അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കാങ്കർ: ഛത്തീസ്ഗഡിലെ കാങ്കർ ജില്ലയിലുണ്ടായ ഏറ്റുമുട്ടലിൽ രണ്ട് മരണം. ഏറ്റുമുട്ടലിൽ ഒരു പൊലീസ് കോൺസ്റ്റബിളും ഒരു മാവോയിസ്റ്റുമാണ് മരണപ്പെട്ടത്. ഹിദുർ ഗ്രാമത്തിനടുത്തുള്ള വനമേഖലയിലാണ് വെടിവയ്പ്പ് നടന്നത്. പ്രദേശത്ത് മാവോയിസ്റ്റുകൾക്കായി തെരച്ചിൽ തുടരുകയാണ്.
ഛോട്ടേബെത്തിയ പൊലീസ് സ്റ്റേഷന് കീഴിലുള്ള ഹിദൂർ ഗ്രാമത്തിന് സമീപമുള്ള വനത്തിൽ സുരക്ഷാ ഉദ്യോഗസ്ഥരുടെ സംയുക്ത സംഘം മാവോയിസ്റ്റ് വിരുദ്ധ ഓപ്പറേഷൻ നടത്തുകയായിരുന്നു. വനത്തിൽ മാവോയിസ്റ്റുകളുടെ സാന്നിധ്യമുണ്ടെന്ന പ്രത്യേക വിവരത്തിൻ്റെ അടിസ്ഥാനത്തിലായിരുന്നു നീക്കം.
ഇതിനിടെ സംയുക്ത സംഘത്തിന് നേരെ മാവോയിസ്റ്റുകൾ വെടി വയ്ക്കുകയായിരുന്നു. വെടിവെപ്പിൽ പൊലീസ് കോൺസ്റ്റബിൾ രമേഷ് കുറേത്തിക്ക് ജീവൻ നഷ്ടമായി. സംയുക്ത സംഘം നടത്തിയ തിരിച്ചടിയിൽ ഒരു മാവോയിസ്റ്റ് കൊല്ലപ്പെട്ടു. മാവോയിസ്റ്റിൻ്റെ മൃതദേഹവും എകെ 47 തോക്കും സംഭവസ്ഥലത്ത് നിന്ന് കണ്ടെത്തി.
