അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.എല്ലാ പൗരന്മാര്‍ക്കും അടിസ്ഥാന ബാങ്കിംഗ് സേവനങ്ങളും സാമൂഹിക സുരക്ഷാ പദ്ധതികളും ലഭ്യമാക്കുക എന്ന ലക്ഷ്യത്തോടെ, കേന്ദ്ര ധനകാര്യ മന്ത്രാലയത്തിന് കീഴിലുള്ള ധനകാര്യ സേവന വകുപ്പ് 2026 ഒക്ടോബര്‍ 21 മുതല്‍ ഡിസംബര്‍ 31 വരെ രാജ്യവ്യാപകമായി സാമ്പത്തിക ഉള്‍പ്പെടുത്തല്‍ സമ്പൂര്‍ണതാ ക്യാമ്പയിന്‍ സംഘടിപ്പിക്കും.
കേരളത്തില്‍ സംസ്ഥാനതല ബാങ്കേഴ്‌സ് സമിതി (SLBC), സംസ്ഥാന ഗവണ്‍മെന്റ്, ലീഡ് ഡിസ്ട്രിക്ട് മാനേജര്‍മാര്‍ (LDMS), ജില്ലാ ഭരണകൂടങ്ങള്‍, ബാങ്കുകള്‍ എന്നിവയുടെ ഏകോപനത്തോടെ ഗ്രാമപഞ്ചായത്തുകളിലും നഗര തദ്ദേശ സ്വയംഭരണ സ്ഥാപനങ്ങളിലും പ്രത്യേക ക്യാമ്പുകള്‍ സംഘടിപ്പിക്കും. ക്യാമ്പയിന്‍ കാലയളവില്‍ ഓരോ ഗ്രാമപഞ്ചായത്തിലും നഗര തദ്ദേശ സ്വയംഭരണ സ്ഥാപനത്തിലും കുറഞ്ഞത് ഒരു ക്യാമ്പെങ്കിലും സംഘടിപ്പിക്കുന്നുവെന്ന് ഉറപ്പാക്കും.
പ്രധാനമന്ത്രി ജന്‍ധന്‍ യോജന (PMJDY) പ്രകാരം ബാങ്ക് അക്കൗണ്ടുകള്‍ തുറക്കുക, പ്രത്യേകിച്ച് അതീവ ദുര്‍ബല ഗോത്രവിഭാഗങ്ങളിലെ (PVTG) കുടുംബങ്ങള്‍ക്ക് ബാങ്കിംഗ് സേവനങ്ങള്‍ ലഭ്യമാക്കുക, പ്രധാനമന്ത്രി ജീവന്‍ ജ്യോതി ബീമാ യോജന (PMJJBY), പ്രധാനമന്ത്രി സുരക്ഷാ ബീമാ യോജന (PMSBY), അടല്‍ പെന്‍ഷന്‍ യോജന (APY) എന്നിവയില്‍ അര്‍ഹരായവരെ അംഗങ്ങളാക്കുക, നിലവിലുള്ള അക്കൗണ്ടുകളുടെ റീ-KYC നടപടികള്‍ പൂര്‍ത്തിയാക്കുക, മുടങ്ങിക്കിടക്കുന്ന ആധാര്‍ സീഡിംഗ്, C-KYC നടപടികള്‍ പൂര്‍ത്തിയാക്കുക, പ്രവര്‍ത്തനരഹിതമായ അക്കൗണ്ടുകള്‍ വീണ്ടും പ്രവര്‍ത്തനക്ഷമമാക്കുക, അവകാശവാദമുന്നയിക്കപ്പെടാത്ത സാമ്പത്തിക ആസ്തികള്‍ കണ്ടെത്തി തിരികെ ലഭ്യമാക്കുന്നതിനുള്ള മാര്‍ഗനിര്‍ദേശങ്ങള്‍ നല്‍കുക, ബാങ്ക് അക്കൗണ്ടുകളിലും മറ്റ് അര്‍ഹമായ ബാങ്കിംഗ് സൗകര്യങ്ങളിലും നോമിനേഷന്‍ ചേര്‍ക്കുക എന്നിവയാണ് , ക്യാമ്പയിന്റെ പ്രധാന ലക്ഷ്യങ്ങള്‍. സാമ്പത്തിക സാക്ഷരതയെക്കുറിച്ചും ഡിജിറ്റല്‍ തട്ടിപ്പുകള്‍ തടയുന്നതിനെക്കുറിച്ചും ബോധവല്‍ക്കരണ പരിപാടികളും സംഘടിപ്പിക്കും.
അര്‍ഹരായ എല്ലാ പൗരന്മാരും ക്യാമ്പുകളില്‍ പങ്കെടുത്ത് ലഭ്യമായ സേവനങ്ങള്‍ പ്രയോജനപ്പെടുത്തണമെന്ന് SLBC കേരളം അഭ്യര്‍ഥിച്ചു. ബാങ്കിംഗ് നടപടികള്‍ പൂര്‍ത്തിയാക്കുന്നതിനും അര്‍ഹമായ പദ്ധതികളെക്കുറിച്ചുള്ള വിവരങ്ങള്‍ ലഭിക്കുന്നതിനും പൊതുജനങ്ങള്‍ക്ക് ക്യാമ്പയിന്‍ കാലയളവില്‍ അതത് ബാങ്ക് ശാഖകളെ സമീപിക്കാം. പ്രധാനമന്ത്രി ജീവന്‍ ജ്യോതി ബീമാ യോജന (PMJJBY), പ്രധാനമന്ത്രി സുരക്ഷാ ബീമാ യോജന (PMSBY) എന്നിവയില്‍ അംഗത്വം നല്‍കുന്നത് ഗുണഭോക്താവിന്റെ വ്യക്തമായ സമ്മതം ലഭിച്ചതിനുശേഷം മാത്രമായിരിക്കും.
