടത്തിന് സമീപം ഒരു പാലമുണ്ട്. ഭൂരിഭാഗം ആളുകളും ഈ ഡെക്കിൽ നിന്നാണ് വെള്ളച്ചാട്ടത്തിന്റെ സൗന്ദര്യം ആസ്വദിക്കുന്നത്.
വെള്ളച്ചാട്ടത്തിന് ചുറ്റും കൂറ്റൻ പാറകളും ആഴമുള്ള കുഴികളും ഉള്ളതിനാൽ വെള്ളത്തിന് വളരെ അടുത്തെത്തുന്നത് അതീവ അപകടകരമാണ്. കാഴ്ചയുടെ മനോഹാരിതയേക്കാൾ സ്വന്തം സുരക്ഷയ്ക്ക് മുൻഗണന നൽകി വേണം ഇവിടെ സന്ദർശിക്കാൻ.
കക്കയം അണക്കെട്ടിന് വളരെ അടുത്തായതുകൊണ്ട് തന്നെ ഡാമും പരിസരവും സന്ദർശിച്ചുകൊണ്ട് ഈ യാത്ര കൂടുതൽ ആസ്വാദ്യകരമാക്കാം. അണക്കെട്ടിന് സമീപം ഒരു ചെറിയ പിക്‌നിക്കും പ്ലാൻ ചെയ്യാം.
എത്തിച്ചേരാൻ: ചെളിക്കുഴിയിൽനിന്ന് വെറും ആറു കിലോമീറ്റർ യാത്ര ചെയ്താൽ മാങ്കോട്-രാജഗിരി റോഡിലെ ഉരക്കുഴി വെള്ളച്ചാട്ടത്തിലെത്താം. തട്ടുതട്ടായി വെള്ളം ചിതറി ഒഴുകുന്ന ഈ പ്രദേശത്തിന്റെ ജൈവികമായ സൗന്ദര്യം യാത്രക്കാരുടെ മനസ്സ് നിറയ്ക്കും തീർച്ച.
