അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.കഴിഞ്ഞ 15 ദിവസമായി വയനാടിനെ വർണ വിസ്മയങ്ങളുടെ ലോകത്തേക്ക് ആനയിച്ചുകൊണ്ട് അമ്പലവയൽ കാർഷിക ഗവേഷണകേന്ദ്രത്തിൽ നടന്നുവന്നിരുന്ന അന്താരാഷ്ട്ര പുഷ്പ സസ്യ ഫലപ്രദർശനം പൂപ്പൊലിക്ക് വർണാഭമായ സമാപനം. മനോഹരങ്ങളായ ഉദ്യാനങ്ങൾക്ക് പുറമെ, പെറ്റ്ഷോ, പുഷ്പാലങ്കാരം, പെൻസിൽ ഡ്രോയിംഗ്, കേക്ക് മേക്കിങ്, അഗ്രിക്വിസ്, വെജിറ്റബിൾ കാർവിങ് തുടങ്ങിയ മത്സരയിനങ്ങളും പൂപ്പൊലിയിൽ ഇത്തവണ നല്ല ജനപങ്കാളിത്തതോടെ നടന്നു.
വയനാട്ടുകാരെ കൂടാതെ വിദേശികളും ഇതരസംസ്ഥാനത്ത് നിന്നുള്ളവരും വിവിധ ജില്ലകളിൽനിന്നു നിരവധി പേരും ഇത്തവണത്തെ പൂപ്പൊലിനഗരിയിലെത്തിയിരുന്നു. വൈവിധ്യമാർന്ന അലങ്കാര, വർണ പുഷ്പങ്ങളുടെ വിസ്മയിപ്പിക്കുന്ന പ്രദർശനം, കൃഷി ഉയരങ്ങളിലേക്ക് എന്ന സന്ദേശം നൽകുന്ന വെട്ടിക്കൽ ഗാർഡനുകൾ, റോസ് ഗാർഡൻ, സൺഫ്ലവർ ഗാർഡൻ, ഡാലിയ ഗാർഡൻ, ജനധാരകൾ എന്നിങ്ങനെ മനസ് നിറക്കുന്ന കാഴ്ചകളും ഇത്തവണത്തെ പൂപ്പൊലിയുടെ പ്രത്യേകതയായിരുന്നു. ഇതോടൊപ്പം അമ്യൂസ്മെന്റ് പാർക്ക്, ചിൽഡ്രൻസ് പാർക്ക് എന്നിങ്ങനെ വിനോദോപാദികളും പൂപ്പൊലിയെ മനോഹരമാക്കി.
Read also:എട്ട് ദിവസങ്ങള്ക്കിടെ ഒരേ ഫാമില് കടുവയെത്തിയത് രണ്ട് തവണ:കൊന്നൊടുക്കിയത് ഏഴ് പന്നികളെ
വിവിധ സർക്കാർ – അർധസർക്കാർ, സ്വകാര്യ സ്ഥാപനങ്ങളുടെയും കർഷകർ, സംരംഭകർ എന്നിവരുടെയും വ്യത്യസ്തയാർന്ന സ്റ്റാളുകളും സന്ദർശകരെ ആകർഷിച്ചു. സംസ്ഥാനത്തിന്റെ വിവിധ ഭാഗങ്ങളിൽ നിന്നുള്ള പ്രശസ്ത കലാകാരന്മാർ അണിനിരന്ന കലാവിരുന്നുകളും ഇത്തവണത്തെ പൂപ്പൊലിക്ക് മാറ്റുകൂട്ടി. പൂപ്പൊലി 2024 കാണുന്നതിനായി കുറഞ്ഞ ചിലവിൽ യാത്ര പാക്കേജും കെഎസ്ആർടിസി ഒരുക്കിയിയിരുന്നു.
സമാപന സമ്മേളനം മന്ത്രി കെ രാജൻ ഉദ്ഘാടനം ചെയ്തു. പൂപ്പൊലി മിനി മോഡലാക്കി 365 ദിവസവും ജനങ്ങൾക്ക് കാണാൻ കഴിയുന്നതിനുള്ള സൗകര്യങ്ങൾ ഒരുക്കും. മൂല്യവർധിത ഉത്പന്നങ്ങൾ ഉണ്ടാകുന്ന തരത്തിലേക്ക് പൂപ്പൊലി മാറണമെന്നും അതിനായി ചർച്ചകൾ നടത്തണമെന്നും മന്ത്രി പറഞ്ഞു. പൂപ്പൊലി സാധാരണക്കാരുടെ ജീവിത നിലവാരം ഉയർത്തി. ജില്ലയിലെ വിനോദസഞ്ചാര – സാമ്പത്തിക മേഖലകളിലെ ഉന്നമനത്തിന് പൂപ്പൊലിയിലൂടെ സാധിച്ചു. സംസ്ഥാനത്തെ കാർഷിക മേഖലയുടെ ഉന്നമനത്തിനായി നടത്തുന്ന വിളയിടാധിഷ്ഠിത മാസ്റ്റർ പ്ലാൻ കർഷകർക്ക് ഏറെ ഉപകാരപ്രദമാണ്. സംരംഭകരായി കർഷകരെ വളർത്തിയെടുക്കുകയാണ് സംസ്ഥാന സർക്കാരിന്റെ ലക്ഷ്യമെന്നും മന്ത്രി കൂട്ടിച്ചേർത്തു.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
