അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.
മുംബൈ: ബോളിവുഡ് താരം ഷാരൂഖ് ഖാന്റെ മകന് ആര്യന് ഖാന് പ്രതിയായ ലഹരിമരുന്ന് കേസ് അന്വേഷണത്തില് നിരവധി ക്രമക്കേടുകള് കണ്ടെത്തിയതായി റിപ്പോര്ട്ട്. മാസങ്ങള്ക്ക് മുമ്പ് നാര്ക്കോട്ടിക്സ് കണ്ട്രോള് ബ്യൂറോ തലവന് സമര്പ്പിച്ച 3,000 പേജുള്ള വിജിലന്സ് അന്വേഷണ റിപ്പോര്ട്ടിലാണ് കണ്ടെത്തലുള്ളത്. എന്.സി.ബിയിലെ എട്ടോളം ഉദ്യോഗസ്ഥരുടെ ഭാഗത്തുനിന്ന് സംശയകരമായ പെരുമാറ്റം ഉണ്ടായതായി റിപ്പോര്ട്ടില് പറയുന്നു.
അന്വേഷണത്തില് ഉള്പ്പെട്ട ഉദ്യോഗസ്ഥരുടെ ഉദ്ദേശശുദ്ധിയില് സംശയമുണ്ടെന്നും റിപ്പോര്ട്ടിലുണ്ട്. അന്വേഷണത്തിന്റെ ഭാഗമായി 65 പേരുടെ മൊഴി രേഖപ്പെടുത്തി. ചിലർ മൂന്നും നാലും തവണ മൊഴിമാറ്റി. ആര്യന് ഖാനെ കേസില് പെടുത്തിയത് പണം തട്ടാനാണെന്ന ആരോപണം ഇതുവരെ തെളിയിക്കപ്പെട്ടിട്ടില്ല.
അതേസമയം ചിലരെ പ്രത്യേകമായി ലക്ഷ്യം വെച്ചെന്ന് റിപ്പോര്ട്ടിലുണ്ട്. ആഡംബര കപ്പലിലെ ലഹരിക്കേസിന് പുറമേ മറ്റു ചില കേസുകളിലെ അന്വേഷണത്തിലും ക്രമക്കേടുകള് കണ്ടെത്തിയതായാണ് വിവരം.
“ഈ കേസിൽ 7 മുതൽ 8 വരെ എന്.സി.ബി ഓഫീസർമാരുടെ പങ്ക് സംശയാസ്പദമാണെന്ന് കണ്ടെത്തി. വകുപ്പുതല അന്വേഷണം ആരംഭിച്ചിട്ടുണ്ട്. എന്.സി.ബിക്ക് പുറത്തുള്ളവർക്കെതിരെ നടപടിയെടുക്കാൻ മുതിർന്ന ഉദ്യോഗസ്ഥരിൽ നിന്ന് അനുമതി തേടിയിട്ടുണ്ട്”- എന്നാണ് എന്.സി.ബി വൃത്തങ്ങളെ ഉദ്ധരിച്ച് എന്ഡിടിവി റിപ്പോര്ട്ട് ചെയ്തത്.
ആര്യന് ഖാനെ അറസ്റ്റ് ചെയ്ത റെയ്ഡിന് നേതൃത്വം നല്കിയ സമീര് വാങ്കഡെയടക്കമുള്ള ഉദ്യോഗസ്ഥര്ക്കെതിരെ അന്വേഷണം നടത്താന് കഴിഞ്ഞ വര്ഷം ഒക്ടോബറില് പ്രത്യേക അന്വേഷണ സംഘത്തെ നിയോഗിച്ചിരുന്നു. കഴിഞ്ഞ ജൂലായില് സംഘം റിപ്പോര്ട്ട് സമര്പ്പിച്ചു. ആഡംബര കപ്പലിലെ റേവ് പാര്ട്ടിക്കിടെ ലഹരി പിടിച്ചെടുത്തെന്ന് കാണിച്ച് ആര്യന് ഖാന് അടക്കം 15 പേരെ എന്.സി.ബി. അറസ്റ്റ് ചെയ്തിരുന്നു. പിന്നീട് എന്.സി.ബി. ആര്യന് ഖാന് ക്ലീന് ചിറ്റ് നല്കി.
വിവാദമായ ലഹരിമരുന്ന് കേസില് ആര്യന് ഖാന് അടക്കം ആറുപ്രതികള്ക്കാണ് എന്.സി.ബി. ക്ലീന്ചിറ്റ് നല്കിയത്. കേസില് ഇവര്ക്കെതിരേ മതിയായ തെളിവുകളില്ലെന്നും അന്വേഷണത്തില് അപാകമുണ്ടായെന്നുമാണ് എന്.സി.ബി. സമര്പ്പിച്ച കുറ്റപത്രത്തില് പറഞ്ഞിരുന്നത്. ലഹരിമരുന്ന് കേസില് അറസ്റ്റിലായ ആര്യന് ഖാന് 26 ദിവസമാണ് ജയിലില് കഴിഞ്ഞത്.
