വന്ദേമാതരം പൂ‍ർണമായി ആലപിക്കണമെന്ന ഉത്തരവ് ചോദ്യം ചെയ്ത് ഹ​ർജി; കേന്ദ്രത്തിന് നോട്ടീസ് അയച്ച് സുപ്രീം കോടതി

ഔദ്യോഗിക സർക്കാർ ചടങ്ങുകളിൽ ദേശീയഗാനമായ വന്ദേമാതരത്തിന്റെ ആറ് ചരണങ്ങളും ആലപിക്കണമെന്ന കേന്ദ്ര ആഭ്യന്തര മന്ത്രാലയത്തിന്റെ ഉത്തരവുകളെ ചോദ്യം ചെയ്തുള്ള രണ്ട് ഹർജികളിൽ സുപ്രീംകോടതി കേന്ദ്ര സർക്കാരിന്റെ മറുപടി തേടി. ചീഫ് ജസ്റ്റിസ് സൂര്യകാന്ത്, ജസ്റ്റിസുമാരായ ജോയ്മാല്യ ബാഗ്ചി, വി മോഹന എന്നിവരടങ്ങിയ ബെഞ്ചാണ് ചൊവ്വാഴ്ച ഹർജികളിൽ നോട്ടീസ് അയച്ചത്. വന്ദേമാതരത്തിന്റെ പൂർണരൂപം നിർബന്ധമാക്കുന്ന സർക്കാർ ഉത്തരവുകൾ മുസ്‌ലിം വിരുദ്ധ നിലപാടുകൾക്ക് വഴിയൊരുക്കുന്നതാണെന്ന് ഒരു ഹർജി ആരോപിക്കുമ്പോൾ വന്ദേമാതരത്തിൻ്റെ പൂർണരൂപത്തെ ‘മതയുദ്ധ ഗാനം’ എന്നാണ് മറ്റൊരു ഹർജി ആരോപിക്കുന്നത്. 2026 ജനുവരി 28, ജൂലൈ 9 തീയതികളിൽ കേന്ദ്ര ആഭ്യന്തര മന്ത്രാലയം പുറപ്പെടുവിച്ച ഉത്തരവുകളെയാണ് ഹർജികൾ ചോദ്യം ചെയ്യുന്നത്. നിശ്ചിത ഔദ്യോഗിക ചടങ്ങുകളിൽ ദേശീയഗാനമായ വന്ദേമാതരത്തിന്റെ ആറ് ചരണങ്ങളും ആലപിക്കണമെന്നാണ് ഉത്തരവുകളിലെ നിർദേശം.

നാഗ്പുർ ആസ്ഥാനമായി പ്രവർത്തിക്കുന്ന ബുദ്ധമത പ്രവർത്തകനും പൗരാവകാശ പ്രവർത്തകനുമായ ബി ഡി ബോർകറാണ് ഒരു ഹർജി സമർപ്പിച്ചത്. ദീർഘകാലമായി പിന്തുടർന്നുവന്ന രണ്ട് ചരണങ്ങൾ മാത്രമുള്ള വന്ദേമാതരത്തിന്റെ ആലാപനരീതിക്ക് പകരം, മുസ്‌ലിം വിരുദ്ധ പരാമർശങ്ങളുള്ള ഗാനത്തിന്റെ പൂർണരൂപം നിർബന്ധമാക്കുന്നത് നിയമവിരുദ്ധമാണെന്നാണ് അദ്ദേഹത്തിന്റെ വാദം. 1870-കളുടെ തുടക്കത്തിൽ രചിക്കപ്പെട്ട വന്ദേമാതരത്തിന്റെ ആദ്യരൂപം ബങ്കിംചന്ദ്ര ചാറ്റർജി രചിച്ച ‘ആനന്ദമഠം’ എന്ന നോവലിന് മുമ്പുള്ളതാണെന്ന് ഹർജിയിൽ ചൂണ്ടിക്കാട്ടുന്നു. പ്രകൃതിയുടെ സൗന്ദര്യത്തെയും ഭൂപ്രകൃതിയെയും പ്രകീർത്തിക്കുന്ന ഈ ആദ്യരൂപത്തിൽ മതദൈവങ്ങളെക്കുറിച്ചുള്ള പരാമർശങ്ങളോ മതവിഭാഗങ്ങൾ തമ്മിലുള്ള സംഘർഷങ്ങളോ ഉണ്ടായിരുന്നില്ലെന്നും ഹർജിയിൽ പറയുന്നു. എന്നാൽ, ‘ആനന്ദമഠം’ എന്ന നോവലിൽ ഉൾപ്പെടുത്തിയിട്ടുള്ള മൂന്നുമുതൽ ആറുവരെയുള്ള ചരണങ്ങളിൽ ദുർഗ, ലക്ഷ്മി, സരസ്വതി എന്നീ ഹിന്ദു ദേവതകളെക്കുറിച്ചുള്ള പരാമർശങ്ങളുണ്ടെന്നും മുസ്‌ലിംകളെ ശത്രുക്കളായി ചിത്രീകരിച്ച് അവർക്കെതിരായ യുദ്ധത്തിന് ആഹ്വാനം ചെയ്യുന്ന ആശയങ്ങൾ ഉൾക്കൊള്ളുന്നുവെന്നും ഹർജിയിൽ ആരോപിക്കുന്നുണ്ട്. വന്ദേമാതരത്തിന്റെ ആറ് ചരണങ്ങളും നിർബന്ധമായും ആലപിക്കാൻ പൗരന്മാരോട് ആവശ്യപ്പെടുന്നത് ദേശീയ ഐക്യത്തെ ദുർബലപ്പെടുത്തുകയും മതസമുദായങ്ങൾക്കിടയിലെ ഭിന്നത വർധിപ്പിക്കുകയും ചെയ്യുമെന്നാണ് ബോർകറിന്റെ വാദം.

മുൻ ഐഎഎസ് ഉദ്യോഗസ്ഥനും പട്ടികജാതി-പട്ടികവർഗ വിഭാഗങ്ങളുടെ ഉന്നമനത്തിനായി പ്രവർത്തിക്കുന്ന അനുപാതിക പ്രതിനിധ്യ പ്രക്ഷോഭ സമിതി (എപിപിഎസ്) ചെയർമാനുമായ ബാലകൃഷ്ണൻ സത്യഭാമ മാവോജിയും സമാനമായ ആവശ്യവുമായി സുപ്രീംകോടതിയെ സമീപിച്ചിട്ടുണ്ട്. വന്ദേമാതരത്തിന്റെ ആറ് ചരണങ്ങളും ആലപിക്കുന്നതോ ആലാപനം നടത്തുന്നതോ നിർബന്ധമാക്കുന്നത് തന്റെ മതസ്വാതന്ത്ര്യത്തെയും മനഃസാക്ഷിയുടെ സ്വാതന്ത്ര്യത്തെയും ബാധിക്കുമെന്നും ഭരണഘടന ഉറപ്പുനൽകുന്ന മതനിരപേക്ഷതയുടെയും സാഹോദര്യത്തിന്റെയും തത്ത്വങ്ങൾക്ക് വിരുദ്ധമാണെന്നും അദ്ദേഹം ഹർജിയിൽ വാദിക്കുന്നു. വൈഷ്ണവ, ശാക്തേയ ആരാധനാരീതികളെയോ മറ്റ് വിഭാഗീയ ദൈവവിശ്വാസങ്ങളെയോ അംഗീകരിക്കാത്ത പട്ടികജാതി വിഭാഗത്തിൽപ്പെട്ട ഹിന്ദുവാണ് താനെന്നും മാവോജി വ്യക്തമാക്കുന്നു. ഇത്തരം മതപരമായ ആശയങ്ങൾ ‘ആനന്ദമഠം’ എന്ന നോവലിലും അതിൽ ഉൾപ്പെട്ടിട്ടുള്ള വന്ദേമാതരത്തിന്റെ പൂർണരൂപത്തിലും പ്രതിഫലിക്കുന്നുണ്ടെന്നാണ് അദ്ദേഹത്തിന്റെ വാദം. ചരിത്രപരമായി വന്ദേമാതരത്തിന് ദേശീയഗാനം എന്ന പദവി ഔദ്യോഗികമായി നൽകുന്ന വ്യക്തമായ തീരുമാനമുണ്ടായിരുന്നില്ലെന്നും കാലക്രമേണ രണ്ട് ചരണങ്ങളുള്ള പതിപ്പാണ് ആചാരത്തിലൂടെയും തുടർച്ചയായ ഉപയോഗത്തിലൂടെയും ദേശീയഗാനമായി അംഗീകരിക്കപ്പെട്ടതെന്നും ഹർജിയിൽ പറയുന്നു. രണ്ട് ചരണങ്ങളുള്ള വന്ദേമാതരത്തിന്റെ ആലാപനം ഔദ്യോഗിക ചടങ്ങുകളിൽ ദീർഘകാലമായി പിന്തുടർന്നുവന്ന നിയമപരമായ ആചാരമായി മാറിയതിനാൽ, ആ രീതി റദ്ദാക്കി ‘ആനന്ദമഠം’ നോവലിൽ നിന്നുള്ള ആറ് ചരണങ്ങളുള്ള പതിപ്പ് പകരം കൊണ്ടുവരാൻ കേന്ദ്ര സർക്കാരിന് അധികാരമില്ലെന്നാണ് മാവോജിയുടെ വാദം. 2026 ജനുവരി, ജൂലൈ മാസങ്ങളിൽ കേന്ദ്ര ആഭ്യന്തര മന്ത്രാലയം പുറപ്പെടുവിച്ച ഉത്തരവുകൾ ഭരണഘടനാവിരുദ്ധമാണെന്ന് പ്രഖ്യാപിച്ച് റദ്ദാക്കണമെന്നും രണ്ട് ചരണങ്ങളുള്ള വന്ദേമാതരമാണ് ഇന്ത്യയുടെ ദേശീയഗാനമെന്ന് പ്രഖ്യാപിക്കണമെന്നുമാണ് ഹർജിയിൽ ആവശ്യപ്പെടുന്നത്.

കർണാടക സംഗീതജ്ഞൻ ടി എം കൃഷ്ണയും സമാനമായ വിഷയത്തിൽ സുപ്രീംകോടതിയെ സമീപിച്ചിട്ടുണ്ട്. ദേശീയഗാനത്തെ അപമാനിക്കുന്നത് തടയുന്നതിനുള്ള നിയമത്തിൽ 2026-ൽ വരുത്തിയ ഭേദഗതിയുടെ സാധുതയാണ് അദ്ദേഹം ചോദ്യം ചെയ്തിരിക്കുന്നത്. ദേശീയഗാനമായ വന്ദേമാതരം ആലപിക്കുന്നത് മനഃപൂർവം തടയുകയോ ഗാനം ആലപിക്കുന്ന സംഘത്തിന്റെ പ്രവർത്തനം തടസ്സപ്പെടുത്തുകയോ ചെയ്യുന്നത് മൂന്ന് വർഷം വരെ തടവുശിക്ഷ ലഭിക്കാവുന്ന കുറ്റമാക്കുന്നതാണ് ഭേദഗതി. വന്ദേമാതരവുമായി ബന്ധപ്പെട്ട കേന്ദ്ര ആഭ്യന്തര മന്ത്രാലയത്തിന്റെ ഉത്തരവുകൾ പുറപ്പെടുവിച്ചതിന് പിന്നാലെയാണ് നിയമഭേദഗതി കൊണ്ടുവന്നത്. കൃഷ്ണയുടെ ഹർജി കഴിഞ്ഞ മാസം പരിഗണിച്ചപ്പോൾ കേന്ദ്ര സർക്കാരിനുവേണ്ടി ഹാജരായ സോളിസിറ്റർ ജനറൽ തുഷാർ മേത്തയുടെ അഭ്യർഥനയെ തുടർന്ന് സുപ്രീംകോടതി ഔദ്യോഗിക നോട്ടീസ് അയച്ചിരുന്നില്ല. വിഷയത്തിൽ നോട്ടീസ് അയക്കുന്നത് അനാവശ്യമായ വിവാദങ്ങൾക്ക് വഴിവെക്കുമെന്നായിരുന്നു കേന്ദ്ര സർക്കാരിന്റെ വാദം. എന്നാൽ, വന്ദേമാതരത്തിന്റെ ഒന്നോ അതിലധികമോ ചരണങ്ങൾ ആലപിക്കാതിരിക്കാൻ മനഃസാക്ഷിപരമായ കാരണങ്ങളുള്ള ഒരാൾക്കെതിരെ ക്രിമിനൽ നടപടി സ്വീകരിക്കരുതെന്ന് കോടതി വാക്കാൽ നിരീക്ഷിച്ചിരുന്നു. രണ്ടാഴ്ചയ്ക്കകം വിഷയത്തിൽ മറുപടി സമർപ്പിക്കാനും കേന്ദ്ര സർക്കാരിനോട് കോടതി നിർദേശിച്ചിരുന്നു. ടി എം കൃഷ്ണയുടെ ഹർജിയും വന്ദേമാതരവുമായി ബന്ധപ്പെട്ട പുതിയ ഹർജികളും നവംബർ 30-ന് വീണ്ടും പരിഗണിക്കാനാണ് സുപ്രീംകോടതി തീരുമാനിച്ചിരിക്കുന്നത്.