അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ചൈനയും ഇറാനും തമ്മിലുള്ള ക്രൂഡോയിൽ വ്യാപാരത്തിൽ പ്രതിസന്ധി. ഇറാനിൽ നിന്നും ഡിസ്കൗണ്ട് നിരക്കിൽ ചൈനയിലേക്ക് കയറ്റുമതി ചെയ്തുകൊണ്ടിരുന്ന ക്രൂഡോയിലിന് ഉയർന്ന തുക ആവശ്യപ്പെട്ടതിനെ തുടർന്നാണ് വ്യാപാരം പ്രതിസന്ധിയിലായിരിക്കുന്നത്. ലോകത്തെ ഏറ്റവും വലിയ ക്രൂഡോയിൽ ഇറക്കുമതിക്കാരാണ് ചൈന. അതുപോലെ ഇറാനിൽ നിന്നും ഏറ്റവും കൂടുതൽ ക്രൂഡോയിൽ വാങ്ങുന്നതും ചൈനയാണ്.
നിലവിൽ ചൈനയുടെ മൊത്തം ക്രൂഡോയിൽ ഇറക്കുമതിയിൽ 10 ശതമാനത്തോളം ഇറാനിൽ നിന്നാണ്. ഇക്കഴിഞ്ഞ ഒക്ടോബറിലാണ് ഇറാനിൽ നിന്നുള്ള ഇറക്കുമതി പാരമ്യത്തിലെത്തിയത്. അതേസമയം ഇറാനിൽ നിന്നും ചൈനയിലേക്കുള്ള ക്രൂഡോയിൽ ഇറക്കുമതിയുമായി ബന്ധപ്പെട്ട പുതിയ സംഭവവികാസം, ആഗോള ക്രൂഡോയിൽ വിപണിയെ സ്വാധീനിക്കാൻ ശേഷിയുള്ളതാണ്. റോയിട്ടേഴ്സ് ആണ് ഈ വാർത്ത റിപ്പോർട്ട് ചെയ്തത്.
2023 ഒക്ടോബറിൽ ലാറ്റിൻ അമേരിക്കൻ രാജ്യമായ വെനസ്വേലയുടെ മേൽ ചുമത്തിയിരുന്ന ഉപരോധം യുഎസ് പിൻവലിച്ചതോടെ, ക്രൂഡോയിൽ കയറ്റുമതി പുനരാരംഭിച്ചിരുന്നു. എന്നാൽ ചൈനയ്ക്ക് വിട്ടുകൊടുക്കാതെ വെനസ്വേലയിൽ നിന്നുള്ള ക്രൂഡോയിൽ ഇന്ത്യയും യുഎസും വാങ്ങിക്കൂട്ടി. ഇതോടെ ചൈനയ്ക്കുള്ള വിതരണം പരിമിതപ്പെട്ടു. ഈയൊരു അവസ്ഥ മുതലെ‌ടുക്കാനുള്ള ഇറാന്റെ ശ്രമമായും ചൈനയോട് ഉയർന്ന നിരക്ക് ആവശ്യപ്പെട്ടതിനെ വിപണി വിദഗ്ധർ വിലയിരുത്തുന്നുണ്ട്.
രാജ്യാന്തര വിപണിയിൽ പുതുവർഷത്തെ ആദ്യ വ്യാപാര ആഴ്ചയിൽ നേട്ടത്തോടെയാണ് പ്രധാന ക്രൂഡോയിൽ ഫ്യൂച്ചേഴ്സ് കോൺട്രാക്ടുകൾ ക്ലോസ് ചെയ്തത്. ബ്രെന്റ് ക്രൂഡോയിൽ ഫ്യൂച്ചേഴ്സ് കോൺട്രാക്ട് (ഫെബ്രുവരി എക്സ്പയറി), ആഴ്ച കാലയളവിൽ 1.5 ശതമാനം നേട്ടത്തോടെ 78.76 ഡോളറിലും യുഎസ് ഡബ്ല്യുടിഐ ക്രൂഡോയിൽ ഫ്യൂച്ചേഴ്സ് കോൺട്രാക്ട് 2.2 ശതമാനം വർധനയോടെ 73.81 ഡോളർ നിലവാരത്തിലുമാണ് വ്യാപാരം അവസാനിപ്പിച്ചത്.
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
