അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.കാക്കനാട്: ഷവര്‍മ കഴിച്ചതിന് പിന്നാലെ ഭക്ഷ്യവിഷബാധയേറ്റ് മരിച്ച യുവാവിന്റെ രക്തത്തില്‍ സാല്‍മോണെല്ല ബാക്ടീരിയയുടെ സാന്നിധ്യം. രാഹുലിന്റെ ഹൃദയത്തില്‍ നിന്നുള്ള രക്തസാമ്പിളുകളും പരിശോധനയ്ക്കായി ശേഖരിച്ചിട്ടുണ്ട്. അതേസമയം ഷവര്‍മയിലൂടെയാണോ ബാക്ടീരിയ ശരീരത്തില്‍ എത്തിയതെന്ന് പരിശോധിക്കുമെന്ന് പൊലീസ് അറിയിച്ചു. ആന്തരിക അവയവങ്ങളുടെ രാസപരിശോധന ഫലം രണ്ടു ദിവസത്തിനകം ലഭ്യമാകുമെന്നാണ് അന്വേഷണ ഉദ്യോഗസ്ഥരുടെ പ്രതീക്ഷ.
രാഹുലിനെ ആശുപത്രിയില്‍ പ്രവേശിപ്പിച്ച ദിവസം സണ്‍റൈസ് ആശുപത്രിയില്‍ രണ്ട് പേര്‍ കൂടി ഭക്ഷ്യ വിഷബാധയേറ്റ് ചികിത്സ തേടിയിരുന്നു. ഇത് സംബന്ധിച്ച് ഡി.എം.ഒ ക്ക് ആശുപത്രി അധികൃതര്‍ റിപ്പോര്‍ട്ട് നല്‍കിയിട്ടുണ്ട്. ഈ മാസം 19ന് 6 പേര്‍ വിവിധ സ്ഥലങ്ങളില്‍ ചികിത്സ തേടിയതായി തൃക്കാക്കര മെഡിക്കല്‍ ഓഫീസര്‍ ഡി.എം.ഒ യ്ക്ക് നല്‍കിയ റിപ്പോര്‍ട്ടില്‍ പറയുന്നു. സംഭവത്തിന് പിന്നാലെ തൃക്കാക്കര നഗരസഭ ആരോഗ്യവിഭാഗത്തിന്റെ നിര്‍ദ്ദേശത്തെ തുടര്‍ന്ന് മാവേലിപുരം ലേ ഹയാത്ത് ഹോട്ടല്‍ പോലീസ് അടപ്പിച്ചിരുന്നു. ഭക്ഷ്യ സുരക്ഷാ വകുപ്പും പൊലീസ് ഫൊറന്‍സിക് വിഭാഗവും പരിശോധന നടത്തി. എന്നാല്‍ ആ ദിവസത്തെ ഷവര്‍മ സാമ്പിള്‍ കണ്ടെത്താനായില്ല. അതേസമയം ഹോട്ടലിലുണ്ടായിരുന്ന ഭക്ഷണത്തിന്റെ സാമ്പിള്‍ പരിശോധയ്ക്ക് അയച്ചു. കേസെടുത്തതിന് പിന്നാലെ ഹോട്ടല്‍ ഉടമകള്‍ ഒളിവിലാണ്.
ഈ മാസം 18ന് ആണ് രാഹുല്‍ ഓണ്‍ലൈനായി വരുത്തിയ ഷവര്‍മ കഴിച്ചത്. ഇതിന് ശേഷം ഇയാള്‍ അവശ നിലയിലായെന്ന് സുഹൃത്തുക്കള്‍ പറയുന്നു. 19 മുതല്‍ പനിയും വയറിളക്കവും ഉണ്ടായിരുന്നു. തുടര്‍ന്ന് അന്ന് മറ്റൊരു ആശുപത്രിയില്‍ ചികിത്സ തേടി. 22ന് രാവിലെ പത്തരയ്ക്കാണ് രാഹുലിനെ അബോധാവസ്ഥയില്‍ കാക്കനാട് സണ്‍റൈസ് ആശുപത്രിയിലെത്തിച്ചത്. ആരോഗ്യനില മോശമായതിനാല്‍ ഉടന്‍ വെന്റിലേറ്ററിലേക്ക് മാറ്റി. ഹൃദയസ്തംഭനത്തോടൊപ്പം കടുത്ത അണുബാധ അവയവങ്ങളുടെ പ്രവര്‍ത്തനത്തെ ബാധിച്ചു. ചികിത്സയിലിരിക്കെ ഈ മാസം 25ന് ഉച്ചയ്ക്ക് 2.55ന് രാഹുല്‍ മരിച്ചു.
കാക്കനാട് പ്രത്യേക സാമ്പത്തിക മേഖലയിലെ എസ്എഫ്ഒ ടെക്‌നോളജീസ് ജീവനക്കാരനായിരുന്നു കോട്ടയം പാലാ സ്വദേശിയായ രാഹുല്‍. ചെമ്പിളാവ് ചിറക്കരക്കുഴിയില്‍ കെഎസ്ഇബി റിട്ട. ഓവര്‍സീയര്‍ കെകെ ദിവാകരന്‍ നായരുടെ മകനാണ്. എംപി സില്‍വിയാണ് മാതാവ്. കാര്‍ത്തിക, ഭവ്യ എന്നിവര്‍ സഹോദരങ്ങളാണ്. .
അന്വേഷണം വാർത്തകൾ വാട്സ്ആപ്പിലൂടെ ലഭിക്കാൻ ക്ലിക്ക് ചെയ്യു
നിങ്ങൾ അറിയാൻ ആഗ്രഹിക്കുന്ന വാർത്തകൾ നിങ്ങളുടെ Facebook Feed ൽ Anweshanam
നിങ്ങൾ അറിയാൻ ആഗ്രഹിക്കുന്ന വാർത്തകൾ നിങ്ങളുടെ ടെലിഗ്രാമിൽ അന്വേഷണം
അന്വേഷണം വാർത്തകൾ അറിയാൻ Threads– ൽ Join ചെയ്യാം
