അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കോഴിക്കോട്: മർകസ് ഖത്മുൽ ബുഖാരി, സനദ് ദാന സമ്മേളനത്തിന്റെ ഭാഗമായി വിദ്യാഭ്യാസ, സാമൂഹിക മേഖലകളിൽ മികവ് പുലർത്തിയവർക്ക് മർകസ് ഏര്‍പ്പെടുത്തിയ പ്രതിഭാ പുരസ്കാരങ്ങൾ സമ്മാനിച്ചു. സമ്മേളന വേദിയിൽ ഗ്രാൻഡ് മുഫ്തി കാന്തപുരം എ പി അബൂബക്കർ മുസ്‌ലിയാർ അവാർഡുകൾ കൈമാറി.
സമസ്ത കേരള ജംഇയ്യത്തുൽ ഉലമ മുശാവറ അംഗവും കോടമ്പുഴ ദാറുൽ മആരിഫ് സ്ഥാപകനുമായ കോടമ്പുഴ ബാവ മുസ്‌ലിയാർ സ്‌കോളര്‍ലി എമിനന്‍സ് പുരസ്കാരത്തിനും മരണാനന്തര ബഹുമതിയായി ശാഹുല്‍ ഹമീദ് ബാഖവി ശാന്തപുരം കമ്മ്യൂണിറ്റി കാറ്റലിസ്റ്റ് അവാർഡിനും തിരഞ്ഞെടുക്കപ്പെട്ടു.
ഡോ. മുഹമ്മദ് റോഷന്‍ നൂറാനി, ഡല്‍ഹി ത്വയ്ബ ഹെറിറ്റേജിന് വേണ്ടി മാനേജിംഗ് ഡയറക്ടര്‍ മുഹമ്മദ് ശാഫി നൂറാനി, അഷ്റഫ് സഖാഫി പുന്നത്ത് എന്നിവർ യഥാക്രമം ഫെലോഷിപ്പ് അച്ചീവ്മെന്റ് അവാര്‍ഡ്, ഇംപാക്റ്റ് ഇന്നൊവേറ്റര്‍ അവാര്‍ഡ്, അപ്പ്രീസിയേഷന്‍ അവാര്‍ഡ് കരസ്ഥമാക്കി.
വൈജ്ഞാനിക മികവും ആനുകാലിക വിഷയങ്ങളിലെ പണ്ഡിതോചിതമായ ഇടപെലുകളും വിവിധ ഭാഷകളിലായി രചിക്കപ്പെട്ട 140 ഗ്രന്ഥങ്ങളും മറ്റു എഴുത്തുകളും പരിഗണിച്ചാണ് പണ്ഡിത പ്രതിഭാ പുരസ്‌കാരത്തിന് കോടമ്പുഴ ബാവ മുസ്‌ലിയാരെ ജൂറി തിരഞ്ഞെടുത്തത്. അദ്ദേഹത്തിന്റെ രചനകൾ സുന്നി വിദ്യാഭ്യാസ ബോർഡിന്റെയും ജാമിഅത്തുൽ ഹിന്ദിന്റെയും സിലബസിൽ ഇടം നേടിയിട്ടുണ്ട്.
ഒന്നു മുതൽ പത്തു വരെയുള്ള മദ്‌റസാ പാഠപുസ്തകങ്ങളിൽ ബാവ മുസ്‌ലിയാരുടെ പങ്ക് ശ്രദ്ധേയമാണ്. കൂടാതെ 1988 മുതൽ 2000 വരെ കേരള ഗവൺമെന്റിന്റെ സ്‌കൂൾ അറബി പാഠപുസ്തക രചനാസമിതിയിലും അദ്ദേഹം അംഗമായിട്ടുണ്ട്. സീറത്തു സയ്യിദിൽ ബശർ(സ്വ), അബുൽ ബശർ, അൽ ഖിലാഫത്തു റാശിദ:, ദുറൂസുത്തസ്കിയ, അൽ ഖിലാഫത്തുൽ ഉമവിയ്യ, ഖുലാസത്തുൽ ഫിഖ്‌ഹിൽ ഇസ്‌ലാമി, ഹദീസ്‌ അർഥവും വ്യാഖ്യാനവും, ചിന്താകിരണങ്ങൾ തുടങ്ങി ഇസ്‌ലാമിക കർമ ശാസ്ത്രവും ചരിത്രവും ആത്മീയതയും പ്രമേയമായ കനപ്പെട്ട രചനകൾക്ക് പുറമെ ഇൻഷുറൻസ്, ജനിതകശാസ്ത്രം തുടങ്ങിയ സമകാലിക വിഷയങ്ങളിലെ ആധികാരിക മതനിലപാടുകൾ വിശദീകരിക്കുന്ന എഴുത്തുകളും ബാവ മുസ്‌ലിയാരുടേതായുണ്ട്.
ഉത്തരേന്ത്യയിലെ വിവിധ സംസ്ഥാനങ്ങളില്‍ പ്രാഥമിക വിദ്യാഭ്യാസപ്രവര്‍ത്തനത്തിലും സുന്നി ശൃംഖലയുടെ വികാസത്തിനും വിപ്ലവകരമായ അടിത്തറ നല്‍കിയതിനാണ് കമ്യൂണിറ്റി കാറ്റലിസ്റ്റ് അവാർഡിന് ശാഹുൽ ഹമീദ് ബാഖവിയെ പരിഗണിച്ചത്. മരണാനന്തര ബഹുമതി അദ്ദേഹത്തിന്റെ മകന്‍ ഏറ്റുവാങ്ങി. സാമൂഹിക ശാസ്ത്രത്തില്‍ ഫുള്‍ബ്രൈറ്റ് നെഹ്റു പോസ്റ്റ് ഡോക്ടറല്‍ റിസര്‍ച്ച് ഫെല്ലോഷിപ്പിന് അര്‍ഹനായതിനാണ് ജാമിഅ മർകസ് വൈസ് റെക്ടർ കൂടിയായ ഡോ. മുഹമ്മദ് റോഷന്‍ നൂറാനിക്ക് ഫെലോഷിപ്പ് അച്ചീവ്മെന്റ് അവാര്‍ഡ് നല്‍കി ആദരിച്ചത്.
ഉത്തരേന്ത്യന്‍ ഗ്രാമങ്ങളിലെയും ചേരികളിലെയും കുട്ടികളുടെ വിദ്യാഭ്യാസ ശാക്തീകരണത്തിനും അടിസ്ഥാന സൗകര്യ വികസനത്തിനുമായി പ്രവര്‍ത്തിക്കുന്ന ‘ഫുഡ് ഓണ്‍ വീല്‍സ്’ പദ്ധതി നടപ്പാക്കുന്നതിൽ ഡല്‍ഹി തൈബ ഹെറിറ്റേജിനെയും പദ്ധതിക്ക് നേതൃപരമായ പങ്കുവഹിച്ചതിൽ മാനേജിംഗ് ഡയറക്ടര്‍ മുഹമ്മദ് ഷാഫി നൂറാനിയെയും ഇംപാക്റ്റ് ഇന്നൊവേറ്റര്‍ അവാര്‍ഡിനായി ജൂറി പരിഗണിച്ചു.
പ്രാഥമിക സൗകര്യങ്ങൾ ഒട്ടുമില്ലാത്ത, വിദ്യാഭ്യാസം കേട്ടുകേൾവി പോലുമല്ലാത്ത ഗ്രാമങ്ങളിൽ ഭക്ഷണവണ്ടിയുമായി എത്തി ആദ്യഘട്ടത്തിൽ ഭക്ഷണവും പിന്നീട് വിദ്യാഭ്യാസവും നൽകിയ ത്വയ്ബ ഇതിനകം പൊതുസമൂഹത്തിന്റെയും പ്രാദേശിക ഭരണകൂടങ്ങളുടെയും പ്രശംസ പിടിച്ചുപറ്റിയിരുന്നു.
ഫുഡ് ഓൺ വീൽസ് നടപ്പിലാക്കിയ ലൈഫ് സ്കൂളുകളിലും അഞ്ഞൂറ് ഗ്രാമങ്ങളിൽ ആരംഭിച്ച മോഡൽ സ്കൂളുകളിലുമായി നിലവിൽ 30,000 കുട്ടികൾ സൗജന്യവിദ്യാഭ്യാസം നേടുന്നു. നിലവാരമുള്ള വിദ്യാഭ്യാസവും മികച്ച ഭക്ഷണവുമാണ് കുട്ടികൾക്ക് ത്വയ്ബ നൽകുന്നത്.
മാപ്പിളപ്പാട്ട് പരിശീലനത്തിലും ഗവേഷണത്തിലും ശ്രദ്ധേയമായ പങ്കുവഹിച്ചവർക്ക് കേരള ഫോക്‌ലോർ അക്കാദമി നൽകുന്ന യുവപ്രതിഭാ പുരസ്‌കാരം നേടിയയതിനാണ് അശ്‌റഫ് സഖാഫി പുന്നത്തിനെ അപ്പ്രീസിയേഷന്‍ അവാര്‍ഡ് നല്‍കി ആദരിച്ചത്. മര്‍കസ് നോളജ് സിറ്റിയില്‍ പ്രവര്‍ത്തിക്കുന്ന മലബാര്‍ ഫൗണ്ടേഷനിലെ ആര്‍കൈവ്സ് കോര്‍ഡിനേറ്ററാണ് അദ്ദേഹം.
വിദ്യാഭ്യാസ, സാമൂഹിക മേഖലകളിൽ മികവ് പുലർത്തുന്നവർക്ക് കഴിഞ്ഞ വർഷം മുതലാണ് മർകസ് പ്രതിഭാ പുരസ്കാരങ്ങൾ നൽകിത്തുടങ്ങിയത്. അവാർഡ് ജേതാക്കളെ മർകസ് സെക്രട്ടറിയേറ്റും എക്സിക്യൂട്ടീവ് കമ്മിറ്റിയും അനുമോദിച്ചു.
അന്വേഷണം വാർത്തകൾ വാട്സാപ്പിൽ ലഭിക്കാൻ ഇവിടെ ക്ലിക്ക് ചെയ്യുക
