അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.പെരുമ്പാവൂര്‍: മലയാളികളുടെ ജനപ്രിയ നടന്‍ ജയറാമിന് അഭിനയം പോലെ തന്നെ ഏറെ ഇഷ്ടമുള്ള ഒന്നാണ് കൃഷിയും. വിഷുവിന് മുമ്പേ തന്നെ തന്റെ തൊടിയില്‍ പച്ചക്കറി വിളവെടുപ്പ് നടത്തിയിരിക്കുകയാണ് ജയറാം. സ്വന്തം ഒഫീഷ്യല്‍ ഇന്‍സ്റ്റഗ്രാമില്‍ പോസ്റ്റ് ചെയ്ത വീഡിയോയില്‍ തലയില്‍ തോര്‍ത്തും കെട്ടി അസ്സലൊരു കര്‍ഷകന്റെ ഗെറ്റപ്പില്‍ ആണ് നടന്റെ പച്ചക്കറി വിളവെടുപ്പ്.
ജയറാം ആരാധകരിലൂടെ ദൃശ്യങ്ങള്‍ സോഷ്യല്‍ മീഡിയയില്‍ വൈറലായിരിക്കുകയാണിപ്പോള്‍. തക്കാളിയും മത്തങ്ങയും വഴുതനങ്ങയും വെള്ളരിയ്ക്കയും മുറം നിറയെയുണ്ട്. ജൈവകൃഷിയിലാണ് ജയറാമിന് കമ്പം. വീഡിയോയ്ക്ക് പശ്ചാത്തലത്തില്‍ തന്റെ സുഹൃത്തും ഇഷ്ട സംവിധായകനുമായ സത്യന്‍ അന്തിക്കാടിന്റെ ‘മനസ്സിനക്കരെ’യിലെ മറക്കുടയാല്‍.. എന്ന ഗാനവും ചേര്‍ത്തിട്ടുണ്ട് ജയറാം.
കൃഷിയ്ക്കും പശുവളര്‍ത്തലിനുമായി ‘ആനന്ദ്’ എന്ന പേരില്‍ ഒരു ഫാം ഹൗസ് തന്റെ സ്വന്തം നാടായ പെരുമ്പാവൂര്‍ തോട്ടുവയില്‍ നടത്തുന്നുണ്ട് ജയറാം. കാര്‍ഷികരംഗത്തെ ജനകീയ ഇടപെടലുകളില്‍ പങ്കാളിയാകാന്‍ കിട്ടുന്ന ഒരവസരവും മലയാളികളുടെ പ്രിയപ്പെട്ട ഈ നടന്‍ പാഴാക്കാറില്ല.
കൂവപ്പടി ജി. ഹരികുമാര്‍
