അനുസരണ എപ്പോഴും നല്ലതല്ല, കുഞ്ഞുങ്ങൾ അനുസരണക്കേട് കാട്ടട്ടെ

എപ്പോഴെങ്കിലും സെഷ്യൽ അബ്യൂസിനു 

ഇരയാക്കപ്പെട്ട കുഞ്ഞുങ്ങളോട് സംസാരിച്ചിട്ടുണ്ടോ?

ആരെയും വിശ്വസിക്കാൻ മനസ്സനുവദിക്കാത്ത പോലെ ഭയത്തിലും വെറുപ്പിലും മാത്രം അവർ അറച്ചറച്ച് പറയുന്ന ചില സത്യങ്ങളുണ്ട്.

അനുസരണ കൂടിപ്പോയതുകൊണ്ടാണ്. മൂത്തവരോട് അനുസരണക്കേട് കാണിക്കാത്ത നല്ലകുട്ടി ആയിപ്പോയതുകൊണ്ടാണ് എനിക്കിങ്ങനെ വന്നതെന്ന് ചിന്തിക്കുന്ന കുഞ്ഞുങ്ങൾ ഒരുപാടാണ്.

കള്ളമല്ല. ഒരുതരത്തിൽ ചിന്തിച്ചാൽ അവർ പറഞ്ഞതിൽ യാതൊരു തെറ്റുമില്ല.

“ഞാനല്ലേ!, നല്ലകുട്ടികൾ മൂത്തവര് പറഞ്ഞാൽ അനുസരിക്കണ്ടേ?” എന്ന വാക്കുകളാണ് അടുത്ത പരിചയക്കാരിൽ നിന്നോ ബന്ധുക്കളിൽ നിന്നോ ഇത്തരം അനുഭവങ്ങൾ നേരിടേണ്ടി വന്ന കുഞ്ഞുങ്ങളോട് കുറ്റവാളികൾ ആദ്യം പറഞ്ഞിട്ടുണ്ടാവുക.

മാമനല്ലേ/മാമിയല്ലേ /അപ്പൂപ്പനല്ലേ /ചേട്ടനല്ലേ /ചേച്ചിയല്ലേ.. അവരെല്ലാം അച്ഛനേം അമ്മയേം പോലെയല്ലേ. മൂത്തവരെക്കുറിച്ച് ഇങ്ങനെയൊന്നും പറയരുത്. എന്നതാകും മിക്ക കുട്ടികളും തങ്ങൾക്ക് നേരിടേണ്ടി വന്ന മോശം അനുഭവങ്ങളെ കുറിച്ച് എന്തെങ്കിലും അച്ഛനോടോ അമ്മയോടോ പറയാൻ തുടങ്ങുമ്പോൾ തന്നെ കേൾക്കേണ്ടി വരുന്ന മറുപടി.

എന്തുകൊണ്ട് പ്രതികരിച്ചില്ല എന്ന് ചോദിക്കുന്നവർ തന്നെയല്ലേ 

“മുതിർന്നവർ പറയുന്നത് അനുസരിക്കണം” എന്നുള്ള കാര്യം പഠിപ്പിച്ചു വെച്ചിരിക്കുന്നതും ആരോട് പ്രതികരിക്കണം, ആരോട് പ്രതികരിച്ചുകൂടാ എന്നുള്ള ചിന്താകുഴപ്പം കുഞ്ഞുങ്ങളിൽ ഉളവാക്കുന്നതും.

“കുട്ടിക്കാലം” എന്നത് അവർക്കൊരു വേദനിപ്പിക്കുന്ന, വേട്ടയാടുന്ന ഭൂതകാലമായി മാറാതിരിക്കാൻ

നല്ലതും ചീത്തയും തിരിച്ചറിയാൻ കഴിയാത്ത കുഞ്ഞുങ്ങളിൽ അല്പം അനുസരണക്കേട് നല്ലതാണ് എന്നുതന്നെ കരുതുക.

മൂത്തവരെ അനുസരിക്കാൻ കുഞ്ഞുങ്ങളെ പറഞ്ഞു പഠിപ്പിക്കാതിരിക്കുക..

ആരെന്തു പറഞ്ഞാലും ചെയ്താലും വീട്ടിൽ തുറന്നു സംസാരിക്കാനുള്ള അന്തരീക്ഷം കുട്ടികൾക്ക് ഒരുക്കികൊടുക്കുക.

ശരിയല്ലാത്ത കാര്യങ്ങളോട് പറ്റില്ലെന്ന് പറയാൻ കുഞ്ഞുങ്ങൾ പ്രാപ്തരാണോ എന്നുറപ്പുവരുത്തുക..

അച്ഛന്റേം അമ്മയുടേം പ്രായമുള്ളവർ നിങ്ങളുടെ നല്ലതിന് വേണ്ടി മാത്രമേ എന്തും ചെയ്യുള്ളു എന്ന ധാരണ കുഞ്ഞുങ്ങളിൽ വളർത്താതിരിക്കുക..

മുതിർന്നവരോട് അപരിചിതരോടെന്ന പോലെ പെരുമാറിയാൽ മതി എന്നുപഠിപ്പിക്കുക.

അതുമാത്രം പോരാ.

നിങ്ങളുടെ സാന്നിധ്യത്തിൽ പോലും അടുത്തേയ്ക്ക് വിളിക്കുന്ന മനുഷ്യരോട് പറ്റില്ലെന്ന് പറഞ്ഞു വാശിപിടിക്കട്ടെ.

ആരെങ്കിലും തൊട്ടാലും തലോടിയാലും പരിസരം മറന്ന് നിലവിളിക്കട്ടെ. മാതാപിതാക്കൾ ഇതൊന്നും നല്ല കുട്ടികളുടെ ലക്ഷണമല്ല എന്നുപറഞ്ഞു അവരുടെ പ്രതികരണശേഷിയെ നശിപ്പിക്കാതിരിക്കുക.

കാരണം, നിങ്ങൾക്ക് മുന്നിൽ വെച്ച് പെരുമാറുന്ന അതേ പെരുമാറ്റവും അതേ കരുതലും പ്രതീക്ഷിച്ച് നിങ്ങളുടെ അസാന്നിധ്യത്തിലും കുട്ടികൾ അവരെ വിശ്വസിച്ചു ഒപ്പം പോവുന്ന സാഹചര്യങ്ങൾ ഉണ്ടാകാനുള്ള സാധ്യതകൾ ഏറെയാണ്.

പ്രായത്തിൽ മുതിർന്നവർ എല്ലാവരും നല്ലവരാണെന്നും സ്നേഹപ്രകടനങ്ങൾ എല്ലാം സത്യമാണെന്നുമുള്ള തെറ്റായ ധാരണ കുഞ്ഞുങ്ങളിൽ നിറയ്ക്കാതിരിക്കുക.

ഇതുവഴി 10% എങ്കിലും കുഞ്ഞുങ്ങൾ നേരിടുന്ന സെഷ്യൽ അബ്യൂസ് കേസുകൾ കുറഞ്ഞുകിട്ടും.

അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു

നിങ്ങൾ അറിയാൻ ആഗ്രഹിക്കുന്ന വാർത്തകൾ നിങ്ങളുടെ Facebook Feed ൽ Anweshanam

നിങ്ങൾ അറിയാൻ ആഗ്രഹിക്കുന്ന വാർത്തകൾ നിങ്ങളുടെ ടെലിഗ്രാമിൽ അന്വേഷണം

അന്വേഷണം വാർത്തകൾ അറിയാൻ  Threads– ൽ Join ചെയ്യാം