അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ചില്ല് ജാലകത്തിനപ്പുറം പുകമഞ്ഞുപോലെ പെയ്തിറങ്ങുന്ന നേർത്ത കുളിരിലേക്ക് കണ്ണുതുറക്കുമ്പോൾ, പ്രകൃതി നമ്മളോട് ചില രഹസ്യങ്ങൾ പറഞ്ഞുതുടങ്ങും. കായൽക്കാഴ്ചകളുടെ നാട്ടിൽ നിന്ന് വയനാടൻ മലനിരകളുടെ ഹൃദയഭൂമിയിലേക്ക് വണ്ടികയറുമ്പോൾ മനസ്സിൽ ഒരേയൊരു ലക്ഷ്യം മാത്രമേ ഉണ്ടായിരുന്നുള്ളൂ—ഐതിഹ്യങ്ങളും കാനനഭംഗിയും ഉറങ്ങുന്ന തിരുനെല്ലി എന്ന പവിത്ര ഭൂമി.
പുകമഞ്ഞ് കണ്ണാരംപൊത്തുന്ന കാനനപാതകൾ
ബ്രഹ്മഗിരി മലനിരകളുടെ നെറുകയിൽ നിന്നും തണുത്ത കാറ്റ് വീശിയടിക്കുമ്പോൾ, കാടിനുള്ളിലെ ഏറുമാടങ്ങളും ആദിവാസി സങ്കേതങ്ങളും ഗതകാല വയനാടൻ തണുപ്പിന്റെ ഓർമ്മകളിൽ നിശബ്ദമായിുണരുകയാണ്. ലക്ഷ്യസ്ഥാനത്തേക്ക് അടുക്കുന്തോറും അന്തരീക്ഷത്തിലെ തണുപ്പിന് വീര്യം കൂടുന്നു. വഴിയിലുടനീളം പ്രകൃതി മഞ്ഞു പുക വിതറി നമ്മളോട് കണ്ണാരംപൊത്തിക്കളിക്കും. മരക്കൂട്ടങ്ങൾക്കിടയിലൂടെ എപ്പോഴെങ്കിലും പ്രത്യക്ഷപ്പെട്ടേക്കാവുന്ന കാട്ടുമൃഗങ്ങളെ പ്രതീക്ഷിച്ചുള്ള ആ യാത്ര സഞ്ചാരികളിൽ സമ്മാനിക്കുന്നത് വേറിട്ടൊരു ആവേശമാണ്.
പാപനാശിനിയുടെ ചിലങ്കനാദവും പ്രഭാത ദർശനവും
അതിരാവിലെ തന്നെ തിരുനെല്ലി ഉണർന്നു കഴിഞ്ഞു. തണുപ്പിനെ വെല്ലുവിളിച്ച് ക്ഷേത്രനടയിൽ ഭക്തരുടെ തിരക്ക് കാണാം. വശങ്ങളിലൂടെ ആവിപറത്തി ഒഴുകുന്ന ‘പാപനാശിനി’ അരുവി വയനാടൻ പ്രഭാതത്തിന് മനോഹരമായൊരു പശ്ചാത്തലമൊരുക്കുന്നു.
കേവലം ഒരു തീർത്ഥാടന കേന്ദ്രം മാത്രമല്ല തിരുനെല്ലി. കാടുകളിൽ മറഞ്ഞുകിടക്കുന്ന ഒരു രാജധാനിയുടെ ചരിത്രമാണ് ഇതിന് പറയാനുള്ളത്. പതിമൂന്നാം നൂറ്റാണ്ടിലെ ‘ഉണ്ണിയച്ചീ ചരിത്രത്തിൽ’ ഇതിനെക്കുറിച്ച് സൂചനകളുണ്ട്. സമ്പൽ സമൃദ്ധമായ ഒരു പരിഷ്കൃത സംസ്കാരം പണ്ട് ഈ വനാന്തരങ്ങളിൽ നിലനിന്നിരുന്നുവെന്ന് ചരിത്രം നമ്മെ ഓർമ്മിപ്പിക്കുന്നു.
ബ്രഹ്മാവ് കണ്ട നെല്ലിമരവും ഐതിഹ്യവും
തിരുനെല്ലിയുടെ ഐതിഹ്യം ഏറെ കൗതുകമുണർത്തുന്ന ഒന്നാണ്. പണ്ട് ലോകസഞ്ചാരത്തിനിറങ്ങിയ സാക്ഷാൽ ബ്രഹ്മാവ് ബ്രഹ്മഗിരിയിലെ അപാരമായ വനഭംഗി കണ്ട് മയങ്ങിപ്പോയി. പ്രകൃതിസൗന്ദര്യത്തിൽ മനസ്സ് നിറഞ്ഞ അദ്ദേഹം ഇവിടം അപര വിഷ്ണുലോകമാണെന്ന് സങ്കൽപ്പിച്ചു.
തുടർന്ന്, ചെമ്പകവും അശോകവും പൂത്തുലഞ്ഞുനിൽക്കുന്ന ആ വനമധ്യത്തിൽ ദിവ്യമായൊരു നെല്ലിമരം അദ്വൈത ചൈതന്യത്തോടെ നൽക്കുന്നത് ബ്രഹ്മാവിന്റെ ദൃഷ്ടിയിൽപ്പെട്ടു. അവിടെ വിഷ്ണു സാന്നിധ്യം അനുഭവിച്ചറിഞ്ഞ ബ്രഹ്മാവ്, ഭഗവാനെ അവിടെ പ്രതിഷ്ഠിക്കുകയും നാരദമുനി സഹസ്ര കുംഭോദകം കൊണ്ട് അഭിഷേകം നടത്തുകയും ചെയ്തു. പ്രത്യക്ഷനായ വിഷ്ണുഭഗവാൻ, ബ്രഹ്മാവിന്റെ ആഗ്രഹപ്രകാരം അവിടെ നിത്യസാന്നിധ്യമായി നിലകൊള്ളാൻ അനുഗ്രഹിച്ചു. അങ്ങനെയാണ് ഈ പുണ്യഭൂമി ‘സസ്യാമലകക്ഷേത്രം’ എന്ന പേരിൽ അറിയപ്പെടാൻ തുടങ്ങിയത്.
പ്രകൃതിസ്നേഹികളുടെ സ്വർഗ്ഗരാജ്യം
ഇന്ന് പാപമുക്തി തേടിയെത്തുന്ന ഭക്തരേക്കാൾ ഏറെ, പ്രകൃതിയെ പ്രണയിക്കുന്ന സഞ്ചാരികളാണ് തിരുനെല്ലിയിലേക്ക് ഒഴുകിയെത്തുന്നത്. നാസ്തികരുടെ പോലും മനസ്സ് നിറയ്ക്കുന്ന ഹരിത മലനിരകളും, നീലാകാശവും, പത്മതീർത്ഥക്കരയിലെയും ഗുണ്ഡികയിലെയും പുരാതനമായ കാഴ്ചകളും നമ്മെ മറ്റൊരു ലോകത്തേക്ക് കൂട്ടിക്കൊണ്ടുപോകും.
മടക്കയാത്രയിൽ മനസ്സ് പറയും, “ഇവിടേക്ക് ഇനിയും ഒരുവട്ടം കൂടി വരണം.” അതെ, ബ്രഹ്മഗിരിയുടെ സാന്ദ്രനീലഗരിമയും പാപനാശിനിയുടെ പാട്ടും മനസ്സിൽ നിന്ന് അത്രവേഗം മാഞ്ഞുപോകില്ല!
