അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഷവോമിയുടെ ഉടമസ്ഥതയിലുള്ള റെഡ്മിയുടെ സ്മാർട്ട്ഫോണുകൾക്ക് ഇന്ത്യൻ വിപണിയിൽ ജനപ്രിതി ഏറെയാണ്. ഷവോമിയെ സ്മാർട്ട്ഫോൺ വിപണിയിൽ മുൻനിരയിൽ നിലനിർത്തുന്നതിൽ റെഡ്മി ഫോണുകൾ പ്രധാന പങ്ക് വഹിക്കുന്നു. കുറഞ്ഞ വിലയിൽ മികച്ച സവിശേഷതകൾ നൽകുന്നു എന്നതാണ് ഈ ഫോണുകളുടെ പ്രത്യേകത. ഈ നിരയിലെ പുതിയ ഡിവൈസുകൾ അടങ്ങുന്ന റെഡ്മി 12 സീരീസ് ഫോണുകൾ ഇപ്പോൾ പുതിയൊരു നേട്ടം സ്വന്തമാക്കിയിരിക്കുകയാണ്. 30 ലക്ഷം വിൽപ്പന എന്ന നേട്ടമാണ് ഈ ഡിവൈസ് സ്വന്തമാക്കിയത്.
റെഡ്മി 12 5ജി, റെഡ്മി 12 4ജി എന്നീ മോഡലുകൾ അടങ്ങുന്ന ഷവോമി റെഡ്മി 12 സീരീസാണ് ലോഞ്ച് ചെയ്ത് 100 ദിവസത്തിനുള്ളിൽ 3 ദശലക്ഷം യൂണിറ്റുകൾ വിറ്റഴിച്ചുകൊണ്ട് റെക്കോർഡ് ഇട്ടത്. ഷവോമി തന്നെയാണ് ഇക്കാര്യം ഔദ്യോഗികമായി ട്വിറ്ററിലൂടെ വെളിപ്പെടുത്തിയത്. കമ്പനി ഉപഭോക്താക്കളോട് നന്ദിയും അറിയിച്ചു, ഈ നേട്ടത്തിലൂടെ ഇന്ത്യൻ സ്മാർട്ട്ഫോൺ വിപണിയിൽ ഷവോമിക്ക് വർധിച്ച് വരുന്ന സ്വാധീനം വ്യക്തമാകുന്നു. ആകർഷകമായ സവിശേഷതകളുമായിട്ടാണ് റെഡ്മി 12 സീരീസിലെ രണ്ട് ഫോണുകളും വരുന്നത്.
റെഡ്മി 12 5ജി സ്മാർട്ട്ഫോൺ കുറഞ്ഞ വിലയിൽ 5ജി കണക്റ്റിവിറ്റി അടക്കുള്ള സവിശേഷതകളുമായി വരുന്നു. ഈ ഡിവൈസിൽ 6.79-ഇഞ്ച് FHD+ എൽസിഡി ഡിസ്‌പ്ലേയാണുള്ളത്. 90Hz റിഫ്രഷ് റേറ്റുള്ള ഈ ഡിസ്പ്ലെ മികച്ച യൂസർ എക്സ്പീരിയൻസ് നൽകുന്നു. ആൻഡ്രോയിഡ് 13 ബേസ്ഡ് എംഐയുഐ 14ലാണ് ഈ ഫോൺ പ്രവർത്തിക്കുന്നത്. ഒക്ടാ കോർ സ്നാപ്ഡ്രാഗൺ 4 ജെൻ 2 പ്രോസസറാണ് ഫോണിന് കരുത്ത് നൽകുന്നത്. 2 എംപി ഡെപ്ത് സെൻസറും 8 എംപി ഫ്രണ്ട് ഫേസിംഗ് ക്യാമറയും 50 എംപി പ്രൈമറി ക്യാമറയുമുള്ള റിയർ ക്യാമറ സെറ്റപ്പും ഈ ഡിവൈസിലുണ്ട്.
സവിശേഷതകൾ
റെഡ്മി 12 5ജി സ്മാർട്ട്ഫോണിൽ 8 ജിബി വരെ LPDDR4X റാമും 256 ജിബി UFS 2.2 സ്റ്റോറേജുമാണുള്ളത്. ഇത് ഡിവൈസിന് കാര്യക്ഷമമായ മൾട്ടിടാസ്കിംഗും വിപുലമായ സ്റ്റോറേജ് കപ്പാസിറ്റിയും ഉറപ്പാക്കുന്നു. 18W വയേഡ് ചാർജിങ് സപ്പോർട്ടുള്ള 5000mAh ബാറ്ററിയാണ് ഈ ഡിവൈസിലുള്ളത്. മൊത്തം സവിശേഷതകൾ പരിഗണിക്കുമ്പോൾ റെഡ്മി 12 5ജി സ്മാർട്ട്ഫോൺ കുറഞ്ഞ വിലയിൽ ലഭിക്കുന്ന മികച്ചൊരു 5ജി ഡിവൈസ് തന്നെയാണ്.
മീഡിയടെക് ഹെലിയോ ജി88 പ്രോസസറിന്റെ കരുത്തിലാണ് റെഡ്മി 12 4ജി സ്മാർട്ട്ഫോൺ പ്രവർത്തിക്കുന്നത്. 50 എംപി പ്രൈമറി ക്യാമറ, 8 എംപി അൾട്രാ വൈഡ് ആംഗിൾ ലെൻസ്, 2 എംപി മാക്രോ ലെൻസ് എന്നിവയുള്ള ട്രിപ്പിൾ റിയർ ക്യാമറ സെറ്റപ്പുമായിട്ടാണ് ഈ ഡിവൈസ് വരുന്നത്. 6 ജിബി + 128 ജിബി ഇന്റേണൽ സ്‌റ്റോറേജിമായി വരുന്ന ഫോണിൽ 5ജി വേരിയന്റിലുള്ള പല സവിശേഷതകളും റെഡ്മി നൽകിയിട്ടുണ്ട്. 5ജി ഫോൺ വേണമെന്നില്ലെങ്കിൽ ഇന്ത്യൻ വിപണിയിൽ കുറഞ്ഞ വിലയ്ക്ക് വാങ്ങാവുന്ന മികച്ച ഡിവൈസാണ് ഇത്.
റെഡ്മി 12 4ജി സ്മാർട്ട്ഫോണിന്റെ 4 ജിബി റാമുള്ള വേരിയന്റിന് 9,299 രൂപയാണ് ഇന്ത്യയിൽ വില. റെഡ്മി 12 5ജി സ്മാർട്ട്ഫോണിന്റെ 4 ജിബി റാമുള്ള വേരിയന്റിന് 11,999 രൂപ വിലയുണ്ട്. ഇത് തന്നെയാണ് ഫോണുകളുടെ ഏറ്റവും വില കുറഞ്ഞ വേരിയന്റുകൾ. ഇത്രയും കുറഞ്ഞ വിലയിൽ മികച്ച സവിശേഷതകൾ നൽകുന്ന മറ്റ് ഫോണുകൾ വിപണിയിലില്ല എന്നതാണ് 100 ദിവസത്തിനുള്ളിൽ 3 ദശലക്ഷം യൂണിറ്റുകൾ വിറ്റഴിക്കാൻ കമ്പനിയെ സഹായിച്ചത്.
